ۆيليام سارويان (امەريكا)
ءبىر جىلى اعايىم مەريكتەن شىعىپ، بريسنوۆ ارقىلى نيۋ-يوركقا ساياحاتتاي بارماق بولدى. ول پويەزگە وتىرار الدىندا كىشى اكەسى كالور وعان ساياحات بارىسىندا تۋىلۋى مۇمكىن قاتەرلەر جونىندە ەسكەرتۋمەن بولدى.
- پويەزگە شىققانىڭدا وتىراتىن ورنىڭدى ابدەن قاراپ بارىپ وتىر. جان-جاعىڭا بەتالدى جالتاقتاۋشى بولما!
-ماقۇل، اعا!
پويەز دە ورنىنان قوزعالا باستادى.
-سەنەن پويەز بەلەتىن سۇراۋعا فورما كيگەن ەكى ادام كەلەدى. ءبىراق، الدامشى بولۋى دا مۇمكىن. ولاردى ەلەمەي قوي.
-ونى قالاي بىلەمىن؟
-ەندى، كىشكەنە بالا ەمەسسىڭ عوي، مۇنىڭ ءبارىن ءالى-اق تۇسىنەسىڭ.
-و، جارايدى، اعا!
-وسىدان شىعىپ، جيىرما اعىلشىن ميلل جۇرمەي جاتىپ، كىسىنى ىعىر قىلۋعا اۋەس ءبىر جاس جىگىت كەلىپ، شىلىم ۇسىنۋى مۇمكىن. وعان، استە، شىلىم شەگەمىن دەۋشى بولما، شىلىمنىڭ قۇرامىنا ەسىڭنەن تاندىراتىن ءدارى قوسىلعان بولۋى مۇمكىن.
-جارايدى، اعا!
-اسحاناعا بارا جاتقانىڭدا ەرەكشە سۇلۋ ءبىر ايەل بىرەۋ يتەرىپ قالعان بولىپ نەمەسە بايقاماعان بولىپ، ادەيى سەنىمەن سوعىلىسىپ قالۋى، ءتىپتى، سەنى قۇشاقتاي الۋعا شاق قالۋى مۇمكىن، -دەدى قاريا، - وندايدا ونىمەن جاقىنداسقىڭ، دوس بولعىڭ كەلۋى مۇندا تۇرعان ءىس. ءبىراق، ءسوزسىز، قاراماي كەتە بەر. ول قالايدا، بوتەن ماقساتتاعى جان.
-نە دەيسىز؟
-جەز وكشە دەيمىن، -دەدى قاريا، -كىرگەننەن كەيىن اسحانادا ادام كوپ بولسا، الگى ايەل تۇپ-تۋرا سەنىمەن ءبىر ۇستەلگە وتىرا قالۋى مۇمكىن. دەسەدە، ونىڭ كوزىنە قاراۋشى بولما، ەگەر ول سەنى سوزگە تارتسا، جۇمعان اۋزىڭدى اشپاستان مىلقاۋ بولىپ ال.
-ماقۇل!
-ۇقتىڭ با، مىلقاۋ! -دەدى قاريا قايتالاپ، -بىردەن-ءبىر قۇتىلۋدىڭ جولى وسى.
-سوندا نەدەن قۇتىلامىن؟
-سۇرقيالاردىڭ باسىڭدى اينالدىرۋىنان قۇتىلاسىڭ، بۇل مەنىڭ ساپار شەككەن كەزىمدەگى تۇيگەندەرىم.
-ماقۇل، اعا! -دەدى اعايىم.
- ەندى ءسوزدى دوعارايىق، ەندى بۇلاردى ايتا بەرمەيىك.
- ماقۇل، اعا!
- ەندى دوعارايىن، راس-اۋ، مەنىڭ جەتى بالام بار. كۇندەرىم ەندى عانا وڭالىپ كەلەدى. وتكەن كۇنگە سالاۋات، قازىر ەگىستىك جەرىم، ءۇزىم باعىم، اعاشتارىم، مال-جان بار دەگەندەي، كورىم بولىپ قالدىم. پەندە باسىندا باياندى نە بار دەيسىڭ. بايلىق دەگەن قولدىڭ كىرى ەمەس پە.
-دۇرىس، اعا! -دەدى اعايىم.
-اسحانادان بولمەڭە قايتىپ كەلە جاتقانىڭدا، ارناۋلى شىلىم شەگەتىن بولمەدەن ءوتۋىڭ مۇمكىن. ءوتىپ بارا جاتىپ، قىمبات دۇزىك تاعىپ العان ورتا جاستاعى ءۇش ادامنىڭ قارتا ويناپ، ۇتىسىپ وتىرعانىن بايقايسىڭ، ولار ساعان باس يزەسىپ كۇلىپ قويادى. اۋەلى، ىشىندەگى بىرەۋى سەنى قاتارعا قوسىلۋعا شاقىرۋى مۇمكىن. ولارعا، استە، اعىلشىن تىلىندە سويلەۋشى بولما.
-ماقۇل، اعا!
-وندا بولدى.
-راقىمەت سىزگە!
-تاعى ءبىر ەسكەرتەر ءىس - كەشتە ورنىڭا جاتقانىڭدا قاپشىعىڭداعى اقشاڭدى شاقايىڭنىڭ ىشىنە سالىپ، شاقايىڭدى جاستىعىڭنىڭ استىنا قويىپ تاستا، باسىڭ جاستىققا تيىسىمەن قاتىپ قالىپ جۇرمە.
-ماقۇل، اعا!
-وندا جارايدى.
قاريا قايتىپ كەتتى دە ەرتەڭىندە مەريكتەن پويەزعا وتىرعان اعايىم ميچيگاندى كوكتەي ءوتىپ، نيۋ-يورككە ساياحاتقا شىقتى. الگى فورما كيىم كيگەن ەكى ادام الدامشى بولمادى. شىلىم ۇسىناتىن جاس جىگىت تە كەزىكپەدى. سۇلۋ ايەل دە كىشى اكەممەن ءبىر ۇستەلگە وتىرمادى. ءتىپتى، شىلىم شەگۋ بولمەسىندە دە ەشكىم قارتا وينامادى. اقشاسىن شاقايىنا سالىپ، جاستىعىنىڭ استىنا باسىپ العان اعايىم سەرگەك بولام دەپ ءتۇنى بويى كوز ىلمەي شىقتى. ءبىراق، ەشقانداي ءىس تۋىلماعان سوڭ، ءوزىنىڭ بۇرىنعى ادەتىنە قايتا كوشتى.
ەرتەڭىندە ونىڭ ءوزى شىلىمىن الىپ، ءبىر جاس جىگىتكە ۇسىنىپ ەدى، الگى قولىن قايتارمادى.
اسحانادا ءبىر شەتتە ءجۇرىپ بارا جاتقان اعايىم ءبىر جاس ايەلمەن تاباقتاس تا بولىپ قالدى. ونى قويعاندا، شىلىم بولمەسىندە قارتا دا تاراتىپ بەردى.
ول نيۋ-يورككە بارماي جاتىپ، پويەزداعىلاردىڭ بارلىعىمەن ەتەنە بولىپ الدى. ءتىپتى، ءبىر جولى وحايو شتاتىنان ءوتىپ بارا جاتقاندا شىلىمىن قابىلداعان الگى جىگىت ەكەۋى فۋنتچالعا بارا جاتقان ەكى جاس ايەلمەن قوسىلىپ، « بابەچەل وزەنىنىڭ قۇراعى» دەگەن ءاندى شىرقادى. ساپار ەرەكشە كوڭىلدى ءوتتى. اعايىم ساپارىن اياقتاتىپ، قايتىپ كەلگەندە كىشى اكەسى كالور وعان تاعى كەلىپ جولىقتى.
-قاراعاندا، ساپارىڭ ءساتتى بولعان سياقتى عوي، -دەدى ول، -جول بويى مەنىڭ ايتقاندارىمدى ورىندادىڭ با؟
- ورىندادىم، اعا!- دەدى اعايىم.
الىسقا كوز سالىپ تۇرعان قاريا:
-ايتقان اقىلدارىمدى قالت جىبەرمەي اتقارعانىڭا شىنىمەن قۋانىپ قالدىم! -دەدى.
اۋدارعان- نۇرسانات عازات قىزى
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.