ۇسىنىس ەتىلگەن ءتىلشى شياۋ لي، ەرىكتى ءتىلشى ياڭ يان
20-قاڭتاردا ساۋان اۋدانىنداعى ءبىر مەيمانحانانىڭ حاۋىپسىزدىك ساندىعىنان اقشا جوعالعان. بۇل حاۋىپسىزدىك ساندىعىنىڭ كىلتى ارناۋلى ادامنىڭ باسقارۋىندا بولىپ، حاۋىپسىزدىك ساندىعى دا بۇلىنبەگەن. الايدا، ىشىندەگى 13 مىڭ يۋان اقشا زىم -زيا جوعالعان ەكەن.
ساۋان اۋدانىنداعى ساقشىلار دەرەۋ تەكسەرۋ جۇرگىزىپ، بىرنەشە ساعاتتان كەيىن قىلمىس كۇماندىسىن قولعا تۇسىرگەن. ويلاماعان جەردەن قىلمىس كۇماندىسى 17 جاستاعى بويجەتكەن بولىپ شىققان.
ساۋان اۋداندىق قوعام حاۋىپسىزدىگى مەكەمەسى قىلمىستىق ىستەر ۇلكەن اترەتىنىڭ ساقشىلارى ءتۇن ورتاسىندا ءمالىم ءبىر مەيمانحانا ديرەكتورىنىڭ حاۋىپسىزدىك ساندىعىنداعى اقشا جوعالعاندىعى جونىندەگى دەلو مالىمدەۋ تەلەفونىن قابىلدايدى.
ساقشىلار تەلەفوندى قابىلداعان سوڭ، دەرەۋ تەكسەرۋ اسپاپتارىن الىپ، ناق مايدانعا بارىپ تەكسەرۋ جۇرگىزەدى. ساقشىلار ەكى گرۋپپاعا ءبولىنىپ، ءبىرىنشى گرۋپپا ناق مايدانعا تەكسەرۋ جۇرگىزسە، ەكىنشى گرۋپپا سىرتتاي جاعداي ۇعىسادى.
ناق مايداننان حالىق ساقشىلارى حاۋىپسىزدىك ساندىعىنداعى 13 مىڭ يۋاننىڭ جوعالعاندىعىن، الايدا ساندىققا ەشقانداي سىزات تۇسپەگەندىگىن بايقايدى.
ساقشىلار مەيمانحانا جاۋاپتىسى مەن كۇتۋشىلەردەن قۇندى ءجىپ ۇشىنا يە بولا المايدى، ونىڭ ۇستىنە، مەيمانحانانىڭ باقىلاۋ كامەراسى دا بۇزىلعان ەكەن.
تەكسەرۋ جۇرگىزۋ ارقىلى بارلاۋشىلار بۇل دەلونى تانىس ادام نەمەسە ورتاعا قانىق ادام تۋدىرعان بولۋى مۇمكىن دەپ تۇسپالدايدى.
وسى ساتتە، مەيمانحانانىڭ اقشاسىنا جاۋاپتى شياۋ جاڭ ( حاۋىپسىزدىك ساندىعىنىڭ كىلتىن باسقارۋشى ) بارلاۋشىلارعا وقيعا تۋىلۋدان ءبىر كۇن بۇرىنعى كۇنى تۇندە وزىمەن بىرگە كەزەكشى بولعان دوسى يۋان يۋاننىڭ ( جاناما ات ) تاڭەرتەڭنەن بەرى قاراسىن كورسەتپەگەندىگىن، جاتاقتاعى نارسە-كەرەكتەرىن دە الىپ كەتكەندىگىن ايتادى. سونىمەن، يۋان يۋاننىڭ قىلمىس وتكىزۋ مۇمكىندىگى بارىنشا كۇشەيە تۇسەدى.
سونىمەن بىرگە، سىرتتاي جاعداي ۇعىسۋشىلار يۋان يۋاننىڭ 21-اقپاندا چىڭدۋعا باراتىن ۇشاقتىڭ بەلەتىن ساتىپ العاندىعى جونىندەگى ءجىپ ۇشىنا يە بولادى.
يۋان يۋان حاۋىپسىزدىك تەكسەرۋىنەن وتپەكشى بولعاندا ءوزىن كۇتىپ تۇرعانى قولىنا سالىنباقشى بولعان مۇزداي كوزىر ەكەندىگىن ويلاپ تا كورمەگەن ەدى.
تەرگەۋ ارقىلى 2013-جىلى جەلتوقساننىڭ باسىندا ەندى عانا 17 گە شىققان يۋان يۋان جالعىز ءوزى شينجياڭعا كەلىپ، ويلاماعان جەردەن مەيمانحانادا قىزمەت ىستەيتىن شياۋ جاڭمەن تانىسىپ قالعاندىعىن، ونىڭ ۇستىنە، شياۋ جاڭ قىزمەت ىستەيتىن مەيمانحانادا ۇنەمى تۇنەيتىندىگىن، كەيدە شياۋ جاڭ جالعىز كەزەكشى بولعاندا يۋان يۋاندى قاسىنا شاقىرىپ الاتىندىعىن، ۋاقىتتىڭ وتۋىمەن يۋان يۋاننىڭ مەيمانحانا جاعدايىنا ابدەن قانىق بولىپ قالعاندىعىن بىلەدى.
2014-جىلى 20-قاڭتار ساعات 23 اينالاسىندا شياۋ جاڭ مەيمانحانا اسحاناسىنىڭ تاپسىرعان تيجارات كىرىسىن ساناپ وتكىزىپ العان سوڭ، حاۋىپسىزدىك ساندىعىنا سالىپ قويادى دا، كىلتىن شاپانىنىڭ قالتاسىنا سالا سالادى.
سول كۇنى كەشتە يۋان يۋان سىرتتا ءان ايتىپ قايتىپ كەلگەننەن كەيىن شياۋ جاڭمەن بىرگە كەزەكشىلىك ىستەيدى. ءبىراز اڭگىمەلەسكەننەن كەيىن شياۋ جاڭ تۇماۋ ءتيىپ، جايسىزدانىپ تۇرعانىن ايتىپ يۋان يۋانعا ورنىنا كەزەكشىلىك ىستەۋدى تاپسىرىپ، شاپانىن شەشىپ، ۇيىقتاپ قالادى.
ءدال وسى ورايدان پايدالانىپ، يۋان يۋان شاپاننىڭ قالتاسىنداعى حاۋىپسىزدىك ساندىعىنىڭ كىلتىن الىپ، حاۋىپسىزدىك ساندىعىن اشادى. حاۋىپسىزدىك ساندىعىنا قۇپيا ءنومىر ورناتىلماعاندىعىن بىلەتىندىكتەن، يۋان يۋان حاۋىپسىزدىك ساندىعىن وپ-وڭاي اشادى دا، ىشىندەگى 13 مىڭ يۋان اقشانى الىپ، قوناق ۇيدەن زىتىپ بەرەدى.
باسقالاردىڭ كۇماندانۋىنان ساقتانۋ ءۇشىن، يۋان يۋان ءوزىنىڭ بيىك وكشەلى اياق كيىمىن شەشىپ، شياۋ جاڭنىڭ سۇيرەتپە شاقايىن كيىپ، جاتاعىنا كەلىپ، نارسە-كەرەكتەرىن جيناستىرادى.
كەرەك-جاراقتارى مەن شاپانىن الا سالىپ، دەرەۋ كىرە اۆتوموبيلىن مايلاپ، ءۇرىمجى قالاسىنا بارىپ، اۋىلىنا قايتاتىن ۇشاق بەلەتىن دە الىپ ۇلگىرەدى.
الايدا، يۋان يۋان ءوزىنىڭ دەلو تۋىلىپ بىرنەشە ساعاتتىڭ ىشىندە ساۋان اۋدانىنداعى ساقشىلاردىڭ قولىنا تۇسەتىندىگىن ويلاپ تا كورمەگەن ەدى.
كەزەكتە ساۋان اۋداندىق حالىق پروكۋراتۋرا مەكەمەسى قىلمىس كۇماندىسى يۋان يۋاندى تۇتقىنداۋدى بەكىتتى ءارى ىشكەرىلەي تەكسەرىپ، ۇستىنەن شاعىم ايتۋعا جونەلتىلدى. ال ونى كۇتىپ تۇرعانى زاڭنىڭ قاتاڭ جازاسى عانا.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.