ەندى عانا 19 جاسقا تولعان سەرىك 2012- جىلى قىركۇيەكتىڭ ءمالىم ءبىر كۇنى تۇنگى ساعات 11 مولشەرىندە، تويدان اراق ءىشىپ شىعىپ، بۇرىن ءوزى جالدانىپ ىستەگەن سيىر ەتى كەسپەحاناسىنا بارعان. ول جەردە وزىمەن بىرگە ىستەگەن جىگىتتەرمەن اڭگىمەلەسىپ وتىرىپ، اقشا جينايتىن ماشيناداعى اقشاعا كوزى ءتۇسىپ «اقشالاردى الامىن» دەگەندە، اقشا جينايتىن قىز «بۇل اقشا قوجايىننىڭ اقشاسى» دەپ بەرمەگەن. وسى كەزدە سەرىك اقشانى توناۋ ويىنا كەلىپ، اسحانانىڭ تاماق ىستەيتىن ارتقى ۇيىنە كىرىپ، چەداۋ الىپ شىعىپ، اسحانانىڭ پوكايىن چەداۋمەن ۇرىپ، «شاۋىپ ولتىرەمىن» دەگەن سوزدەرى ايتىپ، سەس كورسەتىپ، پوكايدىڭ ىشىندە تۇرعان «حاۋ شۇن» ماركالى 2500 – XH تۇرپاتتى اقشا جينايتىن ماشينانى ىشىندەگى اقشاسىمەن قوسىپ الىپ كەتىپ، ونى وسى كەسپەحانانىڭ شىعىس جاعىنداعى ەلەكتر جابدىقتارىن ساتاتىن قاباتتىڭ ارتىنا اپارىپ شاعىپ، ىشىندەگى 1000 يۋان اقشانى الىپ، اقشا جينايتىن ماشينا مەن چەداۋدى سول جەرگە تاستاپ، توراپحاناعا بارىپ توراپقا شىعىپ وتىرعاندا، ءدوربىلجىن اۋداندىق قوعام حاۋىپسىزدىگى مەكەمەسىنىڭ ساقشىلارى جاعىنان قولعا تۇسكەن. زات-باعا ورتالىعى جاۋاپكەر توناپ العان ءبىر دانا «حاۋ شۇن» ماركالى 2500 – XH تۇرپاتتى اقشا جينايتىن ماشينانى 960 يۋانعا باعالاعان.
ءدوربىلجىن اۋداندىق حالىق سوتى مەكەمەسى جاۋاپكەر سەرىكتىڭ زاڭسىز يەمدەنۋ ماقساتىندا، سيىر ەتى كەسپەحاناسىندا قولىنا چەداۋ الىپ، اسحانانىڭ پوكايىن چەداۋمەن ۇرىپ، اسحانانىڭ قىزمەتكەرلەرىنە «شاۋىپ ولتىرەمىن» دەگەن سوزدەردى ايتىپ، سەس كورسەتىپ، پوكايدىڭ ىشىندە تۇرعان قۇنى 960 يۋاندىق «حاۋ شۇن» ماركالى 2500 – XH تۇرپاتتى اقشا جينايتىن ماشينانى ىشىندەگى اقشاسىمەن بىرگە زورلىقپەن الىپ كەتىپ پايدالانعان ارەكەتىنەن توناۋشىلىق قىلمىسى قالىپتاسادى دەپ قاراپ، جاۋاپكەر سەرىكتىڭ توناۋشىلىق قىلمىسى ءۇشىن ءۇش جىلدىق مەرزىمدى قاماق جازاسى بەرىلىپ، قوسىمشا 2000 يۋان ايىپ سالىنسىن دەپ ۇكىم شىعارعان.
«ەڭبەك ەتسەڭ ەرىنبەي، تويادى قارىنىڭ تىلەنبەي» دەگەن ءسوز بار، تەپسە تەمىر ۇزەتىن اتپال ازاماتتىڭ، ادال ەڭبەگىمەن كۇن كورمەي، اراق ءىشىپ، ارام ولجاعا باتۋدى ويلاپ، قىلمىس وتكىزىپ، جاستىعىن قارا قاقپانىڭ ىشىندە وتكىزۋى بارلىعىمىزدى ويعا سالادى.
دايىنداعان-قۇرمانالى قايروللا ۇلى
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.