ءتىلشىمىز جاڭ پەيچي حابارلايدى. اۆتوكولىك بالونىنىڭ جەل قىسىمىن تەكسەرۋ، موتوردىڭ داۋىسىن تىڭداپ كورۋ، اۆتوموبيلدىڭ ارتقى جاقتى باقىلاۋ ايناسىن لايىقتى تەڭشەۋ... مىنە، بۇلار شاۋەشەك قالالىق الەۋمەتتىك كوشە اۆتوبۋزدان قىزمەت وتەۋ شەكتى سەرىكتەستىگىنىڭ شوفەرى جوۋ ليانۋيدىڭ ءار كۇنى جولعا شىعاردىڭ الدىندا ىستەيتىن ءىسى ەدى.
ساقاداي دايىندالىپ، تاڭەرتەڭگى ساعات 8 دە جوۋ ليانۋي ءدال ۋاعىندا اۆتوبۋزدى وتالدىرىپ جولعا شىعادى. ونىڭ اۆتوبۋزى 1 -جولدا قاتىنايدى، شاۋەشەك قالاسىندا بەكەت سانى ەڭ كوپ جول بولىگى بولىپ، شوفەرلاردىڭ تەحنيكاسى مەن توزىمدىلىگى جونىنەن ۇلكەن سىن ەدى.
قاتىناۋ بارىسىندا جوۋ ليانۋي نازارىن بارىنشا شوعىرلاندىرىپ، باستان -اياق “سابىرلى بولۋ” پرينسيبىندە تاباندى بولدى. “جولاۋشىلاردى حاۋىپسىز جەتكىزۋ مەنىڭ جاۋاپكەرشىلىگىم، جولاۋشى تولى اۆتوبۋزدى استە، قاتەرلى جۇرگىزۋگە بولمايدى”. ول بۇل پرينسيبىندە باستان -اياق تاباندى بولعاندىقتان، وسى كاسىپپەن اينالىسقاننان بەرى ەشقانداي قاتىناس شىرعالاڭى تۋىلماۋ، قاتىناس قاعيداسىنا قايشىلىق جاساماۋ، قىزمەت وتەۋدە ەشقانداي ارىز - شاعىم تۋىلماۋ سىندى رەكوردتى ساقتادى.
جوۋ ليانۋيدىڭ 41 جىلدىق شوفەرلىك ستاجى بار. 1982 -جىلى اسكەري قوسىنعا قاتىناسىپ، اۋە ارمياسىنىڭ ارتقى شەپ اسكەرى بولىپ، زات تاسۋعا جاۋاپتى بولعان. ”ول كەزدەردە قانداي اۆتوكولىك بولسادا جۇرگىزە بەرەتىنمىن، ونىڭ ۇستىنە، ءتۇرلى اۆتوكولىكتى سىناپ كورۋدى ەرەكشە ۇناتاتىنمىن“ دەدى ول.
4 جىلدان كەيىن جوۋ ليانۋي اسكەري قوسىننان شەگىنىسىمەن شاۋەشەك قالالىق الەۋمەتتىك كوشە اۆتوبۋزدان قىزمەت وتەۋ شەكتى سەرىكتەستىگىنە شوفەر بولىپ قابىلدانىپ، 37 جىل وسى ارادا قىزمەت ىستەدى. 37 جىلدا جوۋ ليانۋي الەۋمەتتىك كوشە اۆتوبۋزدىڭ قاعاز بەلەت كەسۋ، اقشانى ساندىققا سالۋدان، قازىرگى كارتچكامەن تولەۋ سياقتى دامۋشىلىقتارىن باستان وتكەردى. اۆتوبۋز تالاي جاڭالانعانىمەن، ونىڭ بۇل قىزمەتكە بولعان قىزعىندىلىعى تيتتەي دە وزگەرگەن ەمەس.
جوۋ ليانۋي ءار كۇنى 9 دا 13 ساعات اۆتوبۋزدا بولادى، بوس ۋاقىتىندا كىتاپ وقىپ، اۆتوكولىكتىڭ اينالىم جۇيەسى مەن كىناراتتاردى رەمونتتاۋ بىلىمدەرىن ۇيرەنەدى. قىزمەتتەستەرىنىڭ اۆتوبۋزىندا كىنارات بايقالسا بولعانى جۋ ليانۋيدى ىزدەيدى ەكەن.
“جوۋ ۇستازدىڭ قۇلاعى وتە ساق، اۆتوبۋزىمىزدا كىنارات بايقالا قالسا بولعانى وعان تىڭداتامىز، جوۋ ليانۋي قىزمەتتى وتە مۇقياتتىلىقپەن، جاۋاپكەرشىلىكپەن ىستەيدى، ادەتتە باسقالارعا پوزيتسياسى دا وتە جاقسى، كەزەك الماستىرۋ، ورنىنا ىستەۋ سياقتىلاردان باس تارتپايدى” دەدى قىزمەتتەسى شيۇڭ بين.
قىزمەت قاجەتىمەن جوۋ ليانۋي مەرەكە - دەمالىستاردا دەرلىكتەي دەم الا المايدى، وتباسىنداعىلارىنىڭ قاسىندا كوپ ۋاقىت بولا المايدى.”وتباسىمداعىلارعا قارىزدار سياقتى سەزىنەمىن، ءبىراق الەۋمەتتىك كوشە اۆتوبۋزىنىڭ شوفەرى بولعاندىعىم ءۇشىن، ءسوزسىز، جاۋاپكەرشىلىگىمدى ادا ەتۋىم كەرەك“ دەدى جوۋ ليانۋي.
جوۋ ليانۋي جونىندە شاۋەشەك قالالىق الەۋمەتتىك كوشە اۆتوبۋزدان قىزمەت وتەۋ شەكتى جاۋاپكەرشىلىك سەرىكتەستىگىنىڭ ورىنباسار ديرەكتورى سۇن جىشۋە: ”جوۋ ليانۋي سەرىكتەستىگىمىزدەگى ەڭ ۇزدىك قىزمەتكەر، اۆتونوميالى رايون، ايماق، قالا جاعىنان العان سيلىقتارى جۇزدەن اسادى، جىل سايىن سەرىكتەستىگىمىزدە ۇزدىك شوفەر بولىپ باعالانادى، ونىڭ كاسىپتى ءسۇيۋ جانە ۇلەس قوسۋ رۋحى بارلىق ادامنىڭ ۇيرەنۋىنە تاتيدى“ دەپ القاي جونەلدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى