قارت كوڭىلدەرى قايىرىمنان جازباي، مەيىر-سۇيىسپەنشىلىكتەرىمەن ىنتىماقتى جەبەدى

جولدانعان ۋاقىتى : 2023/5/22 11:54:40

□ “مەيىربان انالار” قوعامى التىن ەمىل اۋىلىنىڭ سەنترلى باستاۋىش مەكتەبىندەگى وتباسىندا قيىنشىلىعى بار بالالارعا مەيىر جەتكىزۋدە.

                                                                                                               (سۋرەتتى “مەيىربان انالار” قوعامى قامداعان)


قارت كوڭىلدەرى قايىرىمنان جازباي، مەيىر-سۇيىسپەنشىلىكتەرىمەن ىنتىماقتى جەبەدى

ـــ اۆتونوميالى رايوندىق ۇلتتار ىنتىماعى، العاباسارلىعىنداعى ۇلگىلى كوللەكتيۆ شاعانتوعاي اۋداندىق “مەيىربان انالار” قوعامى جونىندە
 

□ ءتىلشىمىز ۋاڭ گاۋشىڭ 

شاعانتوعاي ــ كوپ ۇلت شوعىرلى قونىستانعان شاعىن اۋدان، كوپ جىلدان بەرى ۇلتتار ىنتىماعى، العا باسارلىعىنداعى ۇلگىلى كوللەكتيۆ پەن جەكەلەر مولىنان شىقتى، اۋداندىق “مەيىربان انالار” قوعامى انە سولاردىڭ ءبىرى.

“مەيىربان انالار” جايلى شاعانتوعاي اۋدانىندا بىلمەيتىن ادام جوق. ولاردىڭ جاستارى ۇلعايىپ قالسا دا،  مەيىرىم شۋاعىن شاشقان ءىس-ارەكەتتەرى كەشكى شاپاقتاي ارايلانىپ، باسقالارعا جىلۋلىق سيلاۋمەن بىرگە، ءوز ومىرلەرىن دە نۇرلاندىرىپ، كەدەيلەردى سۇيەمەلدەپ، قيىنشىلىعى بارلارعا كومەكتەسىپ، ۇلتتار ىنتىماعىنا كۇش ۇستەگەن اسەرلى حيكايانى جالعاستىرۋدا.
 

زەينەتكە شىقسا دا مەيىر جەتكىزۋدەن جازبادى 

شاعانتوعاي اۋداندىق”مەيىربان   انالار“ قوعامىن ــ زەينەتكەر كادر امينا ايتجان 2007 -جىلعى ءبىر رەتكى باس قوسۋدا ورتاعا قويىپ قۇرعان، وسى كۇندە قوعام مۇشەسى باستاپقى 13 ادامنان كوبەيىپ 200 گە تاياعان. باستابىندا قوعام مۇشەلەرى دەرلىكتەي زەينەتكەرلەر بولسا، قازىر مۇشە  قۇرامىندا قالا-اۋىلداعى ءتۇرلى  ساتىنىڭ كادر-بۇقاراسى دا بار ەكەن.

ءدىلزات ادەيقان التىن ەمىل اۋىلى التىن ەمىل قىستاعىنىڭ تۇرعىنى، بيىل 65 جاستا. 2017 -جىلى جولداسى  قايتىس بولعاننان بەرى جالعىز تۇرمىس كەشىرىپ كەلەدى. 2018 -جىلى”مەيىربان انالار“ قوعامىنا مۇشە   بولعان، سودان بەرى جاۋىن -شاشىندا دا، شىلىڭگىر ىستىق، شىڭىلتىر ايازدا دا قاجەت ەتكەن جەردەن قاشاندا تابىلىپ كەلەدى.

ءدىلزات بالا كۇنىنەن كوپ ازاپ تارتقانىن، باسقا بالالاردىڭ دا وزىنە  ۇقساس قيىنشىلىق كورمەۋى ءۇشىن، ولارعا كۇيىنىڭ كەلگەنىنشە  كومەكتەسەتىنىن ايتتى.

بيىل 83 جاستاعى قارت ماۋىتكامال سايىر شاعانتوعاي اۋداندىق 1-ورتا مەكتەپتەن زەينەتكە شىققان وقىتۋشى، ونىڭ ”مەيىربان انالار“ قوعامىنا مۇشە بولۋداعى اۋەلگى دىتتەگەنى  دىلزاتتىكىمەن ۇقساس ەدى.

ماۋىتكامال سايىر اۋرۋشاڭ  بولعانىمەن، باسقالارعا تاباندىلىقپەن كومەكتەسىپ كەلەدى. ءوزى مۇشەلىك قاراجاتىن تولەۋگە بارا الماي قالسا دا، ۇل-قىزدارى ارقىلى بەرىپ جىبەرىپ، “مەيىربان انالار” قوعامىنىڭ ءتۇرلى  قيمىلدارىنا قاشاندا كوڭىل ءبولىپ    وتىرادى.

“مەيىربان انالار” قوعامىنىڭ باس حاتشىسى ايگۇل: “ءدىلزات اپەكەمىز بەن ماۋىتكامال اپەكەمىزدىڭ جاستارى  ەگدەلەپ قالسا دا، كەدەيلەردى  سۇيەمەلدەپ، قيىنشىلىعى بارلارعا     كومەكتەسۋ قىزعىندىلىقتارى زارەدەي سالقىن تارتپادى، ول كىسىلەر ءبىزدىڭ ۇيرەنۋ ۇلگىمىز” دەدى.
 

كەدەيلەردى سۇيەمەلدەپ،  قيىنشىلىعى بارلارعا كومەكتەسىپ،جاۋاپكەرشىلىگىن ايگىلەدى

”مەيىربان انالار“ قوعامى قۇرىلعاننان بەرى التىن ەمىل اۋىلدىق سەنترلى مەكتەپتەگى وتباسىندا قيىنشىلىعى بار   بالالارعا قارجىلاي كومەكتەسىپ كەلەدى، ءار جىلى 10 بالاعا، اربىرىنە كەم دەگەندە 200 يۋاننان بۇگىنگە  دەيىن 15 جىل بويى قارجىلاي  كومەكتەسىپ، جىلۋعا اتاعان جالپى  قارجى 30 مىڭ يۋاننان اسقان.

ءار جىلى”1-ماۋسىم“ بالالار  مەرەكەسىندە”مەيىربان انالار“وقۋ قۇرالدارىن، تۇرمىستىق بۇيىمداردى الا بارىپ، سەنترلى مەكتەپتەگى بالالارمەن بىرگە مەرەكە وتكىزەدى.

سەنترلى مەكتەپ پارتيا ياچەيكاسىنىڭ شۋجيى ۋاڭ گاڭ: “‘مەيىربان انالار’ بالالارعا كومەكتەسىپ قالماستان، ءىس -ارەكەتتەرى ارقىلى وڭ ەنەرگيا تاراتىپ كەلەدى، ءبىز ول كىسىلەردەن  ۇيرەنۋىمىز كەرەك” دەدى.

قازىرگە دەيىن، ”مەيىربان انالار“ قوعامى ءار ۇلت ءالسىز توپتارىنا،     قيىنشىلىعى بار بۇقاراعا جيىنى 650 مىڭ يۋان جىلۋ اتاپ، 240 قيىنشىلىعى بار   وتباسىنا، 565 قيىنشىلىعى بار وقۋشىعا كومەكتەسكەن.

نۇرلان امەن ”مەيىربان انالار“قوعامىنىڭ باستىعى. 2015 -جىلدان   بەرى ول جىل سايىن شاعانتوعاي  اۋداندىق 1-ورتا مەكتەپتەگى وتباسىندا قيىنشىلىعى بار 15 وقۋشىعا قارجىلاي كومەكتەسىپ، اربىرىنە ەڭ تومەن بولعاندا 300 يۋاننان قارجىلاي كومەك كورسەتىپ كەلەدى ءارى  ولاردىڭ تۇرمىسى مەن وقۋىنا دا قارايلاسادى.

سونىمەن بىرگە، ”مەيىربان انالار“ قوعامى جەر سىلكىنىسىنە قارسى اتتانىپ، اپاتتان قۇتقارۋ كەزىندە 10 نەشە رەت جىلۋ اتاعان. ۋىنچۋاندا جەر  سىلكىنگەننەن كەيىن،  قوعام مۇشەلەرىن دەرەۋ ۇيىمداستىرىپ، 8000 يۋان جىلۋ اتاسا، ۋحاندا جاڭا تيىپتى ايدارشا ۆيرۋس وكپە قابىنۋ ىندەتى تاراعان كەزدە 21 مىڭ يۋان جىلۋ اتايدى.

كوپ جىلدان بەرى”مەيىربان انالار“ قوعامى قايرىمدىلىق جانە مەيىر جەتكىزۋ ۇگىت قيمىلدارىنان 232 مايدان رەت وتكىزگەن.
 

ادەبيەت -كوركەمونەر كوڭىلدى نارلەندىرىپ، ىنتىماقتى جەبەدى 

شاعانتوعاي اۋداندىق “مەيىربان انالار” قوعامى باسقالارعا مەيىر جەتكىزىپ، كومەكتەسىپ قانا قويماي، ادەبيەت -كوركەمونەر قيمىلدارى ارقىلى وڭ ەنەرگيا تاراتىپ، جاڭا سالت  ورناتتى. 

2015 -جىلى”مەيىربان انالار“ قوعامى شاعانتوعاي اۋداندىق تاۋ گۇلى حالىقتىق كوركەمونەر ۇيىرمەسىن  قۇردى. مەرەكە ـ مەيرام، دەمالىستاردا جانە ماڭىزدى مەرەكە ـ مەيرامداردا ولار الەۋمەتتىك اۋماق، اۋىل-قىستاق جانە مەكتەپتەرگە بارىپ، وزدەرى  قۇراستىرىپ، وزدەرى ورىنداعان تاقپاق، ءان -ءبي سياقتى ادەبيەت ـ  كوركەمونەر نومىرلەرىمەن جاڭا  ءداۋىردى جىرلاپ، قىزىل گەندى  جالعاستىرىپ، ءار ۇلت بۇقاراسىنىڭ قىزۋ قارسى الۋىنا بولەندى.

 تالاي جىلدان بەرى، تاۋ گۇلى حالىقتىق كوركەمونەر ۇيىرمەسى 200 رەتتەن استام ادەبيەت-كوركەمونەر كونسەرتىنە قاتىناستى.

2019 -جىلى”جاڭا ءداۋىر . جۇڭگو ارمانى“ حالىقارالىق جارىس ۇيىمداستىرۋ كوميسسياسىنىڭ ۇسىنىسى بويىنشا، تاۋ گۇلى حالىقتىق كوركەمونەر ۇيىرمەسى شينجياڭ اتىنان بەيجيڭدە”جاڭا  ءداۋىر . جۇڭگو ارمانى“ مەملەكەتتىك تۇڭعىش كەزەكتى حالىقتىق ءبي بايقاۋىنا قاتىناسىپ،  ۇيعۇر ءبيى «جۇلانى» بيلەپ توپتىق التىن مەدالعان يە بولدى. سول جىلى تاعى دا رەسەيدە وتكىزىلگەن 2 -كەزەكتى شاتتىققا تولى تۇرمىس. چاڭ چيڭتىڭ حالىقارالىق مادەنيەت -كوركەمونەر مەرەكەسى جانە ورتالىق راديو-تەلەۆيزيا باس ستانسياسىندا وتكىزىلگەن ”قارتتار شاتتىعى . مەملەكەتتىك قارتتار حور جارىسىنا“ قاتىناسىپ، ايماقتىڭ مەرەيىن اسىردى. 

شاعانتوعاي اۋدانىنداعى “مەيىربان  انالار” جىلۋ اتاپ، قيىنشىلىعى بارلارعا كومەكتەسىپ، ويىن نومىرلەرىن  دايىنداپ، ۇسىنىسپەن كونسەرت قويىپ، وسكەلەڭ ادامگەرشىلىكتەرىمەن، جالىندى بەينەلەرىمەن ماڭىنداعى ءار ۇلت بۇقاراسىن اسەرلەندىرىپ  كەلەدى.

شاعانتوعاي اۋداندىق ۇلتتار ىنتىماعى، العاباسارلىعىنداعى وزات ورىن قۇرۋ قيمىلىنا باسشىلىق ەتۋ گرۋپپاسى  كەڭسەسىنىڭ جاۋاپتىسى فان شياۋيۇڭ: “‘مەيىربان انالار’ قوعامى ۇلتتار   ىنتىماعىن جەبەيتىن ماڭىزدى حالىقتىق كۇش. الداعى جەردە ولارعا بۇرىنعىداي قولداۋ كورسەتىپ، كوڭىل بولەمىز، سونىمەن بىرگە، ءتىپتى دە كوپ ادامدى ۇلتتار ىنتىماعىن دەن قويا قورعاۋعا جەتەكتەپ، كوپشىلىكتىڭ كۇشىن  ۇيىستىرىپ، ەكونوميكانىڭ، قوعامنىڭ جوعارى ساپالى دامۋىنا ۇلەس قوسامىز” دەدى.




رەداكتورى : ارداق كامالقان قىزى
 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى