تىلشىلەرىمىز جاڭ پەيچي، ماقپال مىرزاقان حابارلايدى. 11 -ايدىڭ 20 -كۇنى ناۋقاس جاعدايىن تەكسەرۋگە كەلگەن باس شيپاگەر گۋ فىڭدى كورگەن جاۋ شيۋ -ى كوزىن توقتاۋسىز جىپىلىقتاتىپ، گۋ فىڭعا بالاشا قۋانىپ قارادى. گۋ فىڭ كەتەرىندە ەڭكەيىپ جاۋ شيۋ -ىنىڭ قولىن ۇستاپ تۇرىپ: ”شەشەي، كوزىڭىزدىڭ قالپىنا كەلۋى جاقسى ەكەن، كوز ءدارىسىن كوبىرەك تامىزىڭىز“ دەدى.
بيىل 72 جاستاعى جاۋ شيۋ -ى دەنەسى سالدانىپ، 44 جىل بويى توسەك تارتىپ جاتىپ قالعان، جىعىلعاننىڭ ۇستىنە جۇدىرىق بولعانداي، 2019 -جىلى نوعالا اۋرۋى سەبەبىنەن قوس جانارى كورمەي قالىپتى.
جاۋ شيۋ -ىنى ايماقتىق حالىق شيپاحاناسى پارتكومىنىڭ مۇشەسى، ورىنباسار شيپاحانا باستىعى سالايدىن سالىقجان 2002 -جىلى بىرىگىپ ناۋقاس تەكسەرۋ بارىسىندا كەزىكتىرگەن ەكەن،ونىڭ وتباسىندا قيىنشىلىعى بار ەكەندىگىن بىلگەننەن كەيىن، سالايدىن قارياعا قارايلاسۋدى ىرىقتىلىقپەن ۇستىنە الىپ، نەسەپ جۇرگىزۋ تۇتىگىن الماستىرىپ، دەنەسىن ۋقالاپ، دەنساۋلىعىن تەكسەرىپ، تابانى كۇرەكتەي 19 جىل قارايلاسقان ەكەن.
2021 -جىلى 6 -توپتاعى ۇيىرمە ۇلگىسىندە شينجياڭعا كومەككە كەلگەن ەمدەۋ اترەتىندەگى كوز اۋرۋلارى ءبولىمىنىڭ مامانى گۋ فىڭ جان تەبىرەنتەرلىك وسى اڭگىمەنى ەستىگەننەن كەيىن دەرەۋ ىسكە كىرىسىپ، شيپاحانانىڭ كوز اۋرۋلارىن ەمدەۋ ۇجىمىن باستاپ بارىپ، جاۋ شيۋ -ىنىڭ ۇيىندە ناۋقاسىن تەكسەرەدى.
11 -ايدىڭ 19 -كۇنى گۋ فىڭ مەن ايماقتىق حالىق شيپاحاناسى كوز اۋرۋلار ءبولىمىنىڭ مەڭگەرۋشىسى ءساليقا سەلبەسە وتىرىپ جاۋ شيۋ -ىعا نوعالا وپەراتسياسىن تابىستى جاساپ شىعادى.
” قايىن بيكەمنىڭ كوڭىلى نەداۋىر جادىراپ قالدى، ءتىپتى، سىڭسىپ ءان ايتاتىن بولدى. قازىر تاماققا تابەتى دە، ۇيقىسى دا جاقسى، كوپ اڭگىمەلەسەتىن بولدى، قايىن بيكەمنىڭ جارىقتى قايتا كورە العاندىعىنا بارلىعىمىز توتەنشە قۋانىپ ءارى تەبىرەنىپ تۇرمىز“ دەدى جاۋ شيۋ -ىنىڭ كەلىنى شان چۋانليڭ.
شان چۋانليڭ باستابىندا وپەراتسيادان الاڭداپ، سوڭىندا قۋانىشقا بولەنگەن كوڭىل كۇيلەرىن تەبىرەنىسپەن بايانداپ بەردى. ”بەينە ءتۇس كورگەندەيمىز، قايىن بيكەم، راسىندا، تالەيلى جان ەكەن! بۇل كىسىنىڭ قانتتى نەسەپ اۋرۋى، جۇرەك اۋرۋى، جوعارى قان قىسىمى اۋرۋى بار بولاتىن، مۇنىڭ ءوزى شيپاگەرلەر مەن تۋىس -تۋعانى بولعان بىزگە اۋىر سىن بولدى “ دەدى ول.
جاۋ شيۋ -ى نوعالا وپەراتسياسىن جاساتقان ەكىنشى كۇنى تاڭەرتەڭگى ساعات 9 مولشەرىندە باس شيپاگەر، وپەراتسيا جاساعان شيپاگەر، سەسترالار بارلىعى كەلىپ، جاۋ شيۋ -ىنىڭ كوزىنىڭ قالپىنا كەلۋ جاعدايىن جالپى بەتتىك تەكسەرىپ شىقتى.
ۇعىسۋعا قاراعاندا، 3 ايدان استام ۋاقىتتىڭ ىشىندە جاۋ شيۋ -ىعا 10 نەشە رەت ۇلكەندى -كىشىلى تەكسەرۋ جۇرگىزىلىپتى.
”قاريا توسەك تارتىپ جاتقاندىقتان، كوپتەگەن نەگىزدىك تەكسەرۋلەردى جۇرگىزۋ قيىنعا ءتۇستى، ءبىز اسپاپتاردى ونىڭ ۇيىنە اپارىپ تەكسەردىك. قاريانىڭ كوزىندەگى نوعالانىڭ قالىڭدىعى 4 -دارەجەگە جەتىپتى، نەداۋىر قاتتى، ونىڭ ۇستىنە كوز تۇبىنەن قان شىعۋ ءجايتى دە بار ەكەن، وپەراتسيانىڭ قيىندىعى نەداۋىر جوعارى بولعاندىقتان، ارناۋلى جوبا جاساپ، ۋلترا دىبىسپەن ىدىراتۋ وپەراتسياسىن جاسادىق“ دەدى گۋ فىڭ.
ەمدەۋ جاعىندا شينجياڭعا كومەكتەسۋدە تەك قانا ”قان بەرۋ“ جەتكىلىكسىز بولادى، مۇنان دا ماڭىزدىسى ”قان جاساۋ“. كومەككە يە بولاتىن ورىننىڭ ەمدەۋ ورەسىن ءتىپتى دە جوعارىلاتىپ، بۇقارانى باقىتقا كەنەلتۋ ءۇشىن، لياۋنيڭ ولكەسى ەمدەۋ جاعىندا شينجياڭعا كومەكتەسۋدىڭ الۋان ءتۇرلى يكەمدى تاسىلدەرىن قولدانىپ، ”ۇيرەتۋ، كومەكتەسۋ، جەتەكتەۋ“ قىزمەتىن ىشكەرىلەي ىلگەرىلەتتى.
ءساليقا لياۋنيڭ ولكەسىنەن ۇيىرمە ۇلگىسىندە شينجياڭعا كومەككە كەلگەن ەمدەۋ اترەتتەرىنىڭ ەڭ العاشقى توپتاعى شاكىرتتەرىنىڭ ءبىرى. قازىر ول تارباعاتايداعى بىردەن -ءبىر نوعالا وپەراتسياسىن جاسايتىن شيپاگەر، تۇرلىشە كۇردەلى نوعالا وپەراتسياسىن دەربەس جاساي الاتىن بولىپ، جاقىنعى 3 جىل ىشىندە 1200 دەن استام وسى تۇردەگى وپەراتسيانى جاساعان.
ءساليقا: ”بۇل ءار توپتا شينجياڭعا كومەككە كەلگەن ەمدەۋ ماماندارىنىڭ ۇزدىكسىز كومەكتەسىپ -سۇيەمەلدەۋىنىڭ جەمىسى، قابىلەتىمدى جالعاستى ءوسىرىپ، ناۋقاستارعا ويداعىداي قىزمەت وتەيمىن“ دەدى.
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى