قازىر قوعامدا ءبىر - ءبىرىن تولىق تۇسىنبەي نەكەلەنىپ، كىرشىكسىز ءسابيدى دۇنيەگە اكەلىپ، ارتىنان حالىق سوتى مەكەمەسىنە نەكەدەن اجىراسۋ ارىزىن بەرەتىندەر كوبەيۋدە. بالا اتا -انانىڭ باۋىر ەتى، الايدا نەكەدەن اجىراسۋشىلاردىڭ باسىم كوبى زاڭدىق تانىمىنىڭ تومەندىگىنەن ءوزىنىڭ شارت - جاعدايىنىڭ پەرزەنتىنىڭ اقاۋسىز ءوسىپ - جەتىلۋىن، زاڭدى ۇقىق -مۇددەسىن قامتاماسىزداندىرا الاتىن -المايتىنىمەن ساناسپاي، ەكىنىڭ بىرىندە باعۋ -تاربيەلەۋ ۇقىعىن تۇراقتاندىرۋ ماسەلەسى جونىندە پىكىر بىرلىگىنە كەلە الماي، ءتىپتى كەيبىرى حالىق سوتى مەكەمەسىنىڭ زاڭ بويىنشا شىعارعان ۇكىمىنە رازى بولماي، جوعارىلاپ ارىزدانىپ جاتادى.
حالىق سوتى مەكەمەسى نەكەدەن اجىراسۋ دەلولارىن ءبىر جاقتى ەتكەندە، داۋگەرلەر اراسىنداعى پەرزەنتتى باعۋ - تاربيەلەۋ ۇقىعىن تۇراقتاندىرۋ ماسەلەسىن «جۇڭحۋا حالىق رەسپۋبليكاسى نەكە زاڭىنىڭ» 29 - ، 30 - تارماعىنا جانە قاتىستى زاڭ - بەلگىلەمەلەرىنە ساي، پەرزەنتتىڭ ءتان جانە پسيحيكالىق اقاۋسىزدىعى مەن زاڭدى ۇقىق-مۇددەسىن قامتاماسىزداندىرۋدى شىعار ءتۇيىن ەتىپ، ەرلى-زايىپتى ەكى جاقتىڭ باعۋ -تاربيەلەۋ قابىلەتى جانە باعۋ -تاربيەلەۋ شارتىن ازىرلەگەن- ازىرلەمەگەندىگى سياقتى ناقتى احۋالدارمەن بىرلەستىرىپ ءبىر جاقتى ەتەدى. اشالاپ ايتقاندا، حالىق سوتى مەكەمەسى نەكەدەن اجىراسۋ دەلولارىنداعى پەرزەنتتى باعۋ - تاربيەلەۋ ۇقىعىن تۇراقتاندىرۋدا تومەندەگىدەي ءبىرقانشا جاقتاردى ويلاستىرادى:
ءبىرىنشى، 2 جاستان تومەن بالالار پرينسيپتىك جاقتان شەشەسىمەن بىرگە تۇرمىس كەشىرەدى. ەگەر شەشەسىندە تومەندەگىدەي احۋالداردىڭ ءبىرى بولعاندا، اكەسىمەن بىرگە بولسا دا بولادى:
(1) ەمدەۋ شيپا بولماعان جۇعىمتال اۋرۋمەن جۇعىمدالعاندا نەمەسە باسقا دا اۋىر ناۋقاسقا كىرىپتار بولىپ، پەرزەنتى بىرگە تۇرمىس كەشىرۋگە مۇمكىن بولماعاندا؛
(2) باعىپ-تاربيەلەۋ شارت - جاعدايى بولا تۇرا، باعىپ-تاربيەلەۋ بورىشىن وتەمەسە ءارى اكەسى پەرزەنتىمەن بىرگە تۇرمىس كەشىرۋدى تالاپ ەتسە؛
(3) باسقا دا سەبەپتەرمەن پەرزەنتى شەشەسىمەن بىرگە تۇرمىس كەشىرۋگە امالسىز بولسا.
ەكىنشى، 2 جاستان تومەنگى بالانىڭ اكەسىمەن بىرگە تۇرمىس كەشىرۋىنە ەرلى - زايىپتى ەكى جاعى ەرىكتى كەلىسىپ، بۇل بالانىڭ اقاۋسىز ءوسىپ- جەتىلۋىنە تيىمسىزدىك اكەلمەسە، اكەسىمەن بىرگە بولۋىنا جول قويۋعا بولادى.
ءۇشىنشى، 2 جاستان جوعارى، باليعاتقا تولماعان بالالاردى باعىپ - تاربيەلەۋدە اتا -اناسى تۇگەلدەي بىرگە بولۋدى تالاپ ەتسە، باعىپ - تاربيەلەۋ ۇقىعىن تۇراقتاندىرۋدا تومەندەگىدەي شارتتاردى ازىرلەگەن جاقتى الدىمەن ويلاستىرۋعا بولادى:
(1) ۇرپاق كورۋ مۇشەلەرىنە وپەراتسيا جاساتقان نەمەسە باسقا دا سەبەپتەرمەن ۇرپاق كورۋ قابىلەتىنەن ايرىلعاندار؛
(2) بالامەن بىرگە تۇرمىس كەشىرگەن مەزگىلى ۇزاق بولىپ، تۇرمىس ورتاسىن وزگەرتكەندە بالانىڭ اقاۋسىز ءوسىپ -جەتىلۋىنە كورنەكتى تيىمسىزدىك اكەلسە؛
(3) باسقا پەرزەنتى بولماي، ەندى ءبىر جاعىنىڭ باسقا پەرزەنتى بولعاندا؛
(4) بىرگە تۇرمىس كەشىرگەندە بالانىڭ ءوسىپ -جەتىلۋىنە پايدالى بولىپ ءارى ءبىر جاعى ەمدەۋ شيپا بولماعان جۇعىمتال اۋرۋمەن جۇعىمدالعاندا نەمەسە باسقا دا اۋىر ناۋقاسقا كىرىپتار بولعاندا ياكي بالانىڭ ءتان جانە پسيحيكالىق اقاۋسىزدىعىنا پايداسىز باسقادا جايتتەر بولىپ، بىرگە تۇرمىس كەشىرۋگە بولماعاندا.
« شينجياڭ گازەتىنەن»
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.