ىزگىلىك شىراعى

لورسي  ( برازيليا )
 

   بۇل  برازيليادا  تۋىلعان حيكايا.

  نوسەرلى داۋىل ۇدەپ تۇرعان ءبىر ءتۇنى قيىر-شەتتەگى    ءمالىم قىستاقتاعى ءبىر ايەل تولعاتىپ جاتتى؛ ءبىراق ونىڭ جان جارى تۇرمەدە، قاسىندا تەك 5 جاستاعى قارشاداي ۇلى عانا بار ەدى. قيىن-قىستاۋ ساتتە، ايەل امالسىز ساقشىعا تەلەفون سوعادى. قاتتى نوسەردىڭ سالدارىنان لايلى تاسقىن جۇرگەندىكتەن، قۇتقارۋ اۆتوموبيلى مەن قۇتقارۋشى قىزمەتكەرلەر تۇگەلدەي سول توڭىرەكتە ەدى. كەزەكشىلىكتە قالعان ساقشى قىزمەتكەرى امالسىز جەرگىلىكتى قىزمەت وتەۋ قوعامدىق ۇيىمى باستىعىنىڭ ۇيىنە تەلەفون سوعىپ سايكەسۋىن سۇرايدى.

  الگى باستىق قولما-قول ماقۇلدىق بەرەدى ءارى اۆتوكولىگىن جۇرگىزىپ، ايەلدى شيپاحاناعا جەتكىزىپ سالادى. ايەل امان-ساۋ بوسانادى. باستىقتىڭ سوندا بارىپ، اۋىر اياق ايەلدىڭ ۇيىندە قالىپ قويعان ۇلدى مىندەتتى تۇردە الىپ كەلۋ كەرەكتىگى ەسىنە تۇسەدى. سونىمەن قولفونىمەن قوعامدىق   ۇيىمداعى قىزمەت بەلسەندىلىگى ەڭ ناشار ءارى ەڭ سوڭىندا قالىپ قويعان قىزمەتتەسىنە  تەلەفون بەرىپ، بالانى ول ارادان  الىپ شىعۋىن تاپسىرادى.

  الگى «شابان» قىزمەتكەر جەلكەسىنەن تارتىپ سىلبىراپ، زورعا دەگەندە اۆتوكولىگىن جۇرگىزىپ جولعا شىعادى. ول بىرەسە ناشار اۋا رايىن قارعاپ كەيي، بىرەسە ىسقىرا وتىرىپ، ءبىر مۇنشا ۋاقىتتان سوڭ الگى بالانىڭ ۇيىنە زورعا جەتەدى دە بالانى اۆتوكولىگىنە كوتەرىپ شىعارادى.

  قارشاداي ۇل بالا كولىككە شىققان سوڭ، ءوزىن العالى كەلگەن « شابان » قىزمەتكەردەن ەكى كوزىن المايدى. الدەن   ۋاقىتتا وقىس ءتىل قاتىپ:

   - مىرزا، ءسىز «قۇدايسىز» با؟- دەپ سۇرايدى. مۇنداي توسىن سۇراۋدان اڭىرىپ قالعان الگى قىزمەتكەر «بۇل بالا شوشىنىپ، ەس-اقىلىنان اداسىپ قالعان بولىپ جۇرمەسىن» دەپ ويلاپ، اۋزىنداعى ساعىزىن تۇكىرىپ تاستاپ:
 
  - نە  ءۇشىن  بۇلاي دەيسىڭ؟- دەيدى تۇتىعا ءتىل  قاتىپ.

  قارشاداي ۇل بالا:

  - شەشەم ۇيدەن كەتەردە ماعان قورىقپاي ۇيدە بول. مىناداي ساتتە بىزگە تاڭىردەن وزگە ەشكىم دە جاردەم بەرە المايدى  دەگەن بولاتىن، -دەيدى. الگى قىزمەتكەر بالانىڭ بۇل ءسوزىن ەستىگەن سوڭ ۇياتتان ءجۇزى ورتەنەدى، ءبىر قولىمەن بالانىڭ باسىنان سيپاپ، مەيىرلەنە ءتىل قاتادى:

  - مەن قۇداي ەمەسپىن،  دوسىڭمىن!

  ول بۇرىن-سوڭدى وزگەلەردىڭ ءوزىن «قۇداي» دەپ ويلايتىنىن قيالداپ تا كورمەگەن ەدى. ول كەنەتتەن بالانىڭ رياسىز جانارىنان ءوزىنىڭ جۇرەك  تۇكپىرىندەگى ىزگىلىك شىراعى تۇتانعانداي سەزىندى.
 

اۋدارعان - قانات جۇماش ۇلى

 
رەداكتورى : جازيرا قاجىكەن قىزى
 
  تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
  مسالى: «تارباعاتاي اقپارات تورابىنان» الىندى.