2013- ، 2014-جىلعى جارىس مەزگىلىندە حالىقارالىق كونكي سپورتى بىرلەستىگىنىڭ قىسقا ارالىقتا تەز سىرعاناۋ دۇنيە ساۋىتىنا تالاسۋ جارىسى يتاليا جەرگىلىكتى ۋاقىتى بويىنشا 10-قاراشادا تۋريندە اياقتالدى. وڭتۇستىك كورەيا سپورتشىسى شىن شىشي 3 التىن مەدال ەنشىلەدى، وسى 16 جاستاعى جاس سپورتشى جۇڭگو كومانداسىنىڭ سوچي قىسقى وليمپيادا سپورت جارىسىنداعى باسەكەلەسىنە اينالماقشى.
شىن شىشي سول كۇنى ايەلدەردىڭ مىڭ مەترلىك جارىس تۇرىنەن التىن مەدال ەنشىلەۋمەن بىرگە، وڭتۇستىك كورەيا كومانداسىن باستاپ، ايەلدەردىڭ 3 مىڭ مەترلىك كۇش جالعاپ سىرعاناۋ جارىسىندا اعا جۇلدەگەر بولدى. وسىدان بۇرىن ول جانە ايەلدەردىڭ ءبىر مىڭ 500 مەترلىك ارالىققا سىرعاناۋ تۇرىنەن اعا جۇلدەگەرلىكتى قانجىعاسىنا بايلاعان.
وسى جارىس مەزگىلىندەگى قىسقا ارالىقتا تەز سىرعاناۋ دۇنيە ساۋىتىنا تالاسۋ جارىسى جۇڭگو شاڭحاي، وڭتۇستىك كورەيا سەۋىل، يتاليا تۋرين جانە رەسەي كولومنا سياقتى 4 بەكەتكە ورنالاستىرىلعان. مۇنىڭ ىشىندە، تۋرين بەكەتى مەن كولومنا بەكەتىندەگى جارىس قىسقى وليمپيادا سپورت جارىسىنا قاتىناسۋ تولىمدىلىعىنا يە بولاتىن جارىسى بولىپ، ءارقايسى كوماندانىڭ سوچي قىسقى وليمپيادا سپورت جارىسىنا قاتىناساتىن ورىن سانىن بەلگىلەيدى ەكەن.
10-قاراشاداعى ايەلدەردىڭ مىڭ مەترلىك ارالىققا سىرعاناۋ جارىسىندا شىن شىشي ءبىر مينۋت 35 سەكۋند 223 تاقىلدىق ناتيجەمەن التىن مەدال ەنشىلەدى، بۇل جارىس ءتۇرىنىڭ الدىڭعى ءۇش ورنىن وڭتۇستىك كورەيا سپورتشىسى يەلەدى. ەلىمىز كومانداسىنداعى لي جيانرۋ جارىس قاعيداسىنا قايشىلىق جاساعاندىعى سەبەپتى ناتيجەسى كۇشىنەن قالدىرىلدى. ايەلدەردىڭ 3 مىڭ مەترلىك كۇش جالعاپ سىرعاناۋ جارىسىندا شىن شىشي وڭتۇستىك كورەيا كومانداسىن باستاپ، 4 مينۋت 10 سەكۋند 600 تاقىلدىق ناتيجەمەن اعا جۇلدەگەر بولسا، ەلىمىز كومانداسى4 مينۋت 11 سەكۋند 404 تاقىلمەن ەكىنشى، يتاليا كومانداسى 4 مينۋت 11 سەكۋند 844 تاقىلمەن ءۇشىنشى بولدى. ءسويتىپ وڭتۇستىك كورەيا كومانداسى وسى كەزەكتى دۇنيە ساۋىتىنا تالاسۋ جارىسىنىڭ الدىڭعى 3 بەكەتىندەگى جارىستىڭ ايەلدەردىڭ 3 مىڭ مەترلىك ارالىققا كۇش جالعاپ سىرعاناۋ ءتۇرىنىڭ التىن مەدالىن ەنشىلەدى.
الدىڭعى جارىس ماۋسىمىنان قازىرگە دەيىن شىن شىشي ءۇرتىس 9 بەكەتتەگى دۇنيە ساۋىتىنا تالاسۋ جارىسىنا قاتىناسىپ، از دەگەندە 2 التىن مەدالدى قانجىعاسىنا بايلاعان. وسى كەزەكتى جارىستاردا دا ونىڭ ناتيجەسى ايتارلىقتاي بولدى، بيىل قىركۇيەكتە ەلىمىزدە وتكىزىلگەن جارىستا 3 التىن مەدال، قازاندا وڭتۇستىك كورەيادا وتكىزىلگەن جارىستا 2 التىن مەدال ەنشىلەگەن.
ەلىمىز سپورتشىسى ۋاڭ مىڭ 9-قاراشاداعى ايەلدەردىڭ 500 مەترلىك ارالىققا سىرعاناۋ جارىسىندا اعا جۇلدەگەر بولدى، بۇل ەلىمىز كومانداسىنىڭ وسى رەتكى جارىستا ەنشىلەگەن بىردەن -ءبىر التىن مەدالى ەسەپتەلەدى.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.