ءتىلشىمىز زىڭ جاۋمەي، ەرىكتى ءتىلشى حى شياۋيىڭ حابارلايدى. «قىزمەت اترەتى مەن قىستاق كادرلارى قىستاق تۇرعىندارىنىڭ ىستەرىن كوڭىل تورىنە قويىپ، ءوز جۇمىسىنداي كورىپ ىستەيدى. وسى رەت تامشىلاتىپ سۋارۋ باس قۇبىرىن جوندەگەندە ولار ءورلى-قىرلى شاپقىلاپ، قاجەتتى ماتەريالداردى ساتىپ اكەلۋمەن قاتار،بىرگە جوندەسىپ، ءۇستى-باستارى باتپاق بولدى. قىستاق تۇرعىندارىنىڭ بارلىعى قاتتى اسەرلەندى» دەدى جۋىقتا ساۋان قالاسى ۇلانۇس قالاشىعى حۋاڭجيالياڭ جاڭا قىستاعىنىڭ تۇرعىنى چىڭ حايجۇن.
بىرنەشە كۇننىڭ الدىندا چىڭ حايجۇن مەن 6 قىستاق تۇرعىنى 450 مۋ جەردەگى ماقتا اتىزىن تامشىلاتىپ سۋارماقشى بولعاندا اتىز باسىنداعى ورتاق ىستەتىلەتىن باس قۇبىر جارىلىپ كەتكەندىكتەن، كوپ مولشەردە سۋ قاشىپ، كامەردەن سۋ تامشىلاماي قالعانىن بايقايدى. ماقتا مايساسىنىڭ ونەتىن مەزگىلى بولعاندىقتان، ۋاقىتتى كەشەۋىلدەتۋگە بولمايتىن ەدى. ءدال وسىنداي قىسىلتاياڭ ساتتە چىڭ حايجۇن ساۋان قالالىق وقۋ-اعارتۋ جانە عىلىم-تەحنيكا مەكەمەسىنىڭ حۋاڭجيالياڭ جاڭا قىستاعىندا تۇراتىن قىزمەت اترەتىنە تەلەفون سوعىپ جاردەم سۇرايدى.
قىزمەت اترەتى مەن قىستاق «ەكى كوميتەتى» دەرەۋ ارەكەتتەنىپ، جۇمىستى بولىسە ىستەدى، قىزمەت اترەتىندەگىلەر قالاعا قاجەتتى ماتەريالداردى الۋعا اتتانسا،قىستاق كادرلارى مەن قىستاق تۇرعىندارى شۇعىل جوندەۋدىڭ دايىندىق قىزمەتىنە كىرىسەدى. ءبىر ساعاتتان كەيىن ماتەريال اتىز باسىنا جەتكىزىلەدى. قۇبىر جارىلىپ كەتكەندىكتەن، ماشينامەن قازۋعا كەلمەي، قۇبىر جولىن ادام كۇشىمەن قازۋعا تۋرا كەلەدى. كوپشىلىك 4 ساعاتتا 2 مەتردەن استام تەرەڭدىكتەگى قۇبىردىڭ جارىلعان جەرىن زورعا تابادى.
قىزمەت اترەتىندەگىلەر قىستاق تۇرعىندارىمەن بىرگە قۇبىر جولىنا ءتۇسىپ، جارىلعان قۇبىردى الماستىرۋعا كىرىستى. قۇبىر جولىن جالعاستى تەرەڭدەتىپ قازىپ، قۇبىردىڭ جارىلعان جەرىنىڭ ۇزىندىعىن ولشەپ، ءبۇتىنىن سالىپ، اشامالى قۇبىردى جالعايدى، كوپشىلىك شارشاپ-شالدىققاندارىنا قاراماي، ونە بويلارىنىڭ بىلعانعانىن ەلەڭ قۇرلى كورمەي، تىعىز سەلبەسىپ، قۇبىردى تەز ارادا الماستىرىپ بولادى. تامشىلاتىپ سۋارۋ كامەرىنەن سۋ شىققاندا كوپشىلىكتىڭ جۇزىنەن قۋانىش لەبى ەستى.
اسىلىندە،اتىزداعى وسى تامشىلاتىپ سۋارۋ باس قۇبىرىنا 6 جىل بولعاندىقتان، كونەرىپ،ءپىشىنى وزگەرىپ، سۋ قىسىمىنا توزە الماي جارىلىپ كەتكەن ەكەن. دەر كەزىندە شۇعىل جوندەلگەندىكتەن قىستاق تۇرعىندارىنا زيان تۋدىرماعان.
قىستاق تۇرعىنى مەيرام قىدىردىڭ وتباسىندا 5 مۋ جەر بار. جەرى از، قىستاقتان الىس بولعاندىقتان، تامشىلاتىپ سۋارۋ كامەرى ورناتىلماي، ەگىن سۋارۋ قولايسىز بولىپ كەلگەن. بيىل جەرىن كوتەرمەگە بەرەتىن ادام تابىلماي، تۇقىم سەبۋدىڭ وڭتايلى ءساتى ءوتىپ بارا جاتقانىنا قاراپ تىقىرشىپ وتىرعان بولاتىن.
قىستاق پارتيا ياچەيكاسىنىڭ شۋجيى جىڭ گوحۋا مۇنان حابار تاپقان سوڭ ءوز قالتاسىنان 2 مىڭ يۋاننان ارتىق اقشا شىعارىپ، تامشىلاتىپ سۋارۋ جابدىقتارىن ساتىپ اكەلىپ، قىزمەت اترەتىنىڭ باستىعى، قىستاقتىڭ ءبىرىنشى شۋجيى ما حايلۇڭ ەكەۋى قۇبىر جولىن قازىپ، جىڭىشكە قۇبىرلاردى جالعاپ، جارىم كۇن ابىگەر بولىپ، مەيرام وتباسىنىڭ اتىزىنا تامشىلاتىپ سۋارۋ كامەرىن ورناتىپ، ونىڭ جۇگەرى تۇقىمىن دەر كەزىندە سەبۋىنە مۇمكىندىك جاراتتى.
«قىستاق كادرلارىنا،قىزمەت اترەتىندەگىلەرگە العىس ايتامىن،تۇرمىستا، وندىرىستە جولىققان قيىنشىلىقتارىمدى ۇنەمى شەشىمدەپ كەلەدى. قازىر ءبىزدىڭ اتىزىمىزعا دا تامشىلاتىپ سۋارۋ قۇرىلعىسى ورناتىلدى، جۇگەرى سۋارۋعا قولايلى بولۋمەن بىرگە، ءونىم مولشەرى دە ارتاتىندىعى مۇندا تۇر. ەندى 30 تۇياق قوي باعىپ، 5 مۋ جەردەگى جۇگەرىنى جەم-شوپكە پايدالانىپ، ەگىمشىلىك پەن باعىمشىلىقتان قاتار مول ءونىم الۋدى جوسپارلاپ وتىرمىن» دەدى مەيرام كوڭىلدەنە.
ما حايلۇڭ: «تامشىلاتىپ سۋاراتىن باس قۇبىردى جوندەۋ، اتىزعا تامشىلاتىپ سۋارۋ كامەرىن ورناتۋ جانە ەڭبەككۇشى جەتىسپەيتىن قىستاق تۇرعىندارىنا كومەكتەسۋ ارقىلى پارتيا مۇشەلەرى مەن كادرلاردىڭ پارتيا تاريحىن ۇيرەنۋ تاربيەسىنەن قابىلداعان اقىل-پاراساتى مەن كۇش-قۋاتىن قىستاق تۇرعىندارىنا قىزمەت وتەۋ قابىلەتىنە اينالدىرىپ، قىزمەت وتەۋ ارقىلى جۇرەكتەرگە جىلۋلىق سيلاپ، بۇقارا اسىعىپ وتىرعان، قينالىپ وتىرعان، ۋايىمداپ وتىرعان، كۇتىپ وتىرعان ىستەردى ويداعىداي ىستەپ،اۋىل-قىستاقتى گۇلدەندىرۋگە ۇلەس قوسامىز» دەدى.
ساۋان قالاسى ۇلانۇس قالاشىعى حۋاڭجيالياڭ جاڭا قىستاعى «مەن بۇقارا ءۇشىن ناقتى ءىس ىستەيمىن» امالياتتىق قيمىلىن ورىستەتۋ ارقىلى پارتيا مۇشەلەرى مەن كادرلاردىڭ ستيلگە بۇرىلىس جاساۋىن جۇزەگە اسىرىپ، پارتيا مۇشەلەرى مەن كادرلاردى ساياسي سانالىلىقتى، يدەيالىق سانالىلىقتى، ارەكەت سانالىلىعىن ۇزدىكسىز كۇشەيتۋگە جىگەرلەندىرىپ، پارتيا تاريحىن ۇيرەنۋ تاربيەسىنىڭ جەتىستىكتەرىن ناقتى ارەكەتكە اينالدىرۋدى شىن مانىندە ىلگەرىلەتتى. قازىرگە دەيىن بۇقارانىڭ اسىعىپ وتىرعان، قينالىپ وتىرعان، ۋايىمداپ وتىرعان، كۇتىپ وتىرعان ىستەرىنەن 11 ىن شەشىم ەتكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى