تىلشىلەرىمىز ۋاڭ تيڭ، ساي حۋچىڭ حابارلايدى. 4-ايدىڭ 24-كۇنى تارباعاتاي ايماعى اۋىل شارۋاشىلىق قوسىمشا ونىمدەرىن لياۋنيڭعا جەتكىزۋ كەلىسىمىنە شوعىرلى قول قويۋ سالتىن وتكىزدى.
وسى رەتكى شوعىرلى قول قويۋ سالتىن ايماقتىق ساۋدا ىستەرى مەكەمەسى، لياۋنيڭ ولكەسىنىڭ شينجياڭعا كومەكتەسۋ الدىڭعى شەپ قولباسشىلىق شتابىنىڭ ساۋداگەر شاقىرۋعا قىزمەت وتەۋ ورتالىعى ۇيىمداستىرىپ، شينجياڭ تارباعاتاي لياۋنيڭ ساۋدا قوعامىنىڭ سايكەسۋىندە، لياۋنيڭ لياۋجياڭ ساۋدانى دامىتۋ شەكتى سەرىكتەستىگى جاۋاپتى بولىپ وتكىزدى. جالپى 39 ەگىن، مال شارۋاشىلىق ءوندىرىس كاسىپورنى تارباعاتاي ايماعىنىڭ ۇن، ماقسارى مايى، نوقات سياقتى ەرەكشەلىككە يە ونىمدەرىن قامتىعان 50 تۇردەن استام ونىمگە قاتىستى ستراتەگيالىق سەلبەستىك كەلىسىمىنە قول قويىسىپ، كەلىسىم سوماسى 50 ميلليون يۋانعا جەتتى.
تارباعاتاي ايماعى ازيا -ەۆروپا قۇرلىعىنىڭ ورتا بولەگىنە ورنالاسقان. تابيعاتى كوركەم، كليماتى جانعا جايلى، بايلىعى مول، ”استىق قامباسى، ەت قويماسى، ماي كۇبىسى“ دەگەن اتقا يە. لياۋنيڭ ولكەسى شينجياڭعا كومەكتەسۋ قىزمەتىن ورىستەتكەننەن بەرى تەحنيكا ەنگىزىپ، دارىندىلاردى باۋلىپ، قارجى باۋراپ، سورتتى تۇقىم جەتىلدىرىپ، بازاردى كەڭەيتىپ، تيجاراتتى جەبەپ، تارباعاتايدىڭ اۋىل شارۋاشىلىق قوسىمشا ونىمدەرىنىڭ سىرتقا شىعۋىنا زور قولداۋ كورسەتتى. لياۋنيڭ ولكەسىندە شينجياڭعا كومەكتەسۋ زات اينالىمى قامباسىن جانە 100 گە جۋىق ارناۋلى جارمەڭكە ورنى مەن جەلىدەن تىس ساتۋ تۇيىندەرىن قۇرىپ، ەكى جەردىڭ ونىمدەرىن تولايىم ساتۋدى جۇزەگە اسىرىپ، لياۋنيڭ مەن تارباعاتايدىڭ ەرەكشەلىككە يە ونىمدەرىن ساتىپ الۋعا جانە ماركا جاراتۋ سەلبەستىگىن ورناتۋعا مىعىم نەگىز قالادى.
”بۇگىن لياۋنيڭ لياۋجياڭ ساۋدانى دامىتۋ شەكتى سەرىكتەستىگى تارباعاتاي ايماعىنىڭ كاسىپورىندارىمەن كەلىسىم جاساسۋىنداعى ماقسات ــ تارباعاتاي ايماعىنىڭ ايگىلى، ساپالى ونىمدەرىن لياۋنيڭگە جەتكىزىپ، تارباعاتاي ايماعىنىڭ كاسىپ سالاسىن دامىتىپ، تارباعاتاي ايماعىنداعى كاسىپورىنداردىڭ شينجياڭنان شىعۋىنا، لياۋنيڭ بازارىنا بەتالۋىنا كۇش ۇستەۋ بولماق. لياۋنيڭدا 700 نەشە شارشى مەترلىك زەردەلى كورمە زالىمىز بار، تارباعاتايدىڭ ايگىلى، ساپالى ونىمدەرىن كورمەگە قويىپ، ءتىپتى دە كوپ لياۋنيڭدىقتارعا شينجياڭنىڭ ايگىلى، ساپالى ەرەكشە ونىمدەرىن تانىستىرامىز“ دەدى لياۋنيڭ لياۋجياڭ ساۋدانى دامىتۋ شەكتى سەرىكتەستىگىنىڭ باسالقاسى حان يان.
شاۋەشەك قالاسىنداعى جاڭشينشىڭ شەكىلدەۋىكتى قاربىز مانەرلەۋ كاسىپتىك سەلبەستىك كووپەراتيۆىنىڭ جاۋاپتىسى جاڭ شينشىڭ: “وسى رەتكى كەلىسىمگە قويۋ سالتى تارباعاتايدىڭ ايگىلى، ساپالى ەرەكشە ونىمدەرىن لياۋنيڭعا جەتكىزىپ، بۇكىل ەلىمىزگە تانىستىرۋدىڭ ۇتىمدى ورايى بولىپ قالماستان، تا-يۇي ماركالى شەكىلدەۋىك كاسىپ سالاسىن دامىتۋىمىزعا تىڭ وراي جاراتتى” دەدى.
لي يۇڭ، ليۋ شين قاتارلى ايماق باسشىلارى، ايماقتىق پارتكوم ۇگىت ءبولىمى، ايماقتىق ساۋدا ىستەرى مەكەمەسى، ايماقتىق اۋىل شارۋاشىلىعى، اۋىل-قىستاق مەكەمەسى، ايماقتىق اۋىل-قىستاقتى گۇلدەندىرۋ مەكەمەسى، ايماقتىق مال شارۋاشىلىعى-مال شيپاگەرلىگى مەكەمەسى، اۋدان-قالالىق ساۋدا-ونەركاسىپ جانە ينفورماتسيالاندىرۋ مەكەمەسى سياقتى تاراۋلاردىڭ جاۋاپتى جولداستارى كەلىسىمگە قول قويۋ سالتىنا قاتىناستى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى