ەرىكتى تىلشىلەر تاۋ جياڭحۋا، ليۋ تيڭتيڭ حابارلايدى. قازىر دۇمبە ءبيدايدىڭ ءدان الاتىن، جازدىق ءبيدايدىڭ باس جاراتىن مەزگىلى بولعاندىقتان، ەگىنجاي باپتاۋ - باسقارۋدىڭ شەشۋشى كەزەڭى سانالادى. ءدوربىلجىن اۋدانىندا جوعارى ولشەمدى ەگىنجاي قۇرىلىسىنىڭ جۇرگىزىلۋى مەن سۋ ۇنەمدەيتىن تامشىلاتىپ سۋارۋ قۇرىلعىسىنىڭ ورناتىلۋى ءبيدايدىڭ دەر كەزىندە سۋارىلۋىنا مۇمكىندىك جاراتۋمەن بىرگە، سۋ بايلىعىن ەڭ جوعارى شەكتە قورعاپ، سۋدى ۇنەمدەپ، استىقتان مول ءونىم الۋدى قامتاماسىزداندىرۋعا عىلمي تىرەك ازىرلەدى.
بيىل استىقتى مولىنان ەگۋ، جاقسى استىق ەگۋ ۇندەۋىنە ءۇن قوسقان ءدوربىلجىن اۋدانى كوشبيكە سورتتى تۇقىم الاڭى كوشبيكە قىستاعى پارتيا ياچەيكاسىنىڭ شۋجيى جاڭ يوۋ -ي باستاماشىلدىقپەن 800 نەشە مۋ جەرگە دۇمبە ءبيداي ەككەن. دەر كەزىندە سۋارىلىپ، ۇيلەسىمدى باپتالعاندىقتان، ءبيداي ويداعىداي ءوسىپ كەلەدى.
”قازىرگە دەيىن ءبيداي 4 رەت سۋارىلدى، ءوسىپ - جەتىلۋى كوڭىل توعايتادى. قازىرگى ءوسۋ جاعدايىنا قاراعاندا، مۋ باسىنان مەجەمەن 500 كيلوگرام ءونىم الۋعا بولادى“ دەدى جاڭ يوۋ -ي.
ءبيداي اتىزىنا تامشىلاتىپ سۋارۋ قۇرىلعىسى ورناتىلعان، جاڭ يوۋ - ي ساۋساعىن قيمىلداتىپ كلاپاندى اشسا بولعانى سۋ مەن تىڭايتقىش ءبيداي تامىرىنا بىردەن جەتىپ، ءبىر تامشى سۋ دا ىسىراپ بولمايدى.
جاڭ يوۋ -ي: ”تامشىلاتىپ سۋارۋ وتە قولايلى، بيىل جىڭىشكە كامەردى تىعىز جاتقىزدىق. سۋى مول، سۋارۋعا وتە قولايلى بولدى“ دەدى.
ءدوربىلجىن اۋداندىق سۋ يگىلىگى مەكەمەسى ەگىس داقىلدارىن سۋارۋ بارىسىندا سۋدان پايدالانۋ مەن سۋدى ۇنەمدەۋگە بىردەي ءمان بەرىپ، استىق داقىلدارىن سۋارۋدى الدىمەن قامتاماسىزداندىرىپ، ءبيدايدان مول ءونىم الۋعا كەپىلدىك ەتتى.
ءدوربىلجىن اۋداندىق سۋ يگىلىگى مەكەمەسى سولتۇستىك سۋارۋ ءوڭىرىنىڭ باس ۇلەستىرۋشىسى چىن جۇن: ”ەگىس داقىلدارىن سۋارۋ قاجەتىن قاناعاتتاندىرۋعا كەپىلدىك ەتۋمەن بىرگە، جەر استى سۋ بايلىعىن قورعاۋ پرينسيبىنە نەگىزدەلە وتىرىپ، اۋەلى، جەر ۇستىندە بار سۋدى ىستەتەمىز، تەك جەر ءۇستى سۋى جەتىسپەگەن جاعدايدا ماشينالى قۇدىق ارقىلى جەر استى سۋىمەن سۋارامىز. قازىرگە دەيىن دۇمبە ءبيدايعا 4 تە 5 رەت، جازدىق ءبيدايعا 3 رەت سۋ قويىلدى، ءبيدايدىڭ ءوسۋى جاقسى، شارۋالاردىڭ مول ءونىم الۋىنان ءۇمىت زور“ دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى