جىلدىق ءونىم قۇنى مەجەمەن 500 ميلليون يۋان بولىپ، 200 دەن استام ادامدى جۇمىستاندىرادى ەكەن
تىلشىلەرىمىز ۋاڭ چۇنلين، لي شيا حابارلايدى. 5-ايدىڭ 11-كۇنى جۇڭگو سۋ يگىلىگى، سۋ ەلەكتر 4-قۇرىلىس مەكەمەسى شەكتى سەرىكتەستىگى تارباعاتاي بولىمشە سەرىكتەستىگىنىڭ دىڭگەك مۇنارا، فوتوۆولت تىرەۋىشىن ءوندىرۋ نىسانىنىڭ ءوندىرىس سەحندا ماشينالاردىڭ داۋىسى قۇلاق تۇندىرىپ، جۇمىس باسى بارىنشا قاربالاستىققا ءتۇستى.
ۇعىسۋعا قاراعاندا، جۇڭگو سۋ يگىلىگى، سۋ ەلەكتر 4-قۇرىلىس مەكەمەسى شەكتى سەرىكتەستىگى تارباعاتاي بولىمشە سەرىكتەستىگىنىڭ دىڭگەك مۇنارا، فوتوۆولت تىرەۋىشىن ءوندىرۋ نىسانى 2021-جىلى 10-ايدا شينجياڭ تارباعاتاي ءتۇيىندى دامىتۋ، ەسك اشۋ سىناق رايونىنىڭ الدىمەن دامىتىلاتىن رايونىندا سالىنا باستاعان، نىسانعا جالپى 250 ميلليون يۋان قارجى قوسىلعان، مۇندا نەگىزىنەن دىڭگەك مۇنارا سەحى، مايدالاۋ سەحى، شىرۋدەن ساقتانۋ سەحى، قامبا، وندىرىسكە پايدالاناتىن قوسىمشا ۇيلەر جانە سايكەستى نەگىزدىك قۇرىلعىلار سالىنىپ، قۇرىلىستىڭ جالپى اۋماعى شامامەن 25 مىڭ 640 شارشى مەتر ەكەن.
ۇعىسۋعا قاراعاندا، دىڭگەك مۇنارا، فوتوۆولت تىرەۋىشىن ءوندىرۋ نىسانى سالىنىپ بولعاننان كەيىن، جىلىنا 3 مەگاۆاتتىق جانە ودان جوعارى جەل كۇشى گەنەراتورىنىڭ دىڭگەك مۇناراسىنان 400 داناسىن، كۇن ەنەرگيالى فوتوۆولتتىق ەلەكتر تاراتۋ جابدىعىنىڭ مەتال قۇرىلىمىنان 200 مەگاۆاتتان استامىن، بولات قۇرىلىمىنان 80 مىڭ توننادان استامىن ءوندىرىپ، شينجياڭ ىشىنە جانە ورتا ازياعا بەت العان، جاسىل، تومەن كومىر قىشقىل گازدى، جوعارى دەڭگەيدە وندىرەتىن، جوعارى دەڭگەيدە قىزمەت وتەيتىن ەكولوگيالىق شەڭبەر ەرەكشەلىگىنە يە جاڭا ەنەرگيا كاسىپ سالاسىن دامىتۋعا قاجەتتى جابدىق جاساۋ، ەكسپورت ەتۋ بازاسىن، جاڭا ەنەرگيا كاسىپ سالاسىن دامىتۋ ۇلگىسىندە جاڭالىق اشۋدان ۇلگى كورسەتۋ بازاسىن تۇلعالايدى ەكەن.
دىڭگەك مۇنارا، فوتوۆولت تىرەۋىشىن ءوندىرۋ نىسانى اۋانى لاستامايتىن، تارالۋى كەڭ، باياندى، جالپى مولشەرى زور، يكەمدى بولۋداي ەرەكشەلىككە يە بولىپ، توتەنشە تاماشا قولدانىلۋ بولاشاعى بار. نىساننىڭ سالىنىپ وندىرىسكە قوسىلۋى باقتى وتكەلى شەكارا ساۋداسىنىڭ قارجى قوسۋ ورتاسىن جاقسارتىپ جانە دەڭگەيىن جوعارىلاتىپ، ايماعىمىزداعى قاتىستى كاسىپ سالالارىنىڭ دامۋىن جەبەپ، ءار ۇلت حالقىن شىنايى يگىلىككە كەنەلتەدى ءارى ايماق ەكونوميكاسىنىڭ جوعارى ساپالى دامۋىنا پارمەندى تىرەك ازىرلەيدى.
جۇڭگو سۋ يگىلىگى، سۋ ەلەكتر 4 ـ قۇرىلىس مەكەمەسى شەكتى سەرىكتەستىگى تارباعاتاي بولىمشە سەرىكتەستىگى قۇرىلىس باسقارۋ كەڭسەسىنىڭ ورىنباسار مەڭگەرۋشىسى يۇي چۋۋىننىڭ تانىستىرۋىنشا، دىڭگەك مۇنارا، فوتوۆولت تىرەۋىشىن ءوندىرۋ نىسانى بيىل 4 ـ ايدىڭ اياق شەنىنەن باستاپ رەسمي وندىرىسكە قوسىلعان، نەگىزىنەن دىڭگەك مۇنارا، فوتوۆولت تىرەۋىشى جانە بولات قۇرىلىمدى كوپىر قۇرىلعىلارىن وندىرەتىن بولىپ، بولات قۇرىلىمىنىڭ جىلدىق ورتاشا ءوندىرىس قۋاتى مەجەمەن 80 مىڭ توننادان اسىپ، جىلدىق ءونىم قۇنى 500 ميلليون يۋانعا جەتىپ، 200 دەن استام ادامدى جۇمىستاندىرا الادى ەكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى