ءبىرىنشى جارىس ماۋسىمىندا ەرەسەكتەر گرۋپپاسىنىڭ جارىسىنا قاتىناسۋ، سپورت ومىرىندەگى ەڭ جوعارى ناتيجەنى جاراتۋ، ايشىقتى سىرعاناۋ سيلىقتى جارىسىنىڭ ەرلەردىڭ جەكە تۇردەگى جارىسىندا ەلىمىزدەن شىققان تۇڭعىش اعا جۇلدەگەرگە اينالۋ سياقتى ناتيجەلەرگە يە بولىپ، بيىل ەندى عانا 17 جاسقا شىققان يان حان 2-قاراشادا اياقتالعان جۇڭگو ساۋىتىنا تالاسۋ ايشىقتى سىرعاناۋ جارىسىندا كوپتەگەن ەرەن ناتيجەلەردى جاراتتى. الايدا، ول جونىنەن بارىنەن دە قۋانارلىعى، جارىسقا قاتىناسا سالىسىمەن تورەشىلەردىڭ مويىنداۋىنا يە بولعاندىعى بولدى.
يان حان وسى رەتكى جۇڭگو ساۋىتىنا تالاسۋ جارىسىنىڭ ەرلەردىڭ جەكە ادامدىق ەركىن سىرعاناۋ جارىسىندا ءبىر جولاتا 155.48 ءنومىر الدى؛ وعان 1-قاراشادا العان 90.14 ءنومىردى قوسقاندا، جالپى ءنومىرى 245.62 ءنومىر بولىپ، ەكىنشى بولعان رەسەي سپورتشىسى ماكسيم كوۆتوننان 7.03 ءنومىر اسىپ، اعا جۇلدەگەر بولدى. بۇل 2001-جىلى لي چىڭجياڭ ءتورت ۇلى قۇرلىق جارىسىندا اعا جۇلدەگەر بولعاننان كەيىنگى ەرلەردىڭ جەكە جارىسىنىڭ حالىقارالىق ءبىرىنشى دارەجەدەگى جارىسىندا ەلىمىزدىڭ العان تۇڭعىش التىن مەدالى ءارى ەلىمىزدىڭ ەرلەردىڭ جەكە تۇرىنەن ايشىقتى سىرعاناۋ جارىسىندا العان تۇڭعىش اعا جۇلدەگەرلىگى ەسەپتەلەدى. مەملەكەتتىك دەنە تاربيە باس مەكەمەسىنىڭ قىسقى سپورت تۇرلەرىن باسقارۋ ورتالىعىنىڭ مەڭگەرۋشىسى جاۋ يڭگاڭ دا بۇل التىن مەدالدىڭ قولعا كەلۋىنە ەرەكشە جوعارى باعا بەردى.
الايدا، يان حان جونىنەن بۇل التىن مەدالعا يە بولۋ ەرەسەكتەر گرۋپپاسىنىڭ جارىسىنا قاتىناسا سالىسىمەن تورەشىلەردىڭ مويىنداۋىنا يە بولعاندىعىن دالەلدەدى. ول: « مەن ەرەسەكتەر گرۋپپاسىنىڭ جارىسىنا تۇڭعىش رەت قاتىناسىپ، وسىنداي جوعارى ناتيجە جاراتامىن دەپ ويلاماعان ەدىم، ناتيجەمنىڭ جوعارىلىعى ەمەس، تورەشىلەردىڭ مويىنسال بولعاندىعىنا ەرەكشە قۋانىشتامىن » دەدى.
بەس جاسىندا ناعاشى اتاسى يان حاننىڭ تۋىلعان كۇنىن قۇتتىقتاۋ ءۇشىن، تۇڭعىش رەت مۇز الاڭىنا اپارىپ، كونكي تەپتىرگەن ەدى؛ مۇز الاڭىنداعى يان حان سول كەزدىڭ وزىندە جاتتىقتىرۋشىلاردىڭ كوزىنە تۇسكەن ەكەن، ال بۇل كۇندە مىقتى سپورتشى بولىپ جەتىلىپ شىقتى. كونكيگە قىزىققان يان حان 2011-جىلدان باستاپ ءوز قۇدىرەتىن تانىتا باستادى، اۋەلى ەكى رەتكى زور سيلىقتى جارىستىڭ بولىمشە بەكەتىندەگى جارىستا اعا جۇلدەگەر بولعان سوڭ، ىلە-شالا زور سيلىقتى جارىستىڭ شەشۋشى جارىسىندا جۇلدەگەر بولدى. ونان كەيىن 2012-جىلعى جاستاردىڭ قىسقى وليمپيادا جارىسىندا ەرلەردىڭ جەكە تۇرىنەن اعا جۇلدەگەر بولدى؛ 2013-جىلعى ءتورت قۇرلىق ارا وتكىزىلگەن ايشىقتى سىرعاناۋ جۇلدەلى جارىسىندا ءۇشىنشى بولدى.
جاستار گرۋپپاسىندا تاماشا ناتيجە جاراتىپ، ەندى عانا ەرەسەكتەر گرۋپپاسىنا كىرگەن يان حان اعا جۇلدەگەرلىك مىنبەسىنەن تاعى بوي كورسەتتى. ول: « بۇل اعا جۇلدەگەرلىك مەنىڭ سەنىمىمدى بارىنشا ارتتىرىپ، جاتتىقتىرۋشىممەن بولعان وي جەلىم مەن تۇسىنىگىمىنىڭ دۇرىس ەكەندىگىن دالەلدەدى. جارىستان كەيىنگى كوڭىل كۇيىم وتە جاقسى، ويتكەنى بۇل باعا ماعان زور شابىت بەردى، ونىڭ ۇستىنە مەنىڭ كومانداداعى قىسقى وليمپيادا سپورت جارىسىنا قاتىناسۋ تولىمدىلىعىنا يە بولۋ سەنىمىمدى دە ارتتىردى، مەن بۇدان كەيىن جاتتىعۋىمدى جالعاستى كۇشەيتەمىن » دەدى.
يان حاننىڭ 2-قاراشاداعى ايشىقتى سىرعاناۋ جارىسىنداعى جەلىلى قيمىلداردى ورىنداۋى تىم شىركىناي بولمادى، ەكى رەتكى سەكىرۋدە اعاتتىق تۋىلدى. يان حان وسى رەتكى جەلىلى قيمىلدارىن كانادالىق ايگىلى كونكي ءبيىن قۇراستىرۋشى لاۋري نيك قۇراستىرعاندىعىن، قيىندىق دارەجەسىنىڭ ەرەكشە جوعارى ەكەندىگىن، ءبىرشاما قينالعاندىعىن ايتتى. ول: « مەن وسى رەتكى ەركىن سىرعاناۋعا قۇراستىرعان ءبيدى ورىنداۋ بارىسىندا ءبىرشاما قينالدىم، مۋزيكانىڭ ريتىمى مەن مازمۇنى بۇرىنعىلاردان كوپ كۇردەلى بولدى، سوندىقتان بىردەن وتە سايكەسىپ كەتە المادىم » دەدى.
يان حاننىڭ ايتۋىنشا، ەركىن سىرعاناۋ باستالاردان بۇرىن ول جاتتىقتىرۋشىمەن اقىلداسىپ، ارەكەتتەردى جاقسى ورىنداۋى نەگىزىندە قيىندىق دارەجەسىن كوپ تومەندەتكەن، سوندىقتان ول ەكى رەت اعاتتىق جىبەرگەن بولسا دا 155.48 ءنومىر العان ەكەن. ول كۇلىمسىرەگەن بەينەدە: «جارىس مايدانىندا مەن ارەكەتىمنىڭ ءساتتى – ءساتسىز بولعانىنا قاراماستان، جالعاستى سىرعاناي بەردىم، اسىلىندە ارەكەتتەردى ىقشامداعان سوڭ ءساتتى ورىنداۋعا ءتيىستى ەدىم، الايدا، ماشىقتىڭ كەمشىلدىگىنەن بە مۋزيكامەن تىم سايكەسە الماي، كوپتەگەن اعاتتىقتار تۋىلدى، سوندىقتان ءنومىر جاريالانۋدان بۇرىن، ءوز-وزىمە رازى بولمادىم، اسىرەسە سەكىرۋ جاعىندا كوپ قاتەلىك كەتتى » دەدى.
يان حان بۇرىنعىمەن سالىستىرعاندا، كەزەكتە، ەركىن سىرعاناۋعا قۇراستىرىلعان ءبيدىڭ مازمۇنى ءتىپتى دە باي بولىپ، وعان ابدەن ۇيلەسەتىندىگىن، سوندىقتان بۇدان كەيىن دە كوتەرىلۋ ورايىنىڭ بار ەكەندىگىن، ۇزدىكسىز جاتتىعۋ ارقىلى ءتىپتى دە كەمەلدەنە تۇسەتىندىگىن، جارىس ماۋسىمىنىڭ ەندى عانا باستالعاندىعىن، الداعى جارىستاردا ءوزىنىڭ دەنساۋلىعى مەن قارسىلاسىنىڭ نەگىزگى جاعدايىنا قاراي ارەكەتتىڭ قيىندىق دارەجەسىن جوعارىلاتىپ وتىراتىندىعىن ايتتى.
رەداكتورى : ءجازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.