□ ءتىلشىمىز جاڭ گوحۇي ەرىكتى ءتىلشى مي جيڭ
شيحۋ قالاسى دۋتاي اۋىلى دۋتاي ءبىرىنشى قىستاعىندا حالىق ءۇشىن قىزمەت وتەيتىن حۋ چاڭلەي اتتى شۋجي بار ، وعان قاتىستى ۇلتتار ىنتىماعى جاعىنداعى ءاربىر حيكايا ونى قىستاق تۇرعىندارىنىڭ كوڭىلىندەگى جاقسى شۋجيگە اينالدىرعان.
بيىل 1 -ايدا ايماقتىق ەكولوگيالىق ورتا مەكەمەسى شيحۋ قالالىق بولىمشە مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى حۋ چاڭلەي ۇيىمنىڭ ۇيعارۋىمەن، شيحۋ قالاسى دۋتاي اۋىلى دۋتاي ءبىرىنشى قىستاعىنا ءتۇسىپ، ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى، قىستاقتىڭ ءبىرىنشى شۋجيى مىندەتىن ارقالايدى.
حۋ چاڭلەي قىستاققا بارعاننان كەيىن ءاربىر وتباسىن قالدىرماي ارالاپ، جاعداي ۇعىسىپ، قىستاقتىڭ جالپى جاعدايىنا تەز ارادا قانىق بولۋعا كىرىسەدى. كۇندىزگى ارالاپ جاعداي ۇعىسۋ اقىرلاسقاننان كەيىن، ول كەشكىسىن جاعداي ۇعىسقاندا العان ەستەلىكتەرىن رەتتەپ، ءار كۇنى حالىقتىڭ جاعدايىن تاباندىلىقپەن ەستەلىككە الىپ وتىردى. حۋ چاڭلەي ءبىر اي دەگەندە تۇڭعىش رەتكى تۇتاس قىستاق بۇقاراسىنىڭ جاعدايىن ۇعىسۋ جۇمىسىن سوڭىنا شىعارىپ، قىستاقتىڭ نەگىزگى جاعدايى مەن بۇقارانىڭ قاجەتىنەن، ارمان -تىلەگىنەن حاباردار بولادى.
حۋ چاڭلەي: ”دۋتاي ءبىرىنشى قىستاعىنىڭ كوشە -كوشەسىن ارالاپ، تۇتاس قىستاقتىڭ نەگىزگى جاعدايىن مەڭگەردىم: قايسىلارى تۇرمىسىندا قيىنشىلىعى بار بۇقارا، قايسىلارى ەڭ تومەنگى تۇرمىستى قامتاماسىزداندىرۋدان يگىلىكتەنىپ وتىر؛ كىمدەر تام ۇيدە تۇرادى، كىمدەر جاڭا ءۇي سالىپ جاتىر؛ قايسى وتباسىندا نەشە ادام سىرتتا جۇمىس ىستەيدى؛ كىمنىڭ وتباسى نەشە مۋ جەرگە ەگىن سالدى، قانداي اۋىل شارۋاشىلىق ماشينالارى بار، قانشا مال باعادى... نەگىزىنەن تولىق حاباردار بولدىم“ دەدى.
ءبىر وتباسىن دا قاعىس قالدىرماي ارالاپ جاعداي ۇعىسقاندىقتان، حۋ چاڭلەي مەن قىستاق تۇرعىندارى تانىسىپ -ءبىلىسىپ، كادر مەن بۇقارا ەتەنە جاقىنداسىپ، قىستاقتا تۇرۋ قىزمەتىن ورىستەتۋگە تاماشا نەگىز قالايدى.
دۋتاي ءبىرىنشى قىستاعىنداعى ەڭ تومەنگى تۇرمىسى قامتاماسىزداندىرىلاتىن گۇلمار قابىكەن وقۋداعى ەكى بالاسىن جالعىز ءوزى قارايتىندىقتان، تۇرمىستىق قيىنشىلىعى بار ەدى. حۋ چاڭلەي ۇنەمى گۇلماردىڭ وتباسىنا بارىپ، پارتيانىڭ حالىققا ءتيىمدى ساياساتتارىن ۇگىتتەپ، ونىڭ وتباسىنىڭ ءوندىرىس -تۇرمىس جاعدايىن ۇعىسىپ، جاعدايىن وڭاۋدىڭ امالىن قاراستىرىپ، ونىڭ تۇرمىس ورەسىن جوعارىلاتۋعا كومەكتەسۋدىڭ قامىن جەيدى.
كوكتەمگى ەگىس مەزگىلىندە گۇلماردىڭ قول -اياعى ءجۇرىپ -تۇرۋعا قولايسىز سىرقات بولعاندىقتان، تۇقىم ءسىڭىرۋدىڭ ءوزى ءبىر قيىن ماسەلەگە اينالادى، حۋ چاڭلەي پارتيا مۇشەلەرىن ۇيىمداستىرىپ، بىرلىكتە تۇقىم سىڭىرۋگە كومەكتەسىپ، جارىم كۇندە 2 مۋ جەردىڭ تۇقىمىن ءسىڭىرىپ بەرىپ، كوكتەمگى ەگىس داقىلىن ءسىڭىرۋ ۋاقىتىنىڭ كەشەۋىلدەمەۋىنە كەپىلدىك ەتتى. ەگىنگە ءدارى شاشاتىن، ارام شوپتەرىن وتايتىن كەزدە حۋ چاڭلەي ۋاقىتى شىعا قالسا بولعانى بارىپ كومەكتەسىپ تۇرادى.
تاياۋدان بەرى اۋا رايى سۋىتا باستادى، حۋ چاڭلەي گۇلماردىڭ ءۇيىن مەشپەن جىلىتاتىندىعىن بايقاپ، قىستاق ”ەكى كوميتەتىنىڭ“ القا مۇشەلەرىمەن اقىلداسىپ، 2.4 مەتر ۇزىندىقتاعى 6 رادياتور سايكەستىرىپ، بوسقا اكەلىپ بەرۋمەن بىرگە، قۇرىلىس اترەتىمەن بايلانىس جاساپ، راديوتوردى تەگىن ورناتۋعا كەلىسەدى. قۇرىلىس اترەتىندەگىلەر ونىڭ وتباسىلىق جاعدايىنان حابار تاپقاننان كەيىن وعان وتباسىندا ىستەتەتىن كىشكەنە پارقازان وشاعىن تارتۋ ەتۋدى ۇيعارادى.
حۋ چاڭلەي مەن قۇرىلىس اترەتىندەگىلەر بىرگە رادياتور مەن پارقازان وشاعىن گۇلماردىڭ ۇيىنە جەتكىزىپ، ونىڭ ءتورت اۋىزدى ءۇيىن قايتالاي رەتتەپ، ايىرىم پارقازان وشاعىن قوياتىن ءۇيدى ىڭعايلاپ، پارقازان وشاعىن، رادياتور جانە كومىرتەگى شالا توتىعى قاشسا سيگنال بەرۋ اسپابىن ورناتىپ بەرەدى. سىناپ كورگەندە پارقازان وشاعى مەن كومىرتەگى شالا توتىعى قاشسا سيگنال بەرۋ اسپابىنىڭ بارلىعى قالىپتى بولىپ، ءبىر وتباسىنداعىلاردىڭ قىس ماۋسىمىنداعى جىلىنۋ ماسەلەسىن شەشىمدەدى.
گۇلمار: ” حۋ شۋجي كەلگەننەن بەرى ماعان كوپ كومەكتەسىپ، تۇرمىسىمداعى ءبىرتالاي قيىنشىلىقتارىمدى شەشىمدەپ بەردى، مەرەكە -مەيرامداردا دا حال سۇراپ كەلىپ تۇردى. قازىر ەكى بالام الاڭسىز وقىپ جاتىر، تۇرمىسىم دا نەداۋىر جاقساردى” دەدى.
قىستاققا تۇسكەننەن بەرى حۋ چاڭلەي بۇقارانىڭ تامشىلاتىپ سۋارۋداعى سۋ ماسەلەسىن شەشىمدەۋگە كومەكتەسىپ، قاتىناس شارت -جاعدايىن جاقسارتىپ، قىستاق ورتاسىن ساپالىلاندىرۋمەن بىرگە، ۇنەمى پاناسىز قارتتاردان، تۇرمىسىندا قيىنشىلىعى بار بۇقارادان حال سۇراپ، بۇقارا اراسىنداعى داۋ-شارلاردى ءبىر جايلى ەتىپ، قايشىلىقتاردى شەشىپ كەلەدى.
“ۇلتتار ىنتىماعىن بەكەمدەۋدىڭ تەتىگى امالياتتا. بۇقارانىڭ كوڭىلىنەن شىعىپ، ءار ۇلت بۇقاراسىنىڭ اراسىنداعى ىنتىماق دانەكەرىنە اينالۋ مەنىڭ قىزمەت بورىشىم“ دەدى حۋ چاڭلەي.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى