□ ءتىلشىمىز سۇڭ جيانلياڭ ەرىكتى ءتىلشى ياڭ شييۋە
ساۋان قالاسى داچۋان اۋىلى شاۋفاڭجۋاڭزى قىستاعىنا بارعانىمىزدا، جولدىڭ ەكى جاعالاۋىنداعى اعاشتاردىڭ بۇرشىك اتىپ، وزگەشە ەرەكشەلىككە يە شارۋالار اۋلاسىنىڭ تازا دا رەتتى ەكەنىن كوردىك... تاياۋ جىلداردان بەرى وزىق اۋىل شارۋاشىلىق تەحنيكالارىن ەنگىزۋ مەن جەردى شوعىرلاندىرىپ باسقارۋدىڭ ارقاسىندا ەگىس جۇمىسىنان قولدارى بوساعان قىستاق تۇرعىندارى ەگىستىك جەردەن ويداعىداي پايدا تۇسىرۋدەن تىس، قالا ماڭىنا ورنالاسقان ابزالدىقتارىنان پايدالانىپ، 2 -، 3 - كاسىپتى دامىتىپ، تۇرمىستارىن شالقىتا ءتۇستى.
شاۋفاڭجۋاڭزى قىستاعىنداعى كىسى قۋانتارلىق وزگەرىستەردى قىستاق تۇرعىندارىنىڭ كوش سوڭىندا سالپاقتاپ جۇرە بەرۋدى قالاماي، قاجىرلى قۇلشىنىس جۇرگىزۋىنەن تىس، اۋقاتتانۋ كوشباسشىسى حى حۇڭتاۋدىڭ دا ەڭبەگىنەن بولە قاراۋعا بولمايدى.
بيىل 50 جاستاعى حى حۇڭتاۋ داشۋە بىتىرگەن سوڭ بۇرىنعى ساۋان قالالىق سۋ يگىلىگى مەكەمەسىندە قىزمەت ىستەگەن، كەيىن داچۋان اۋىلى شاۋفاڭجۋاڭزى قىستاعى پارتيا ياچەيكاسىنىڭ شۋجيى مىندەتىن اتقارادى. 2009 -جىلى حى حۇڭتاۋ بيڭتۋان 7 -شى 129 -تۋاندا وتباسىلىق ەگىس الاڭىن باسقارسا، 2012 -جىلى شاۋفاڭجۋاڭزى قىستاعىنا قايتىپ كەلىپ، سەلبەستىك كووپەراتيۆىن قۇرادى، قازىر ساۋان قالاسى شۋاڭچۋان اۋىل شارۋاشىلىق كاسىپتىك سەلبەستىك كووپەراتيۆىنىڭ القا باستىعى.
حى حۇڭتاۋ: ”129-تۋاندا مىڭ مۋعا جۋىق وتباسىلىق ەگىس الاڭىن باسقاردىم، وندا كوپتەگەن بىلىمدەردى ۇيرەنۋمەن بىرگە، قوماقتى تاجىريبە توپتاپ، جەردى شوعىرلاندىرىپ باسقارۋدىڭ ارتىقشىلىعى مەن پايداسىن تانىپ جەتتىم. بۇرىن قىستاقتاعى كوپتەگەن شارۋالار 10 نەشە مۋ جەرلەرىن باپتاۋمەن ۋاقىتى مەن كۇشتەرىن سارىپ ەتەتىن، سونداعى كىرىستەرى دە ماردىمسىز ەدى، سول ءۇشىن، قىستاققا قايتىپ كەلىپ، سەلبەستىك كووپەراتيۆىن قۇرىپ، جەردى شوعىرلاندىرىپ باسقارىپ، جەردىڭ ونىمدىلىگىن ارتتىرۋ ويىنا كەلدىم“ دەدى.
2012 -جىلى شاۋفاڭجۋاڭزى قىستاعى جەردى اينالىمعا تۇسىرمەكشى بولعانىن ەستىگەن حى حۇڭتاۋ ۇتىمدى وراي كەلگەنىنە كوزى جەتىپ، 129 -تۋانداعى وتباسىلىق ەگىس الاڭىن كوتەرمەگە بەرەدى. قىستاققا قايتقان سوڭ، ول ءوز ويىن بىرنەشە نيەتتەس ادامدارمەن ءبولىسىپ، ورتاق تانىمعا كەلەدى. 2013 -جىلى 1 -ايدا 67 وتباسى مۇشە بولىپ، 2800 مۋ جەردى جارنا رەتىندە قوسقان ساۋان قالالىق شۋاڭچۋان اۋىل شارۋاشىلىق كاسىپتىك سەلبەستىك كووپەراتيۆى رەسمي تىركەلىپ قۇرىلادى. وسىدان باستاپ حى حۇڭتاۋ بار زەيىن -زەردەسىن سەلبەستىك كووپەراتيۆىنىڭ تيجاراتى مەن باسقارۋ جۇمىستارىنا جۇمسايدى.
سەلبەستىك كووپەراتيۆى قۇرىلعان سوڭ، قۇرعاق ەگىپ، از-ازدان تامشىلاتىپ سۋارۋ، تۇقىمدى سۇرىپتاپ ءسىڭىرۋ، تىڭايتقىشتى دا تامشىلاتۋ قۇرىلعىسىمەن ءسىڭىرۋ سياقتى جاڭا ەگىمشىلىك تەحنيكالارىن بىرتىندەپ ەنگىزىپ، باستابىندا كۇمانمەن قاراپ، بوگەت جاساعان، كەيىن سەنىم ارتىپ، قولداۋ كورسەتكەن كووپەراتيۆ مۇشەلەرىنە حى حۇڭتاۋ ناقتى ونىمدىلىك ارقىلى جاۋاپ بەرۋمەن بىرگە، قىستاق تۇرعىندارىنىڭ تانىمىنا تىڭ وزگەرىس ەنگىزدى. سول جىلى شۋاڭچۋان سەلبەستىك كووپەراتيۆى ءار مۋ جەرگە 840 يۋاننان پايدا ءبولىسىن بەرىپ، بىتىراندى ەككەندەردىكىنەن 400 يۋان جوعارىلاتتى.
حى حۇڭتاۋ: “ەگىستىك جەر شارۋالاردىڭ جانى، قانشا ايتقانىمەن، ءبىر ءۇيلى جاننىڭ تۇرمىس -تىرشىلىگى وسى جەرگە قاراپ وتىر، جاڭا تەحنيكانى ەنگىزۋ قيىنداۋ بولعانىمەن، وسى جولمەن جۇرمەسەك، ىلگەرى باسپاعانمەن قويماي، ءتىپتى، كەرى شەگىنەتىن ەدىك، وسىنداي جولمەن جۇرگەندە عانا، جەردىڭ ونىمدىلىگىن ارتتىرىپ، كوپشىلىكتىڭ قالتاسىن قامپايتۋعا بولادى” دەدى.
تالاي جىل تيجارات جۇرگىزۋ ارقىلى شۋاڭچۋان اۋىل شارۋاشىلىق سەلبەستىك كووپەراتيۆى بىرتىندەپ جەردى جارنالىق ۇقىققا اينالدىرىپ، شارۋالار جارناگەر بولعان تيجارات ۇلگىسىن قالىپتاستىرىپ، پايدانى بىرگە بولىسەتىن، قاتەردى بىرگە كوتەرەتىن تىعىز مۇددەلىك قاتىناستاعى مەحانيزم قۇرىپ، ءبىر تۇتاس ەگۋ، ءبىر تۇتاس تەحنيكا قولدانۋ، ءبىر تۇتاس ساتىپ الۋ، ءبىر تۇتاس قوراپتاۋ، ءبىر تۇتاس ماركالاۋ، ءبىر تۇتاس ساتۋ سىندى “التى ءبىر تۇتاس” باسقارۋ مەحانيزمى ارقىلى ماشينامەن تەرىلەتىن ماقتا جانە پاميدوردى كولەمدەندىرىپ ەگۋدى جۇزەگە اسىردى.
ولشەمدەندىرىپ، كەمەلدەندىرىپ، بازارلاندىرىپ، ماشينالاندىرىپ تيجارات جۇرگىزۋ -باسقارۋ ۇلگىسى ارقىلى شۋاڭچۋان اۋىل شارۋاشىلىق سەلبەستىك كووپەراتيۆى ساۋان قالاسىنىڭ جاڭا تەحنيكا، جاڭا سورت، جاڭا ۇلگىنى جالپىلاستىرۋ جانە اۋىل شارۋاشىلىعى بازاسىن قۇرىپ، اۋىل شارۋاشىلىعىن دامىتۋىنا وزىندىك ۇلەسىن قوستى.
حى حۇڭتاۋ: “بىرنەشە جىلدان بەرى سەلبەستىك كووپەراتيۆىمىز جاقسى ناتيجەلەرگە پارتيانىڭ جاقسى ساياساتىنىڭ سۇيەمەلدەۋىنەن تىس، بارلىق كووپەراتيۆ مۇشەلەرىنىڭ جاڭالىق اشۋعا، ىستەۋگە، سىناپ كورۋگە باتىل بولۋىنىڭ ارقاسىندا سونىمەن بىرگە، سەلبەستىك كووپەراتيۆتىڭ تيجارات باسقارۋىنىڭ جاقسى بولۋىنىڭ جانە تەحنيكالىق جەتەكشىلەردىڭ كومەكتەسۋ، قولداۋىنىڭ ارقاسىندا قول جەتكىزىپ وتىر، سەلبەستىك كووپەراتيۆىمىز كەڭىنەن اقىل-پاراسات توپتاپ، ورتاق يگىلىككە كەنەلىپ، بىرگە اۋقاتتانۋدى جۇزەگە اسىرادى” دەدى.
ماشينالانعان ەگىمشىلىكتىڭ كەڭىنەن جالپىلاسۋىنا ىلەسە، شۋاڭچۋان اۋىل شارۋاشىلىق كاسىپتىك سەلبەستىك كووپەراتيۆى تاعى دا ”ەگىستىك جەر + اۋىل شارۋاشىلىق ماشيناسى“ فورماسىنداعى بىرلەسپە كووپەراتيۆىن قۇرىپ، مامانداندىرىلعان، سيفرلانعان جىنتىكتەي باسقارۋ ۇلگىسىن ەنگىزىپ، شارۋالار، سەلبەستىك كووپەراتيۆ، كاسىپورىن ورتاق پايداعا كەنەلەتىن جولدى اشتى. بۇگىنگى كۇندە شۋاڭچۋان اۋىل شارۋاشىلىق كاسىپتىك سەلبەستىك كووپەراتيۆىنىڭ 900 مۇشەسى، 40 مىڭ مۋ جەرى بار بولىپ، ساۋان قالاسىنىڭ داچۋان اۋىلىنداعى، قورقىس قالاشىعىنداعى جانە بورتىنكو مال فەرماسىنداعى 9 قىستاق -دۇيدى قامتيدى.
بۇدان كەيىنگى جوسپارى جونىندە حى حۇڭتاۋ: ”كەزەكتە سەلبەستىك كووپەراتيۆىنىڭ تيجاراتى ورنىقتى ءجۇرىپ جاتىر، ەگىمشىلىك كولەمى حاۋىپ-قاتەرگە توتەپ بەرۋ، كىرىسكە كەپىلدىك ەتۋ جاعىندا سالىستىرمالى تۇردە ورنىقتى كۇيدە، ءبىز قاجەتكە ساي جاڭا تەحنيكا مەن جاڭا ۇستانىمداردى دەر كەزىندە ەنگىزىپ، ساپانى ارتتىرىپ، ونىمدىلىكتى جوعارىلاتۋ جولىمەن جالعاستى جۇرەمىز. سونىمەن بىرگە، سەلبەستىك كووپەراتيۆىنىڭ قولدا بار بايلىعىنان پايدالانىپ، 2 -، 3 -كاسىپتى دە دامىتىپ، كىرىستى ارتتىرۋ ارناسىن ۇزدىكسىز كەڭەيتە تۇسەمىز“ دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى