شيحۋ قالاسىنداعى كوركى كوز سۇرىندىرەتىن جانجياجۋاڭزى قىستاعى ” ينتەرنەتتە تانىمالى قىستاققا“ اينالدى

جولدانعان ۋاقىتى : 2022/9/8 18:53:41

 ساياحاتشىلار جانجياجۋاڭزى قىستاعىنداعى 100 مۋلىق گۇل تەڭىزىندە .

 

□ ءتىلشىمىز  جاڭ گوحۇي، ەرىكتى  ءتىلشى جيا رۇڭشيا
 
گۇل اشقان مەزگىلدە، شيحۋ قالاسى جيۋجياندىر اۋىلىنداعى 100 مۋلىق گۇل اتىزىندا بوي تالاسا جايقالعان گىساڭ گۇلى، سارعالداق،  كۇرەڭكەي، ۆەربەنا، ايدارگۇل سياقتى ءتۇرلى - ءتۇستى گۇلدەر قۇلپىرا شەشەك اتىپ، كوزدىڭ جاۋىن الادى، ءوپ ەتكەن سامال كوتەرىلسە، گۇل شوقتارى جەلمەن بىرگە بيگە  باسىپ،    تەڭىزشە تولقىپ شىعا كەلەدى.

ءۇرىمجى قالاسىنان كەلگەن ساياحاتشى جياڭ جيڭيىڭ” : دوۋيىننان جيۋجياندىر  اۋىلىنداعى 100 مۋلىق كورىكتى گۇل تەڭىزىن كورىپ، ارنايى اۆتوكولىكپەن جيۋجياندىر  اۋىلىنا گۇل تاماشالاۋعا كەلدىم، كوزدىڭ جاۋىن الاتىن گۇل تەڭىزىن جاقىننان تاماشالاعاندا  جانىڭىزعا وزگەشە ەستەتيكالىق ءلاززات سيلايدى ەكەن، راسىندا ويداعىداي ساپار بولدى، الداعى جەردە وراي بولا قالسا،   وتباسىمداعىلاردى ەرتىپ كەلەمىن“ دەدى.

بيىل جيۋجياندىر اۋىلى جانجياجۋاڭزى قىستاعىنا اۆتونوميالى رايون جاعىنان 3 ـ  توپتاعى اۋىل ـ قىستاق ساياحاتىنداعى ءتۇيىندى قىستاق ـ دۇي اتاعى بەرىلگەن، اۋىل ـ قىستاق ساياحاتىن اناعۇرلىم ويداعىداي دامىتۋ، كورىكتى قىستاق ـ قالاشىق قۇرۋ ءۇشىن، جانجياجۋاڭزى قىستاعى پارتيا ياچەيكاسى بايلىقتان ۇيلەسىمدى پايدالانىپ، 100 مۋلىق گۇل تەڭىزىن قۇرىپ، كوركەم جاراتىلىستىق كورىنىس ارقىلى جەر - جەردەگى ساياحاتشىلاردى باۋراپ، جەرگىلىكتى ورىننىڭ ساياحات كاسىبىنىڭ جەدەل دامۋىن جەبەدى.

جانجياجۋاڭزى قىستاعىنىڭ تۇرعىنى   ما چۇنلەي” : قىستاعىمىز  كورىكتەنە ءتۇستى، ساياحاتشىلار دا كوبەيىپ، شارۋالار شاتتىعى  ساياجايىمنىڭ ساۋداسى كۇسەت بولىپ، كىرىسىم دە ارتتى“ دەدى.

جانجياجۋاڭزى قىستاعى پارتيا ياچەيكاسىنىڭ شۋجيى جوۋ ليانجۇن: ”جۋىق جىلداردان بەرى جانجياجۋاڭزى قىستاعى ورايدى مىقتى يگەرىپ، نەگىزدىك قۇرىلعى قۇرىلىسىن كەمەلدەندىرىپ، ىلگەرىندى ـ كەيىندى ەگىنشىلىك مادەنيەت باقشاسى، 100 مۋلىق گۇل تەڭىزى، شامگۇل اڭعارى سياقتى كورىنىس تۇيىندەرىن قۇرىپ، مادەنيەت ـ ساياحات كاسىبى جەدەل دامىدى“ دەدى.

بيىل جانجياجۋاڭزى قىستاعىنداعى  ەرەكشەلىككە يە شاعىن قالاشىعىنىڭ 1- مەرزىمدىك قۇرىلىس نىسانىنىڭ اياقتاۋى جيۋجياندىر اۋىلىنىڭ مادەنيەت ـ ساياحات  كاسىبىنىڭ جالپى تۇلعالىق دامۋىنا ءونىمدى جەتەكشىلىك ەتىپ، اۋىل ـ قىستاقتىڭ بەت ـ بەينەسىن جاقسارتىپ، قاراستى رايونداعى   بۇقاراعا باقىت جاراتتى.

ۇعىسۋعا قاراعاندا، جانجياجۋاڭزى قىستاعى ەرەكشەلىككە يە شاعىن قالاشىعىنىڭ 1 ـ مەرزىمدىك قۇرىلىس نىسانىنا جالپى ءبىر ميلليون 220 مىڭ يۋان قارجى قوسىلعان، مۇنىڭ ىشىندە اۆتونوميالى رايون جاعىنان ءبىر ميلليون 70 مىڭ يۋان قارجى شىعارىلسا، قىستاقتىڭ ءوزى 150 مىڭ يۋان قارجى توپتاعان. نەگىزىنەن جانجياجۋاڭزى قىستاعىنداعى 500 مەترلىك  نەگىزگى كوشەنى ەگىنشىلىك ەرەكشە كوشەسىنە وزگەرتىپ سالۋمەن بىرگە، ساياحات كورىنىسىنە قاتىستى سايكەستى نەگىزدىك قۇرىلعىلاردى  سالىپ، جۇمىس مەرزىمى 102 كۇن بولعان.

ەرەكشەلىككە يە شاعىن قالاشىقتى ەگىنشىلىك نەگىزدەرى جانە ەگىنشىلىك كورىنىستەرىمەن بەزەندىرگەننەن كەيىن، شارۋالاردىڭ بۇرىنعى ءوندىرىس-تۇرمىس، ەڭبەك مايدانىن قالپىنا كەلتىردى؛ وسى زامانعى ادامداردىڭ ”تابيعاتقا ورالۋ“، ”شىنايى تابيعاتىن ايگىلەۋ “سياقتى ىشكى قاجەتىنە ۇيلەسۋدى باعدار ەتىپ، اۋىل ـ قىستاق اتىز ـ ارىق كورىنىستەرى مەن  ەگىنشىلىك مادەنيەتىن ورگانيكالى توعىستىرىپ، جەر ـ جەردەگى ساياحاتشىلاردىڭ جيۋجياندىر اۋىلىنا كەلىپ، كورىكتى اۋىل ـ قىستاقتى ساياحاتتاۋىنا، جاراتىلىستىق كورىنىستەردى تاماشالاۋىنا، ەرەكشەلىككە يە ءدامدى تاعامداردان ءدام تاتۋىنا، شارۋالاردىڭ شاتتىعىن سەزىنۋىنە مۇمكىندىك جاسادى ...

جانجياجۋاڭزى قىستاعىنىڭ تۇرعىنى  مان شينحۋا” : قازىر پارتيانىڭ ساياساتى وتە جاقسى، اتا مەكەنىمىزدى باۋ-باقشاداي ەتىپ ساندەدى، قاراعان سايىن كوڭىلدەنىپ تۇراسىڭ. الداعى جەردە قىستاق قۇرىلىسىنا ىرىقتىلىقپەن ات سالىسىپ، ەسىك الدىنداعى ءۇش رايوندى  مونتازداي ەتىپ تازالاپ، اۋلانىڭ ورتا تازالىعىن ويداعىداي ساقتاپ، اۋىل ـ قىستاق قۇرىلىسىنا ۇلەس قوسامىن“ دەدى.

ەگىنشىلىك مادەنيەتىن ونان ارى  ساۋلەلەندىرۋ ءۇشىن، جيۋجياندىر اۋىلى ەگىنشىلىك مادەنيەتىن اۋىل ـ قىستاق  قۇرىلىسىنىڭ نەگىزگى فاكتورى ەتىپ،  ەگىنشىلىك مەرەكە ساۋىعى ويىن قويۋ اترەتىن ۇيىمداستىرىپ، وزگەشە ويىن - ساۋىق  فورماسىمەن اناعۇرلىم كوپ ساياحاتشىنى  ساياحاتتاۋعا باۋرادى.

قازىر جيۋجياندىر اۋىلى ەگىنشىلىك مەرەكە ساۋىعى اترەتىندە قاراستى رايونداعى بۇقارادان قۇرالعان  100 گە جۋىق ادام بار. ەگىنشىلىك مەرەكە ساۋىعى اترەتىنىڭ كيىم - كەشەگى، ونەر كورسەتۋ فورماسى الۋان ءتۇرلى، ولار ءوز ىشىنەن بارابان ءبيى، ايداعار ءبيى، ارىستان   ويناتۋ، بەل بارابان، ياڭگى ءبيى، ەگىنشىلىك قۇرال - جابدىقتارىن كورمەگە قويۋ اترەتىنە  بولىنگەن، ۇنەمى جانجياجۋاڭزى قىستاق  تۇرعىندار كوميتەتىنىڭ اۋلاسىندا ويىن قويىپ تۇرادى.

ەگىنشىلىك مەرەكە ساۋىعى اترەتى  شارۋالاردىڭ ءوندىرىس، تۇرمىسىندا پايدالانىلاتىن مالعا، وندىرىسكە ىستەتكەن  قۇرال - جابدىقتاردى ساحناعا شىعارىپ،  شارۋالاردىڭ ءوندىرىس بارىسىنداعى ءشوپ وتاۋ، جەر قازۋ، قىرمان ۇشىرۋ، داعار كوتەرۋ سياقتى ەگىس جۇمىستارىن ورىنداۋ فورماسىمەن قالىڭ ەڭبەكشىلەردىڭ ەڭبەكشىل، قايسار،  جاپا - ماشاقاتتان، شارشاپ - شالدىعۋدان قورىقپايتىن كۇرەسشەڭدىك رۋحىن بەينەلەيدى.

جۋىق جىلداردان بەرى جانجياجۋاڭزى  قىستاعى اۋىل ـ قىستاقتى گۇلدەندىرۋدى وراي ەتىپ، باتىلدىقپەن رەفورما جاساپ، جاڭالىق اشىپ، كاسىپ سالاسى گۇلدەنگەن، ەكولوگياسى كوركەم، قونىستانۋعا جايلى، اۋىل سالتى  وركەنيەتتى، جونگە سالۋى ءونىمدى، تۇرمىسى   باي - باقۋاتتى كورىكتى اۋىل ـ قىستاق قۇرۋعا كۇش سالدى. بايلىق ەرەكشەلىگىن تياناق ەتىپ، ەگىنشىلىك مادەنيەتىن كۇش سالا  دامىتىپ، جالعاستىرىپ، كورىكتى اۋىلعا دەگەن ساعىنىشتى باساتىن ورىن قۇرۋدى جۇزەگە  اسىرىپ، جوعارى دارەجەلى ورىنداردىڭ 3 ميلليون 500 مىڭ يۋان قارجىسىن بەلسەنە قولعا كەلتىرۋ ارقىلى ەگىنشىلىك مادەنيەت  باقشاسىنىڭ قىزمەت وتەۋ فۋنكتسياسىن  ۇزدىكسىز قالىپتاستىردى جانە كەمەلدەندىردى.

قازىر جانجياجۋاڭزى قىستاعىنداعى ەگىنشىلىك مادەنيەت باقشاسى ىلگەرىندى ـ كەيىندى ءوندىرىس  قۇرال -جابدىقتارى زالى، اۋىل شارۋاشىلىق ىستەرى زالى، بۇقارالىق  اقىل ـ پاراسات زالى، ۇلتتار ىنتىماعى ءتالىم -تاربيە زالى سياقتىلاردى قۇرىپ، الىس ـ جاقىنعا اتى تانىمالى قىزىل تاربيەنىڭ، وتانشىلدىق  تاربيەنىڭ، ەگىنشىلىك مادەنيەت تاربيەسىنىڭ جاڭا داۋىردەگى وركەنيەتتى امالياتتا ايگىلەۋ تۇيىنىنە اينالدى.

سونىمەن بىرگە، جانجياجۋاڭزى قىستاعى اكىمشىلىك، ادىليا، حالىق اراسىنداعى داۋ ـ شارلاردى جاراستىرۋ ورتالىعىن قۇرىپ،  دەموكراتيا -زاڭمەن جونگە سالۋ دەڭگەيىن  جوعارىلاتتى. قىسقا عانا بىرنەشە جىلدا جانجياجۋاڭزى قىستاعى كوركەم بەينەگە ەنىپ، قىستاق تۇرعىندارىنىڭ حاۋىپسىزدىك سەزىمى مەن رازىلىق دارەجەسى بارىنشا جوعارىلاپ، قىستاق تۇرعىندارىنىڭ قاتىناسى جاراسىمدى، تاتۋ ـ ءتاتتى بولىپ، وركەنيەتتى جاڭا سالت ورناتىپ، ىلگەرىندى ـ كەيىندى مەملەكەتتىك وركەنيەتتى قىستاق -دۇي، اۆتونوميالى  رايوندىق وزات نەگىزگى ساتى پارتيا ۇيىمى  بولىپ باعالاندى. 2021  ـ جىلى 10 ـ ايدا  2 ـ توپتاعى مەملەكەتتىك اۋىل ـ قىستاقتى جونگە سالۋدان ۇلگى   كورسەتەتىن قىستاق -  قالاشىقتاردىڭ ەسىمدىگى جاريالاندى، وسى  ەسىمدىكتە جانجياجۋاڭزى قىستاعىنىڭ اتى دا بار ەدى.






رەداكتورى : ارداق كامالقان قىزى
 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى