ــــ ساۋان قالاسى ورمان الاڭى الەۋمەتتىك اۋماعىنىڭ كادرى الميرا توقتار جونىندە
□ ءتىلشىمىز ۋاڭ گاۋشىڭ
5 -ايدا ساۋان قالاسى گۇلمەن كومكەرىلىپ، جاسىل جەلەك جامىلىپ، الىپ تيانشاننىڭ اق باس شىڭىمەن وزگەشە جاراسىم تاۋىپ، ءتىپتى دە كوركەم كورىنەدى.
2015 ـ جىلعا قايىرىلا قاراساق، ساۋاندا جاڭادان قۇرىلعان ورمان الاڭى الەۋمەتتىك اۋماعىنداعى ءبىرىنشى توپتا الەۋمەتتىك اۋماققا تۇسكەن كادر ەسكە ورالادى. مەيلى بوران -شاشىن، قاقاعان اياز، شىلىڭگىر ىستىق بولسىن، ءاربىر عيماراتتا ونىڭ ەڭبەك ءىزى قالدى؛ ال تۇرعىنداردىڭ جۇرگىندە مەيىربان بەينەسى ەستەن كەتپەستەي جاتتالدى. ول الەۋمەتتىك اۋماق تۇرعىندارىنىڭ جاناشىر جاقىنى، اقىلىنا كوركى ساي الميرا توقتار ەدى.
كوكتەم شۋاعىنداي مەيىر توكتى
2015 -جىلى الميرا الەۋمەتتىك اۋماققا بارىپ قىزمەت ىستەگەندە ول جاۋاپتى بولعان 5 تۇرعىندار عيماراتىندا حانزۋ، قازاق، ۇيعۇر، حۇيزۋ، ورىس سياقتى 5 ۇلتتان قۇرالعان 356 تۇرعىن تۇراتىن. مۇنىڭ ىشىندە، ءبىر الەۋمەتتىك مايعا بەرۋ عيماراتى بار بولىپ، 96 تۇرعىن قونىستانعان، بارلىعى ءالسىز توپقا جاتاتىن ەدى.
الميرا: ”تۇڭعىش رەت الەۋمەتتىك مايعا بەرۋ عيماراتىنا بارىپ، 2 -كورپۋستاعى 202 -ءۇيدىڭ ەسىگىن قاققانىمدا ۋمۋ تاياققا سۇيەنىپ، ەسىك اشتى“ دەدى.
70 جاستاعى وسى حۇيزۋ قاريا جالعىز ءوزى تۇراتىن ەدى. اڭگىمەلەسكەندە ۋمۋدىڭ جالعىزسىراعان جانارى الميرانىڭ جۇرەگىن ەلجىرەتىپ جىبەردى. ول سول ساتتەن باستاپ ۋمۋعا جاقسى قارايلاسۋعا بەل بايلايدى.
الميرا ۋمۋعا ۇنەمى امانداسا بارىپ، اڭگىمەلەسۋدەن سىرت، كۇرىش، ۇن، ازىقتىق ماي سياقتى تۇرمىستىق بۇيىمدار مەن جۇرەك اۋرۋىنىڭ، جوعارى قان قىسىمى اۋرۋىنىڭ دارىلەرىن ساتىپ الىپ اپارىپ بەرەتىن ەدى. الەۋمەتتىك اۋماقتا كومەكتەسۋ، سۇيەمەلدەۋ قىزمەتى ورىستەتىلسە، ول ەڭ الدىمەن ۋمۋدى يگىلىكتەندىرۋدى ويلايدى.
ىندەتتەن ساقتانۋ -تىزگىندەۋ مەزگىلىندە الميرا الەۋمەتتىك اۋماقتا جاتىپ قىزمەت ىستەيدى، الايدا قانشا قاربالاس بولىپ، شارشاپ -شالدىقسادا ۋمۋعا ۋاعىندا تاماق جەتكىزىپ بەرىپ تۇردى. ءوزىنىڭ قىزمەتتەن قولى بوساماي قالعاندا قىزمەتتەستەرىنە ۋمۋعا تاماق اپارىپ بەرۋدى تاپسىرادى. سول كەزدە ۋمۋدىڭ دەنساۋلىق جاعدايى قاتتى ناشارلاي تۇسكەن ەدى.
ۋمۋدىڭ دۇنيەدەن وتكەنىن ەستىگەندە الميرا نەشە كۇن كوز جاسىن كولدەتتى. سەبەبى ول ۋمۋدى الدەقاشان ءوزىنىڭ جاناشىر جاقىنىنا بالاپ، باۋىر باسىپ قالعان ەدى.
ۋمۋ كوزىنىڭ تىرىسىندە ۇنەمى الەۋمەتتىك اۋماق كادرلارىنا: “بالا سۇيە الماعانىممەن، تاعدىر ماعان الميرا ەسىمدى قازاق قىز سيلادى” دەيتىن جۇزىنەن باقىت كۇلكىسى ەسىپ.
كۇن شۇعىلاسىنان ءنار العان سول ءبىر شوق گۇل زور ءۇمىت سيلادى
2014 -جىلى ايگۇل زيادان جۇبايىمەن اجىراسقاننان كەيىن، 7 جاستاعى ۇلىن ەرتىپ، الەۋمەتتىك مايعا بەرىلەتىن ۇيگە كوشىپ كىرەدى. قولىندا پالەندەي ونەرى جوق ول ۋاقىتتىق جۇمىس ىستەپ، ءۇپى -ءتاپى تۇرمىس كەشىرۋگە ءماجبۇر بولادى.
2019 -جىلى ايگۇلدىڭ 6 -جىلدىقتا وقيتىن ۇلى قانتتى نەسەپ اۋرۋىنا شالدىعىپ، اي سايىن ينسۋليننىڭ وزىنە 900 يۋان جۇمساپ وتىرادى، وسى ءبىر مەزەتتە ايگۇل سۇيەنىشسىز قالعانداي ەرەكشە تورىعادى.
الميرا بۇل جاعدايدان حابار تاپقاننان كەيىن، وعان دەرەۋ تەلەفون شالىپ، ونىڭ كوڭىلىن ورنىقتىرادى. ايگۇل تاعدىردىڭ سالعانىنا مويىنسال بولعانىمەن، ونىڭ تۇرمىس قيىنشىلىعى ءتىپتى دە اۋىرلاي تۇسەتىنى انىق ەدى.
2020 -جىلى الميرا ءوتىنىش ەتىپ، ايگۇل مەن ونىڭ ۇلىنا اي سايىن 1000 يۋانعا جۋىق ەڭ تومەنگى تۇرمىستى قامتاماسىزداندىرۋ قاراجاتىن الىپ بەرۋمەن بىرگە، قوعامنىڭ ءار سالاسىنداعى مەيىربان جاندارمەن بەلسەنە بايلانىس جاساپ، وسى ءبىر جالعىز باس قالقالى وتباسىنا كومەكتەسىپ، ولارعا قوعام سىندى ۇلى شاڭىراقتىڭ مەيىرىن سەزىندىردى.
سونىمەن بىرگە، الميرا الەۋمەتتىك اۋماققا ايگۇلگە تۇراقتى قىزمەت تاۋىپ بەرىپ، كىرىسىن ورنىقتىرىپ، بالانىڭ ءدارىسى مەن تۇرمىستىق بۇيىمداردى ساتىپ الۋعا كەتەتىن قاراجاتىن قامتاماسىزداندىرۋ جونىندە ۇسىنىس بەرەدى.
2022 -جىلى 3 -ايدا الەۋمەتتىك اۋماقتىڭ كومەگىندە ايگۇل ساۋان قالاسىنداعى ي -فاڭتيان قوجالىق قىزمەت وتەۋ شەكتى سەرىكتەستىگىنە تازالىقشى بولىپ جۇمىسقا تۇرىپ، ايىنا 1800 يۋان ەڭبەكاقى الادى.
5 -ايدىڭ 20 -كۇنى الميرامەن ىلەسىپ، ايگۇلدىڭ ۇيىنە باردىق. ەسىك اشىلا سالىسىمەن ايگۇل الميرانى باس سالىپ قۇشاقتاپ الدى، ونىڭ الميراعا قاراعان جانارىنان تەرەڭ سۇيىسپەنشىلىك پەن شەكسىز مەيىر بايقالدى، سول ساتتە ونىڭ جۇزىنە قۋانىش كۇلكىسى ءۇيىرىلدى.
تالاي جىلدان بەرى الميرا قىزمەتتەستەرىنىڭ نازارىندا جاقسى اپەكە -ءسىڭلى بولسا، تۇرعىنداردىڭ كوڭىلىندە جاقسى كادر بولىپ كەلەدى. الايدا، ول ۇنەمى ءوزىن -ءوزى تولىمدى انا ەمەسپىن دەپ كىنالاپ جۇرەدى.
جارىق ساۋلە كەمەنىڭ باعىتىن نۇرلاندىرادى، ءبىر تامشى سۋ كۇننىڭ شۇلەن شۇعىلاسىن شاعىلىستىرادى، ءبىر شوق گۇل كوكتەمنىڭ ءسانىن كەلتىرەدى. الميرا انە سول جارق ەتكەن ساۋلەدەي، ءبىر تامشى سۋداي، ءبىر شوق گۇلدەي، ءتىپتى، ءبىر تال بالاۋىز شامداي ءۇن -ءتۇنسىز ۇلەس قوسىپ، جاستىق كوكتەمىن قالتقىسىز ارناۋدا.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى