ەرىكتى ءتىلشى ماحمۇت حابارلايدى. التىن كۇزدە شاۋەشەك قالاسى ابدىرا اۋىلى گۇجىباي سولتۇستىك قىستاعىنا بارساڭىز، ۇشى -قيىرىنا كوز جەتكىسىز ساپ -سارى جۇگەرى كەشكى شاپاق استىندا التىنداي جارقىراپ كوزدىڭ جاۋىن الادى.
”بىرنەشە جىلدىڭ الدىندا كەلسەڭىز، مۇنداي اسەردە بولماس ەدىڭىز، ول كەزدە بۇل ارا قاعىر بولىپ، سۋ جەتىسپەيتىن، قىستاق تۇرعىندارى ۇنەمى سۋعا تالاسىپ ارازداسىپ قالاتىن، ەگىنجايلاردىڭ ءتۇسىمى تومەن بولاتىن، ءتىپتى، مۇلدە ءونىم الا الماي قالاتىن كەزىمىزدە بولعان“ دەدى جۋىقتا قىستاق كوميتەتىنىڭ مەڭگەرۋشىسى اقاۋ ءتۇسىپقان.
گۇجىباي سولتۇستىك قىستاعىندا 148 وتباسى 487 ادام بار، قىستاق تۇرعىندارى نەگىزىنەن ءبيداي، جۇگەرى ەگەدى، جەر جاعدايى مەن كليماتتىڭ سەبەبىنەن، جەر كوپ بولسا دا ءونىمى ماردىمسىز بولاتىن، ونىڭ ۇستىنە سۋ تاپشى بولعاندىقتان، قىستاق تۇرعىندارىنىڭ كىرىس ارنالارى دا جالاڭ ەدى.
قىستاق تۇرعىندارىنىڭ اۋقاتتانا الۋ - الماۋىندا پارتيا ياچەيكاسىنا؛ قىستاقتىڭ دامي الۋ - الماۋىندا ”كوشباسشىعا“ قاراۋ كەرەك. پارتيا ياچەيكا القاسىن كۇشەيتىپ، قىستاق كادرلارىنىڭ قابىلەتىن جوعارىلاتۋ ءۇشىن، بيىل 2 -ايدا ايماقتىق پارتكوم پارتيا مەكتەبىنىڭ (ايماقتىق اكىمشىلىك شۋەيۋانى) قىستاقتا تۇراتىن قىزمەت اترەتى قىستاق ”ەكى كوميتەتى“ ءماجىلىسىن، پارتيا مۇشەلەرى ءماجىلىسىن، قىستاق تۇرعىندارى ۋاكىلدەرى ءماجىلىسىن اشىپ، كوپشىلىك قىستاق تۇرعىندارىن اۋقاتتاندىرۋ توڭىرەگىندە بۇكپەسىز تالقى جۇرگىزىپ، اقىلداسا كەلە قول قۋسىرىپ قاراپ وتىرماي، ءوز كۇشتەرىنە سۇيەنىپ، قىستاقتاعى 2000 مۋ ءشول اتىزعا تامشىلاتىپ سۋارۋ قۇرىلعىسىن ورناتۋ ارقىلى قىستاقتاعى 56 وتباسىن يگىلىككە كەنەلدىرۋ بەكىمىنە كەلەدى.
سۋ ۇنەمدەيتىن تامشىلاتىپ سۋارۋ قۇرىلعىسىن ورناتۋ قاراجاتىن قايدان تابامىز دەگەن سۇراققا كەي قىستاق تۇرعىندارى ءوز جۇمىسىمىزدى ءوزىمىز ىستەسەك دەسە؛ كەي قىستاق تۇرعىندارى وزدەرى قارجى توپتاپ، مىندەتتى ەڭبەك ىستەۋ ۇسىنىسىن قويادى. قىستاق تۇرعىندارىنىڭ قىستاق بەت -بەينەسىن جاڭالاۋ بەلسەندىلىگى تاسقىنداپ تۇرعانىن بايقاعان قىستاق كادرلارى ەلەكتر تورىن ورناتۋعا، سۋ سىڭبەيتىن توعان سالۋعا جانە سۋ ساقتاۋ كولشىگىن جاڭالاۋعا 200 نەشە مىڭ يۋان بەرە تۇردى، قىستاق تۇرعىندارى مىندەتتى ەڭبەككە بەلسەنە ات سالىسىپ، شاعىل تاسىپ، توپىراق تىندىرىپ، ىرىقتىلىقپەن جابال جۇمىسقا كىرىسەدى. 3 ايدان استام ۋاقىت تىنباي قۇلشىنۋ ارقىلى بيىل 6 -ايدا وسى ءبىر قاعىر جەرگە سۋ جەتكىزىلەدى.
قىستاق پارتيا ياچەيكاسىنىڭ شۋجيى ەرگەن مەللاتقان: ”جاقىندا سىرت جەردەن قايتىپ كەلگەن ءبىر قىستاق تۇرعىنى تازا دا رەتتى قىستاق ورتاسى مەن جاپ -جاسىل ەگىنجايدان ەرەكشە اسەر العانىن ايتتى“ دەدى.
اقاۋ: ”قازىر قىستاعىمىز كەلەسى حالىق تۇرمىسى نىسانى ـــ قۇبىر سۋىمەن قامتاماسىزداندىرۋ قۇرىلعىسىن اتقارۋدى جوسپارلاپ وتىر، وسىلايشا، قىستاق تۇرعىندارىنىڭ اۋىز سۋ ماسەلەسى مەن اۋلا شارۋاشىلىعىنا پايدالاناتىن سۋ قيىنشىلىعى تۇبەگەيلى شەشىلەدى“ دەدى.
قىستاقتىڭ بولاشاعى جايلى توقتالعاندا: ”وزدەرى قول سالىپ ىستەپ جاڭالاعان قىستاق ورتاسىنىڭ بارعان سايىن كورىكتەنىپ كەلە جاتقانىن كورگەن كوپشىلىكتىڭ قۋانىشىندا شەك جوق. قازىر بارلىعى قىستاقتىڭ ءتىپتى دە كوپ كاسىپ سالاسىن دامىتۋىن كۇتىپ وتىر. سوندا عانا كوپشىلىكتىڭ تۇرمىسى ءتىپتى دە جاقساراتىن بولادى“دەدى قىستاق تۇرعىنى سارسەنقان كەڭىنەن تولعانىپ.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى