□ ءتىلشىمىز داي جياۋمەي
بيىل ايماعىمىزدان 12 اكىمشىلىك قىستاق اۆتونوميالى رايوننىڭ 2022 -جىلعى اۋىل - قىستاقتى گۇلدەندىرۋدەن ءتۇيىندى ۇلگى كورسەتەتىن قىستاق بولىپ تاڭدالدى. مۇنىڭ ىشىندە، شاۋەشەك قالاسىنان 2 قىستاق، ءدوربىلجىن اۋدانىنان 2 قىستاق، شاعانتوعاي اۋدانىنان 3 قىستاق، شيحۋ قالاسىنان ءبىر قىستاق، ساۋان قالاسىنان 2 قىستاق، تولى اۋدانىنان ءبىر قىستاق، قوبىقسارى موڭعۇل اۆتونوميالى اۋدانىنان ءبىر قىستاق بار.
ۇلگى كورسەتەتىن قىستاقتار ايماعىمىزداعى اۋىل-قىستاقتاردىڭ بەت -بەينەسىنە تىڭ وزگەرىس اكەلدى.
2021-جىلدان بەرى ايماعىمىز باس شۋجي شي جينپيڭنىڭ اۋىل شارۋاشىلىعى، اۋىل - قىستاق، شارۋالار قىزمەتى جونىندەگى ماڭىزدى بايىمداۋلارىن ىشكەرىلەي دايەكتىلەندىرىپ، ”كاسىپ سالاسى گۇلدەنگەن، ەكولوگياسى قونىستانۋعا جايلى، اۋىل سالتى وركەنيەتتى، جونگە سالۋى ءونىمدى، تۇرمىسى باي -باقۋاتتى بولۋ“ نىسانا تالاپتارىن ارقاۋ ەتىپ، كەدەيلىكتەن ارىلتۋدان قامال الۋ جەتىستىكتەرىن بەكەمدەۋدى، كەڭەيتۋدى اۋىل-قىستاقتى گۇلدەندىرۋمەن ءونىمدى ۇشتاستىرۋدى ۇزدىكسىز ىلگەرىلەتىپ، اۋىل -قىستاقتاردىڭ ءتۇيىندى سالالارداعى رەفورماسىن ۇزدىكسىز تەرەڭدەتىپ، نەگىزگى ساتىنى باسقارۋدا رەفورما جاساۋدى، جاڭالىق اشۋدى بەلسەنە جەبەپ، اۋىل -قىستاقتى باسقارۋ جۇيەسى قۇرىلىسىن كەمەلدەندىرىپ، اۋىل -قىستاقتى گۇلدەندىرۋدى جەبەپ، كورنەكتى ونىمدىلىككە قول جەتكىزدى.
جۋىقتا شاۋەشەك قالاسى ەمىل اۋىلىنىڭ ءوبىسىن قىستاعىنا بارعانىمىزدا، كەڭ جازىققا ورنالاسقان قىستاق اق كورپە جامىلىپ تىنىشتىققا مۇلگىپ جاتىر ەكەن. سىمعا تارتقانداي ءتۇپ -ءتۇزۋ جولدى بويلاپ قىستاققا كىردىك، كوشە -كوشەنىڭ قارى تازالانعان، تازا دا رەتتى جولدىڭ ەكى جاعالاۋىنداعى قاز -قاتار تىزىلگەن ۇيلەر، قىزىل، كوك تۇسپەن اكتەلگەن قورعاندار اپپاق قارمەن جاراسىم تاۋىپ، ايرىقشا كوز تارتادى، كەڭ كوسىلگەن قىستاق ماڭىندا قىس ىزعارى مەن تىرشىلىك تىنىسى قاتار مەنمۇندالايدى.
قىستاق تۇرعىنى تيان گوجىڭنىڭ وتباسىلىق باعىمشىلىق الاڭىندا جۇگەرى شاعى، سابان، جوڭىشقا، قانت قىزىلشاسى، جۇگەرى سياقتىلاردى ارالاستىرىپ جاسالعان”ءنارلى جەممەن“ جەمدەلگەن 140 نەشە سەمىز تۇيە قويۋ دا مول ءسۇت بەرۋدە، تيان گوجىڭنىڭ قۋانىشىندا شەك جوق.
”ءار جىلعى 2 -، 3 -اي تۇيەلەر بوتالايتىن مەزگىل، قازىر 20 تۇيە ساۋىپ وتىرمىز. جىل سايىن شۇبات پەن تۇيە ساتىپ 300 نەشە مىڭ يۋان كىرىس كىرگىزەمىز“ دەدى تيان گوجىڭ.
ءوبىسىن قىستاعىنىڭ ەگىستىك جەرى جوق، مال باعىمشىلىعىن نەگىز ەتەدى، قىستاقتا 852 ەڭبەككۇش بار، مۇنىڭ 424 ى مال باعىمشىلىعىمەن شۇعىلدانادى، قازىر تۇيە باعىمشىلىعى سەلبەستىك كووپەراتيۆىنەن 3 ى، تۇيە باعىمشىلىعى فەرماسىن اشاتىن ءبىر وتباسى بار بولىپ، ماڭايداعى 55 وتباسىن تۇيە باعىمشىلىعىمەن، 118 وتباسىن قوي باعىمشىلىعىمەن، 41 وتباسىن جىلقى باعىمشىلىعىمەن، 150 وتباسىن سيىر باعىمشىلىعىمەن شۇعىلدانىپ كىرىستى ارتتىرۋعا جەتەلەپ، 428 ادامدى باسقا سالاعا ويىستىرىپ جۇمىستاندىرعان. 2021 -جىلى جالپى ءوندىرىس قۇنى 57 ميلليون 782 مىڭ 500 يۋانعا جەتكەن.
سونىمەن بىرگە، ءوبىسىن قىستاعى اۋىل -قىستاقتى گۇلدەندىرۋدەن ۇلگى كورسەتەتىن قىستاق قۇرۋعا بەلسەنە كىرىسكەن. بيىل اۋىل -قىستاقتى گۇلدەندىرۋدەن ۇلگى كورسەتەتىن قىستاق قۇرىلىس نىسانىنان 5 ميلليون يۋان قارجى قولعا كەلتىرىپ، 194 وتباسىنا لاس سۋ ىعىستىرۋ قۇبىر تورابىن كىرگىزىپ بەردى، جۇڭحۋا بىرلەسكەن مال -مۇلىك قامسىزداندىرۋ سەرىكتەستىگىنىڭ لاس سۋ ىعىستىرۋ قۇبىرىن وتباسىلارعا جەتكىزۋ ينجەنەرياسى قاراجاتىنان 380 مىڭ يۋاندى قولعا كەلتىرىپ، بارلىق قىستاق تۇرعىندارىن سۋمەن شاياتىن دارەتحانا سالۋعا جۇمىلدىردى. مۇنان سىرت، قىستاقتى تازالاۋ ارەكەتىن ورىستەتىپ، جول جوندەپ، قورعانداردى اكتەپ، قوقسىقتاردى تازالادى... وسىلايشا، اۋىل -قىستاق قونىس ورتاسىنىڭ ولقىلىقتارىن ۇزدىكسىز تولىقتاپ، زور كۇشپەن رەتتەۋ -جونگە سالۋ ارقىلى قىستاق بەت -بەينەسى شىت جاڭا تۇسكە ەنىپ، قىستاق تۇرعىندارىنىڭ باقىت كورسەتكىشى جوعارىلاي ءتۇستى.
اۆتونوميالى رايوننىڭ 2022 -جىلعى اۋىل-قىستاقتى گۇلدەندىرۋدەن ءتۇيىندى ۇلگى كورسەتەتىن قىستاق قۇرۋىن ىلگەرىلەتۋ بارىسىندا ءدوربىلجىن اۋدانى قالاماڭى اۋىلىنىڭ گانچۋان قىستاعى اۆتونوميالى رايون دارەجەلى اۋىل -قىستاقتى گۇلدەندىرۋدەن ۇلگى كورسەتەتىن قىستاق قۇرۋ تالابى بويىنشا، تۇتاس قىستاقتاعى تۇراقتى قونىستانعان وتباسىلارىنا ءبىر-بىرلەپ ورتا تازالىعىن رەتتەۋ جانە جاسىلداندىرۋ، كورىكتەندىرۋ قىزمەتىن ورىستەتىپ، جەرگىلىكتى جاعدايعا قاراي ەگىنجايلار مەن قونىس ورتاسىن كورىكتەندىردى. 2022 -جىلى گانچۋان قىستاعى اۆتونوميالى رايوننىڭ 2022 -جىلعى اۋىل-قىستاقتى گۇلدەندىرۋدەن ءتۇيىندى ۇلگى كورسەتەتىن قىستاق بولىپ تاڭدالدى.
”قىستاقتاعى پارتيا مۇشەلەرى مەن كادرلار 3’ ون مىڭ‘ قيمىلىن وراي ەتىپ، 103 تۇراقتى قونىستانعان وتباسىلارىنا جاۋاپتى بولىپ، ورتا تازالىعىن رەتتەۋ، ’ءۇش رايوندى‘ ءبولىپ ورنالاستىرۋ، اۋلانى جاڭالاپ، دارەجەسىن جوعارىلاتۋ جانە كوكونىس، جەمىس ورمان ەگىمشىلىگىن دامىتۋ جۇمىستارىن ورىستەتۋىنەن جاۋاپتى بولىپ، جوبالاۋى جاقسى، ورتا تازالىعى جاقسى، ’ءۇش رايونعا‘ ءبولىپ ورنالاستىرۋى جاقسى، كورىكتەندىرۋى، جاسىلداندىرۋى جاقسى، اۋلا شارۋاشىلىعى جاقسى ’بەستە جاقسى‘ اۋلا قۇردى. قازىر كورىكتى اۋلا قۇرىلىسىن ورىستەتۋگە قاتىناسقان شارۋا وتباسى %100 كە جەتتى“ دەدى گانچۋان قىستاعى پارتيا ياچەيكاسىنىڭ شۋجيى حۋاڭپۋ ايجۇن.
بيىل جىلدىڭ اياعىنا دەيىن 12 اكىمشىلىك قىستاق سۋ، ەلەكتر، گاز، جىلۋ جانە وپتيكالىق كابەلمەن جاپپاي قامتۋدى جۇزەگە اسىرىپ، قالا -اۋىل تۇرعىندارىنىڭ ەمدەۋ قامسىزداندىرۋىنا قاتىناسۋ سالىستىرماسى %100 كە، جولدى جارىقتاندىرۋ، اسفالتتاندىرۋ سالىستىرماسى %100 كە جەتىپ، قوقسىقتاردى، لاس سۋدى شوعىرلى ءبىر جايلى ەتۋمەن جاپپاي قامتىپ، باۋ - باقشالانعان كورىنىس تۇيىنىنە اينالعان جاڭا بەت -بەينەسىن قالىپتاستىردى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى