29-كەزەكتى دۇنيە جۇزىلىك سەرىپپەلى توسەك جۇلدەلى جارىسى 9-قاراشادا سوفيادا ءۇشىنشى كۇنگى جارىسىن وتكىزىپ، ەلىمىز كومانداسى ەرلەردىڭ جەكە ادامدىق جانە ايەلدەردىڭ جەكە ادامدىق سەكىرۋ تۇرىنەن توپتىق اعا جۇلدەگەر بولىپ، ەكى التىن مەدالدى ەنشىلەدى.
ەرلەردىڭ جەكە ادامدىق جارىسىندا ەلىمىز كومانداسىنىڭ سپورتشىسى تۋ چيان مەن دۇڭ دۇڭ دايىندىق جارىستا ءبىرىنشى جانە ەكىنشى بولۋداي تاماشا ناتيجەمەن شەشۋشى جارىسقا قاتىناستى. ول ەكەۋى سەرىپپەلى توسەك جارىسىندا 7 جىلعا دەيىن ءبىر-بىرىنە سەرىك بولىپ كەلگەن ەدى، الايدا، وسى رەتكى جەكە ادامدىق جارىستىڭ شەشۋشى جارىسىندا ءبىر-ءبىرىنىڭ قارسىلاسىنا اينالدى.
ناتيجەدە تۋ چيان مەن دۇڭ دۇڭنىڭ ناتيجەسى بىردەي كورنەكتى بولىپ، قيىندىق دارەجەسى مەن تەحنيكالىق جاقتان ۇقساس ءنومىر الادى. الايدا، دۇڭ دۇڭنىڭ سەكىرگەن بيىكتىگى ءسال اسىپ تۇسكەندىكتەن، ەڭ سوڭىندا 60.795 نومىرمەن وسى تۇردەگى دۇنيە جۇزىلىك جارىستىڭ التىن مەدالىن ءۇشىنشى رەت ەنشىلەدى. تۋ چيان 60.580 نومىرمەن جۇلدەگەر بولىپ، رەسەي كومانداسىنىڭ سپورتشىسى ازاريان سەرگەي ءۇشىنشى بولدى.
دۇڭ دۇڭ جارىستان كەيىن تىلشىلىكتى قابىلداعانىندا: « بۇگىن جارىسقا دايىندالۋ بارىسىندا ويلاماعان جاعداي تۋىلدى، الايدا، شەشۋشى كەزەڭدە بار ونەرىمدى سالىپ، ارەكەتتى وتە جاقسى ورىندادىم، جارىستاعى بەينەمە ءدان ريزامىن » دەدى.
ءوزىنىڭ جاقسى سەرىگى تۋ چياندى اۋىزعا العاندا دۇڭ دۇڭ: « تۋ چياننىڭ جارىستاعى بەينەسى وتە جاقسى بولدى، الايدا، ونەر باسەكەسىندە ەشكىم دە كەلەسى سەكۋندتا نەندەي ءىس تۋىلاتىنىن بىلمەيدى. ءبىز بىرلىكتە ەكى كەزەكتى وليمپيادا سپورت جارىسىنا قاتىناستىق، الداعى جەردە ءالى دە بىرلىكتە كۇرەس جۇرگىزەمىز » دەدى.
ايەلدەردىڭ جەكە ادامدىق سەكىرۋ ءتۇرىنىڭ توپتىق شەشۋشى جارىسىندا ەلىمىز كومانداسىنداعى جيا فاڭفاڭ، چىن ليڭشي جانە ساي چيزىنىڭ ناتيجەسى كورنەكتى بولىپ، 104.400 نومىرلىك باسىمدىلىقپەن اعا جۇلدەگەرلىكتى ەنشىلەدى، رەسەي كومانداسى 99.600 نومىرمەن جۇلدەگەر بولىپ، ۇلى بريتانيا كومانداسى ءۇشىنشى بولدى.
ەلىمىز كومانداسىنىڭ جاتتىقتىرۋشىسى شاۋ چۇنحۋا: « سپورتشىلاردىڭ جارىستاعى بەينەسى تۇگەلدەي جاقسى بولىپ، جاتتىعۋ بارىسىنداعى ونەرلەرىن تولىق ايگىلەدى. كوز الداعى جاعدايدان قاراعاندا، جەكە تۇردەگى سەكىرۋ جاعىندا ەلىمىز سپورتشىلارى قيىندىق دارەجەسى مەن كۇش-قۋاتى جاعىندا ءالى دە ءبىرىنشى ورىندى ۇستايدى ەكەن » دەدى.
ەرلەردىڭ جەكە ادامدىق سەكىرۋ ءتۇرىنىڭ توپتىق شەشۋشى جارىسىندا ەلىمىز كومانداسىنان ليۋ لۇڭجي، ياڭ سۇڭ جانە جاڭ لو جارىسقا قاتىناستى. ياڭ سۇڭ مەن ليۋ لۇڭجيدىڭ جارىستاعى بەينەسى جامان بولمادى، جەكە-جەكە 38.000 جانە 37.200 ءنومىر الىپ، ەلىمىزدىڭ جيىنتىق ءنومىرى رەسەي كومانداسىنان 2.5 ءنومىر اسىپ تۇسكەن ەدى، الايدا، ەڭ سوڭىندا مايدانعا شىققان جاڭ لونىڭ ارەكەتتى ورىنداۋى ويداعىداي بولماي، تەك 34.700 ءنومىر الدى. سونىمەن ەڭ سوڭىندا رەسەي كومانداسى 110.700 نومىرمەن اعا جۇلدەگەر بولدى، ەلىمىز كومانداسى 109.900 نومىرمەن ەكىنشى، ۇلى بريتانيا كومانداسى ءۇشىنشى بولدى.
مۇنان تىس، ەلىمىز كومانداسىنداعى لي دان، جۇڭ شيڭپيڭ ايەلدەردىڭ قوس ادامدىق ونەر كورسەتۋىندە جۇلدەگەر بولدى.
29-كەزەكتى دۇنيە جۇزىلىك سەرىپپەلى توسەك جۇلدەلى جارىسى 7-قاراشادان 10-قاراشاعا دەيىن بۇلعاريانىڭ سوفيا اسكەريلەر دەنە تاربيە سارايىندا وتكىزىلدى.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.