تارباعاتايدىڭ جوعارى ساپالى دامۋىنا نازار
ءتىلشىمىز قۇرمەت مىرزاقان حابارلايدى. 5-ايدىڭ 15-كۇنى شاعانتوعاي اۋدانى شينجياڭ ماقسارى وسى زامانعى عىلىم -تەحنيكا كاسىپ سالاسى باقشاسى قۇرىلىس نىسانىنىڭ جۇمىس مايدانىندا قۇرىلىس ماشينالارى قايشالىسىپ، بارلىق جەردە جۇمىسشىلار قاربالاس جۇمىس ىستەپ، نىسان قۇرىلىسىن بار كۇشپەن جەدەلدەتىپ جاتتى.
بۇل نىسان شاعانتوعاي اۋداندىق ماقسارى زات اينالىمى كاسىپ سالاسى باقشاسىنىڭ (وڭتۇستىك رايون) ىشىنە ورنالاسقان، يەلەگەن جەر اۋدانى 200 مۋ بولىپ، ماقسارى تۇتاس كاسىپ سالاسىن زەرتتەۋ، اشۋ، ءوندىرۋ، ينتەرنەت تيجاراتى، سونداي-اق يمپورت - ەكسپورتتىق قامبادا ساقتاۋ قىزمەت وتەۋى ءبىر تۇلعالانعان عىلىم - تەحنيكالىق كاسىپورىن نىسانى ەسەپتەلەدى ەكەن.
ۇعىسۋعا قاراعاندا، نىسانعا جالپى قوسىلاتىن قارجى 530 ميلليون يۋان بولىپ، 3 مەرزىمگە ءبولىنىپ، باستىسى، شينجياڭ ماقسارى تەحنيكاسىن زەرتتەۋ ورتالىعى، ماقسارى شايى ءوندىرىس جەلىسى، توڭازىتىپ قاۋىزىنان ايىرۋ، مانەرلەۋ ءوندىرىس جەلىسى، ماقسارى جۇڭگوشا دارىمەن تىنىعۋ -كۇتىنۋ ساياحاتى بازاسى قۇرىلىسى، ورگانيكالى ماقسارى بالى ءوندىرىس جەلىسى سياقتىلار سالىنادى ەكەن.
شينجياڭ يۇيحۇڭ بيو عىلىم -تەحنيكا شەكتى سەرىكتەستىگىنىڭ ورىنباسار باس ديرەكتورى يان شين: ”قازىر ءبىرىنشى مەرزىمدىك ءتۇيىندى نىسان ــ ماقسارى عيماراتى سالىنۋدا، مۇنىڭ ىشىندەگى ەڭ باستى ەكى نىسان ــ ماقسارى كورمە سارايى مەن ماقسارى عىلىم-تەحنيكا ورتالىعى، سالىنىپ جاتقان 10 زاۆود ءۇيى بار، مەجەمەن بيىل جىل سوڭىندا پايدالانۋعا بەرىلەدى. قازىر سالىنىپ جاتقان ءبىر شاي ءوندىرىس جەلىسى، ءبىر ماقسارى بالى ءوندىرىس جەلىسى بار. قازىر ماقسارى عيماراتىنىڭ سىرتقى قۇرىلىسى نەگىزىنەن اياقتالدى، ەندى ىشكى بولەگىن اشەكەيلەيمىز، مەجەمەن 8 -ايدىڭ سوڭىنان بۇرىن پايدالانۋعا بەرىلەدى“ دەدى.
بۇل نىسان سالىنىپ بولىپ وندىرىسكە قوسىلعاننان كەيىن، جاڭا سورت، جاڭا تەحنيكا ارقىلى ماقسارىنىڭ ساپاسىن ءبىرشاما زور دارەجەدە جوعارىلاتۋعا بولادى ەكەن. اتالعان كاسىپورىن ماقسارى تالشىعىن، ماقسارى ءدانىن جىنتىكتەي مانەرلەۋ ارقىلى ءونىمنىڭ قوسىمشا قۇنىن ارتتىرادى. جاڭا سورتتى جالپىلاستىرۋ، ساقتاۋ، مانەرلەۋ، ەنەرگيا شىعىنى سياقتى جاقتاعى وزىندىك قۇندى تومەندەتەتىندىكتەن، ماقسارى مانەرلەۋ كاسىپورنىنا كورنەكتى ەكونوميكالىق ونىمدىلىك اكەلەدى ەكەن. نىسان تۇتاس وندىرىسكە قوسىلعاننان كەيىن، مەجەمەن جىلدىق ءونىم قۇنى 6 ميلليارد يۋاننان اسىپ، نىساننىڭ ەكونوميكالىق ونىمدىلىگى كورنەكتى ارتادى ەكەن.
شاعانتوعاي اۋداندىق دامۋ - رەفورمالاۋ كوميتەتى نىسانعا قىزمەت وتەۋ ورتالىعىنىڭ مەڭگەرۋشىسى ما حاي: ”نىسان اتقارىلعاننان كەيىن تىكەلەي ماقسارى قاجەتىن 500 مىڭ مۋ عا دەيىن جەتكىزىپ، ءبىر ميلليون مۋعا دەيىن جەتەكشىلىك ەتىپ، ماقسارى وندىرىسىنە ىقپال جاساپ، شارۋالاردىڭ ماقسارى ەگۋ بەلسەندىلىگىن ءونىمدى جوعارىلاتىپ، شارۋالاردىڭ كىرىستەرىن ۇزدىكسىز ارتتىرۋىن جەبەيدى“ دەدى.
ۇعىسۋعا قاراعاندا، ماقسارى سورتاڭ، قۇنارسىز جەرگە ۇيلەسەتىن، قۇرعاقشىلىققا ءتوزىمدى داقىل بولىپ، كەڭ كولەمدە جالپىلاستىرۋعا بولادى، قاعىر وڭىرلەردەگى جەرلەردىڭ پايدالانىلۋ مولشەرى مەن ەكونوميكالىق ونىمدىلىگىن ارتتىرىپ، سۋ بايلىعىنان جانە ورتاعا تۇسەتىن قىسىم مەن ءوندىرىستىڭ وزىندىك قۇنىن تومەندەتىپ، حيميالىق تىڭايتقىشتىڭ، اۋىل شارۋاشىلىق دارىلەرىنىڭ پايدالانىلۋ مولشەرىن ازايتىپ، سۋ -توپىراقتىڭ لاستانۋىن ازايتۋ، ورتانى قورعاۋ جانە جەردەن باياندى پايدالانۋ جاقتارىندا اسا زور ەكولوگيالىق ونىمدىلىككە يە بولادى ەكەن.
ما حاي: “نىسان قۇرىلىسى ارقىلى جوعارى باستاماعا يە، جوعارى ورەدەگى ماقسارى وسى زامانعى عىلىم -تەحنيكا كاسىپ سالاسى باقشاسىن قۇرىپ، كاسىپ سالاسىنىڭ شوعىرلى ونىمدىلىگىن ساۋلەلەندىرىپ، شينجياڭ تارباعاتاي ءتۇيىندى دامىتۋ، ەسىك اشۋ سىناق رايونى سىندى كەلەلى ساياساتتىق ورايدى مىقتاپ يگەرىپ، دارالىق ەرەكشەلىككە يە ماقسارى تۇتاس كاسىپ سالاسى تىزبەگىنەن ۇلگى كورسەتۋ رايونىن بىرتىندەپ قالىپتاستىرىپ، شاعانتوعاي اۋدانىنىڭ بايلىق باسىمدىعىن شىن مانىندە ەكونوميكالىق باسىمدىققا اينالدىرامىز” دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى