■ ”جۇڭگو چۋاڭ -ي“ 2023 -جىلعى شاۋەشەك قالاسىنىڭ 9 -كەزەكتى شارۋاشىلىق قۇرۋ، جاڭالىق اشۋ جارىسى باستالدى
ءتىلشىمىز داي جياۋمەي حابارلايدى. 5-ايدىڭ 18-كۇنى”جۇڭگو چۋاڭ -ي“2023 -جىلعى شاۋەشەك قالاسىنىڭ 9 -كەزەكتى شارۋاشىلىق قۇرۋ، جاڭالىق اشۋ جارىسىنىڭ”جاڭا داۋىردە جاڭالىق اشىپ، جۇڭگو ارمانىن بىرگە ورىندايىق“ نەگىزگى تاقىرىپتىق جارىسى شاۋەشەك جىبەك جولى جاڭالىق اشۋ، شارۋاشىلىق قۇرۋ بازاسىندا باستالدى.
شاۋەشەك قالالىق ادام كۇشى بايلىعى جانە قوعامدىق قامتاماسىزداندىرۋ مەكەمەسى ۇيىمداستىرعان وسى رەتكى جارىس 4 -ايدا باستالعان، جارىس مازمۇنى نەگىزگى جارىس جانە اۋىل-قىستاقتى گۇلدەندىرۋ ارناۋلى تۇرىندەگى جارىس سياقتى ءتۇرلى سالانى قامتىپ، شاۋەشەك قالاسىنداعى 25 كاسىپورىندى جارىسقا باۋرادى. تولىمدىعىن تەكسەرۋ، مامانداردىڭ باستاپقى ساراپتاۋى، ناق مايداندا تەكسەرۋ سياقتى باسقىشتاردان كەيىن، 13 شارۋاشىلىق قۇرۋ نىسانى شەشۋشى جارىسقا جولداما الدى.
سول كۇنگى قيان-كەسكى باسەكەدە 8 تاڭداۋلى شارۋاشىلىق قۇرۋ نىسانى توپ جارىپ العا شىعىپ، نەگىزگى تاقىرىپتىق جارىستىڭ جانە اۋىل-قىستاقتى گۇلدەندىرۋ ارناۋلى تۇرىندەگى جارىستىڭ 1 -، 2 - جانە 3 - دارەجەلى سيلىعىن ەنشىلەدى.
شينجياڭ تيانرۇي ەگىن، مال شارۋاشىلىق عىلىم -تەحنيكا شەكتى سەرىكتەستىگىنىڭ سۇرلەم جەم ءونىمى نىسانى وسى رەتكى جارىستا نەگىزگى جارىستىڭ 2 -دارەجەلى سيلىعىن يەلەدى. بۇل سەرىكتەستىك 2021 -جىلى قۇرىلعان، مال باعۋ، ءشوپ تۇقىمىن ءوندىرىپ ساتۋ، جەم مانەرلەۋ سياقتى كاسىپتەرمەن شۇعىلدانادى، مۇنىڭ ىشىندە سەرىكتەستىكتىڭ سۇرلەم جەم ونىمدەرى ءوندىرۋ، ۇيرەنۋ، زەرتتەۋ، ساتۋ ءبىر تۇلعالانعان كاسىپ تىزبەگىن قالىپتاستىرعان، جىلدىق ءوندىرىس قۋاتى 20 مىڭ تونناعا جەتەدى.
سەرىكتەستىكتىڭ باستىعى ۋاڭ جيان -ۋي: “جارىستىڭ كاسىپورىنىمىزعا ءوزىن ايگىلەۋ تۇعىرى مەن ۇيرەنۋ ورايىن جاراتىپ بەرگەنىنە ەرەكشە العىس ايتامىن، باسقا كاسىپورىندارمەن پىكىر الماستىرىپ، ءوزارا ۇيرەنۋىمىزگە دە مۇمكىندىك جاراتىلدى. كەلەسى قادامدا شاۋەشەك قالاسىنىڭ جۇگەرى جانە باسقا دا ەگىس داقىلدارى مول بولۋداي باسىمدىعىنان جالعاستى ويداعىداي پايدالانىپ، سۇرلەم جەم نىسانىنا سۇيەنىپ، ەگىس داقىلدارى بايلىعىنان ءتىپتى دە كوپ قوسىمشا قۇن جاراتىپ، تارباعاتايدىڭ اۋىل شارۋاشىلىعىنىڭ جوعارى ساپالى دامۋىنا ۇلەس قوسامىز” دەدى.
شاۋەشەك قالاسى جيافىڭ جەدەل ينفورماتسيا عىلىم -تەحنيكا سەرىكتەستىگى نەگىزگى جارىستىڭ 3 - دارەجەلى سيلىعىن يەلەدى. سەرىكتەستىك جاۋاپتىلارىنىڭ ءبىرى دي مىڭ: ”وسى رەتكى جارىس شارۋاشىلىق قۇرۋشىلارعا تاپتىرماس وراي ازىرلەپ بەردى، جارىستا ماماندار مەن باعالاۋشىلار قۇندى پىكىر ايتتى ءارى كوپتەگەن شارۋاشىلىق قۇرۋشىلارمەن تانىستىق. الدا جالعاستى قۇلشىنىپ، اۋىس-كۇيىستى كۇشەيتىپ، ءوزارا ۇيرەنىپ، بىرگە العا باسامىز“ دەدى.
شاۋەشەك قالالىق ادام كۇشى بايلىعى جانە قوعامدىق قامتاماسىزداندىرۋ مەكەمەسىنىڭ شارۋاشىلىق قۇرۋعا قىزمەت وتەۋ، جەتەكشىلىك ەتۋ ورتالىعىنىڭ ورىنباسار مەڭگەرۋشىسى سەرىك گوناحاي: “جارىس ارقىلى قالىڭ شارۋاشىلىق قۇرۋشىلاردىڭ جاڭالىق اشۋ جانە شارۋاشىلىق قۇرۋ ىنتاسى مەن ومىرشەڭدىك كۇشىن قاۋلاتىپ، شارۋاشىلىق قۇرۋشىلاردىڭ جاڭالىق اشۋ رۋحى مەن شارۋاشىلىق قۇرۋ قابىلەتىن جەتىلدىرىپ، تۇتاس قوعامدا ‘جالپى حالىق شارۋاشىلىق قۇراتىن، كۇللى جۇرت جاڭالىق اشاتىن’ تاماشا راي قالىپتاستىردىق. الدا قالىڭ شارۋاشىلىق قۇرۋشىلاردىڭ جاڭالىق اشۋ تانىمىن ورناتۋىنا، جاڭالىق اشۋ قابىلەتىن جەتىلدىرۋىنە، شارۋاشىلىق قۇرۋ رۋحىن سومداۋىنا بەلسەنە جەتەكشىلىك ەتىپ جانە كومەكتەسىپ، جاڭالىق اشۋدىڭ، شارۋاشىلىق قۇرۋدىڭ تاماشا رايىن قالىپتاستىرىپ، شاۋەشەك قالاسىنىڭ شارۋاشىلىق قۇرۋ ارقىلى جۇمىستانۋدى جەبەۋ قىزمەتىن اناعۇرلىم ويداعىداي ىلگەرىلەتەمىز” دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى