نۇرساۋلەت كوشكىنباي ۇلى
ايلار اۋناپ جىلدار جىلجۋىمەن قوعامنىڭ دامۋى حالىق تۇرمىسىنىڭ ورەسىن كۇننەن-كۇنگە جوعارىلاتتى. تەك تۇرمىس ورەسى جوعارىلاۋ عانا ەمەس، قوعامنىڭ دامۋىنا سايكەسەرلىكتەي جىلدامدىقپەن قىزمەت ىستەۋ، ۇيرەنۋ سىندى باسىمدىلىقتى دا الا كەلدى. جايشىلىقتا بىردەن ءسال بوستىق ۋاقىت شىققاندا، دوس-جاران، تانىستارىمەن باس قوسىپ، دەم الۋ تۇرمىستىق داعدىعا اينالعانى شىندىق. الايدا، دەم الۋدىڭ، باس قوسۋدىڭ ءتىپتى ۇلكەن باس قوسۋ ەمەس، ادەتتەگىدەي كەڭ وتىرىپ اسىقپاي ءبىر رەتكى تاماقتانۋدىڭ وزىندە داستارقان باسىنا الدىمەن اراقتى الا كەلۋدەي ناشار ادەتتى قالىپتاستىرعان ازاماتتارىمىزدا از ەمەس، اراقتى ازىراق ەمەس، الدى-ارتىنا قاراماي ماس بولعانشا ءىشىپ ءوز ارەكەتىنە يە بولا الماي، ىستەگەن ءىسىنىڭ سوڭى ءوزىن ەمەس جاقىندارى، اتا-انا، تۋىس-تۋعاندارىن وكىنىشكە وتىرعىزىپ، رۋحاني سوققىنىڭ سويىلىنا جىعىپ جاتقاندارى قانشاما. جاقىنعى جىلداردان بەرى ۇلتىمىزدان اراقتىڭ كەسىرىنەن كوپتەگەن تراگەديالىق دەلولار ءجۇز بەرىپ وتىر. سونىڭ ءبىرىن الىپ ايتساق، ايماعىمىزدىڭ ءمالىم ءبىر اۋدانىندا مىنانداي ءبىر دەلو تۋىلىپ، بۇل دەلوداعى جاۋاپكەر مەن زياندالۋشى ەكەۋى اسحانادا تاماق جەپ، اراق ءىشىپ وتىرادى، اراقتىڭ بۋىنا ابدەن مالىنعان ول ەكەۋى قايتپاقشى بولىپ، جاۋاپكەردىڭ ءۇيىنىڭ الدىنا كەلگەندە، ەكەۋى بولىمسىز ىسكە بولا سوزگە كەلىسىپ قالىپ، جاۋاپكەر ءبىر مەزەتتىك اشۋدىڭ جەلىگىمەن اۋلاداعى موتاسىنىڭ ارتىنداعى ساندىعىندا تۇرعان پىشاقتى الىپ، زياندالۋشىنىڭ كەۋدە بولىمىنە سۇعىپ الادى. سول ساتتە اراقتىڭ بۋىنان ەس-اقىلىن جيناعان ازامات قارسى الدىندا جاتقان ادامنىڭ ءوزىنىڭ قولىنداعى قانجاردان زاقىمدالىپ قانسىراپ جاتقانىن كورگەن سوڭ، دەرەۋ قوعام حاۋىپسىزدىگى مەكەمەسى مەن شۇعىل قۇتقارۋ بولىمىنە تەلەفون سوعىپ، ءوزى سول مايداندا ولاردىڭ كەلۋىن كۇتىپ تۇرادى. شۇعىل قۇتقارۋ ءبولىمىنىڭ ادامدارى مەن قوعام حاۋىپسىزدىگى مەكەمەسىنىڭ قىزمەتكەرلەرى ناق مايدانعا كەلىپ تەكسەرۋ جۇرگىزۋ ارقىلى زياندالۋشىنىڭ ولگەندىگىن تۇراقتاندىرادى. جاۋاپكەر قوعام حاۋىپسىزدىگى مەكەمەسى جاعىنان قولعا تۇسەدى، دەلو جان-جاقتىلى تەكسەرىلىپ، ەڭ سوڭىندا حالىق سوت مەكەمەسى جاعىنان جاۋاپكەرگە قاساقانا زاقىمداۋ ( ادام ولىمىنە سەبەپشى بولۋ ) قىلمىسىمەن 15 جىلدىق مەرزىمدى قاماق جازاسىن بەرۋ جونىندە ۇكىم شىعارادى. ال بۇل جاۋاپكەردى الىپ ايتساق، ءبىر مەملەكەت قىزمەتكەرى، زاڭنان تولىق ساۋاتى بار اتپال ازاماتتارىمىزدىڭ ءبىرى بولا تۇرا، وسىنداي بولىمسىز ەرەگەسكە بولا قايشىلىقتى تۋرا ءبىر جاقتىلى ەتپەي، باسقالارعا پىشاق سۇعۋدىڭ زاردابىنىڭ اۋىر ەكەندىگىمەن ەسەپتەسپەي، زياندالۋشىعا پىشاق سۇعىپ، ونىڭ ولىمىنە سەبەپشى بولىپ وتىرعاندا، اناۋ وقىماعان تاۋ بوكتەرىندە جاتقان ازاماتتارىمىزدان نە دەپ اۋىز اشۋعا بولادى. مىنە اراقتىڭ كەسىرىنەن جاۋاپكەردىڭ جانە زياندالۋشىنىڭ اتا-اناسى، تۋىس-تۋعانى بولىپ قانشا وتباسى ويران بولدى، قانشاما سابيلەر شىرىلداپ پاناسىز قالدى. ۇرپاقتارىن ۇلاعاتتاپ تاربيەلى ۇل، كورەگەندى قىز تاربيەلەۋدى ەجەلدەن وزدەرىنىڭ بۇلتارتباس بورىشى ساناپ كەلگەن اتا-بابالارىمىزدىڭ ءىزىن باسىپ، ەرتەڭگى كۇنى ەل ءۇشىن ءىس ىستەر اتپال ازاماتتارىمىزدىڭ ەندىگارى اراقتىڭ ارباۋىنان ازعىندالۋىنان ساقتانايىق اعايىن.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.