ەگىستىك جەر داۋ-شارىن جاراستىرىپ القاۋعا بولەندى
ۇسىنىس ەتىلگەن ءتىلشى لي ميڭشىڭ حابارلايدى. «قىزمەت اترەتىنىڭ جاراستىرعانىنا العىس ايتامىز، ءبارىمىز ءبىر قىستاقتىڭ تۇرعىنىمىز، قايشىلىق شەشىلمەسە، بۇدان كەيىن شىعىسىپ ءوتۋىمىز قيىن ەدى» دەدى 5-ايدىڭ 6-كۇنى شاعانتوعاي اۋدانى جانكىسى اۋىلى جانكىسى وڭتۇستىك قىستاعىنىڭ تۇرعىنى يە ايحۋا مەن ي يانجۇن قىزمەت اترەتىنە كەلىپ، قىزمەت اترەتىنىڭ ورىنباسار باستىعى موۋ شياۋياننىڭ قولىن قىسىپ تۇرىپ.
بيىل 4-ايدىڭ باسىندا يە ايحۋا اتىز باسىنا ءبيداي مايساسىنىڭ ءوسۋ جاعدايىن كورگەلى بارعاندا، 26 مۋ اتىزىنىڭ ءبىر مۋىن كورشىسى ي تيڭجۇن يەمدەنىپ العانىن بايقايدى. ءبىر مۋ كەمەيسە 1000 نەشە يۋان كىرىس ازاياتىنىن ويلاعان ونىڭ ۋايىمنان باسى ابدەن قاتادى.
4-ايدىڭ 28-كۇنى شاعانتوعاي اۋداندىق پارتكوم ۇگىت ءبولىمىنىڭ، ادەبيەت-كوركەمونەرشىلەر بىرلەستىگىنىڭ قىستاقتا تۇراتىن قىزمەت اترەتى بۇل جاعدايدان حاباردار بولعاننان كەيىن ىرىقتىلىقپەن ارالاستى.
تامشىلاتىپ سۋارۋ كامەرىن ورناتۋعا نۇقسان جەتكىزبەۋ ءۇشىن، قىزمەت اترەتىندەگىلەر مەن قىستاق كادرى پىڭ يۋجياڭ تۇندەلەتىپ 2 قىستاق تۇرعىنىنىڭ وتباسىنا بارىپ جاعداي ۇعىسادى.
ەرتەسى قىزمەت اترەتىندەگىلەر ناق مايدانعا بارىپ مۇقيات تەكسەرۋ جۇرگىزىپ، ماڭىنداعى قىستاق تۇرعىندارىنان، كەزىندە جەر ۇلەستىرۋگە قاتىناسقان قىستاق كادرلارىنان سۇراستىرىپ، جاعدايدى ەگجەي-تەگجەيلى ۇعىسىپ، ءىستىڭ جالپى بارىسىنا جان-جاقتىلى تالداۋ جاسادى.
4-ايدىڭ 29-كۇنى قىزمەت اترەتىندەگىلەر قىستاق كادرلارىمەن بىرگە يە ايحۋا مەن ي يانجۇندى اتىز باسىنا شاقىرىپ، جەردى قايتالاي ولشەيدى. يە ايحۋانىڭ اتىزىنىڭ باس جاعىنان جارىم مۋدان استام جەردى ي يانجۇن، ي يانجۇننىڭ اتىزىنىڭ اياعىنداعى جارىم مۋعا جەتپەيتىن جەردى يە ايحۋا يەمدەنىپ الىپتى. قىزمەت اترەتىندەگىلەر مەن قىستاق كادرلارى ەكى جاقتىڭ ءىس جۇزىندىك جاعدايىنا نەگىزدەلە وتىرىپ، جەكە-جەكە يدەيالىق قىزمەت ىستەپ، ءجون-جوسىق جانە زاڭدىق تۇرعىدان ەكى جاقتى يلاندىرۋعا كۇش سالدى.
قىزمەت اترەتىندەگىلەردىڭ 3 ساعاتتان ارتىق ۋاقىت بايىپتىلىقپەن جاراستىرۋ جۇرگىزۋىنىڭ ارقاسىندا يە ايحۋا مەن ي يانجۇن اقىرى پىكىر بىرلىگىنە كەلدى. ي تيڭجۇن يە ايحۋاعا بەلگىلى مولشەردە تولەم تولەۋگە كەلىسىپ، ەكى جاق جاراستىرۋ كەلىسىمىنە قول قويىپ، قول الىسىپ تاتۋلاستى.
«قىزمەت اترەتىندەگىلەر دەرەۋ ارەكەتكە كەلىپ،ەشكىمگە بولىسپاي، قارا قىلدى قاق جارا وتىرىپ ءادىل جۇمىس ىستەدى. مۇنداي قىزمەت ستيلىنە ءبىز مويىنسالمىز» دەدى يە ايحۋا ريزاشىلىعىن ءبىلدىرىپ.
قىزمەت اترەتىندەگىلەردىڭ كورشى-قولاڭ اراسىنداعى داۋ- شاردى جاراستىرۋى قىستاق تۇرعىندارىنىڭ القاۋىنا بولەندى.
«ءىس جۇزىندىك ارەكەتىمىز ارقىلى حالىققا ناقتى ءىس ىستەپ،قيىن ىستەرىن شەشىپ، بۇقارانىڭ جۇمىسىن كوڭىل تورىنە قويىپ، شىن پەيىلىمىزبەن ىستەگەندە عانا، بۇقارانىڭ شىنايى سۇيىسپەنشىلىگىنە بولەنىپ، سەنىمىنە يە بولامىز» دەدى موۋ شياۋيان.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى