ءتىلشىمىز ۋاڭ تيڭ،ەرىكتى ءتىلشى چىن تاۋ حابارلايدى. «جەردىڭ ‹ءۇش ۇقىعىن ءبولىپ ورنالاستىرۋ› دەگەن نە؟» «قارىز اقشانىڭ كەلىسىمدى ءوسىمى تىم جوعارى بولسا قايتۋ كەرەك؟»... 1-ايدىڭ 4-كۇنى شاعانتوعاي اۋداندىق حالىق پروكۋراتۋراسىنىڭ كادر- ساقشىلارى «جۇڭحۋا حالىق رەسپۋبليكاسىنىڭ ازاماتتىق زاڭناماسىن» الىپ،جاڭاجەر اۋىلى ىنتىماق باتىس قىستاعىنداعى «وتباسىلىق كىتاپ ۇيىنە» بارىپ،قىستاق تۇرعىندارىنا ءبىر مايدان اشىق ساباق ءوتتى.
اشىق ساباقتا كادر-ساقشىلار قىستاق تۇرعىندارىنا ازاماتتىق زاڭنامانى،سونداي-اق قىستاق تۇرعىندارىنىڭ ءوندىرىس-تۇرمىسىمەن تىعىز قاتىستى جەردى كوتەرمەگە الىپ تيجارات جۇرگىزۋ ۇقىعى،قورا- جايلىق جەردەن پايدالانۋ ۇقىعى، ۇيلەنۋ،وتباسى سياقتىلارعا قاتىستى زاڭ بىلىمدەرىن ءتۇيىندى تۇردە ۇگىتتەپ،قىستاق تۇرعىندارىن زاڭ قارۋىنان پايدالانىپ،زاڭدى ۇقىق-مۇددەسىن قورعاۋعا جەتەلەدى.
«ءبىز ازاماتتىق زاڭناماداعى جەردىڭ مەنشىك ۇقىعى،كوتەرمەگە الۋ ۇقىعى جانە تيجارات جۇرگىزۋ ۇقىعىنىڭ مازمۇنىن تانىستىرىپ، ماڭايىمىزدا تۋىلعان دەلو مىسالدارى مەن ناق بولعان ىستەردى قىستاق تۇرعىندارىنا جەتكىزۋ ارقىلى قىستاق تۇرعىندارىن زاڭنان پايدالانا بىلۋگە، زاڭنان حاباردار بولۋعا،زاڭدى تۇسىنۋگە جەتەلەدىك» دەدى اۋداندىق حالىق پروكۋراتۋراسى پارتيا باسشىلىق گرۋپپاسىنىڭ مۇشەسى،ورىنباسار باس پروكۋرورى شۇي دىڭجوۋ.
كەڭەس بەرۋ قيمىلىندا شاعانتوعاي اۋداندىق حالىق پروكۋراتۋراسىنىڭ كادر-ساقشىلارى قىستاق تۇرعىندارى كوڭىل بولەتىن باس اماندىعىنا زيان جەتكىزۋ تولەمى،كورشىلەر ارا قاتىناس سياقتى ماسەلەلەرگە قاراتا تۇرمىستاعى زاڭعا ساياتىن داۋ-شارلار مەن سايكەستى ۇقىعىن قورعاۋ جولدارى جونىندە ەگجەي-تەگجەيلى تۇسىنىك جاسادى.
«وسى رەتكى زاڭ جالپىلاستىرۋ ۇگىت-لەكسياسى زاڭمەن جونگە سالۋ وي جەلىسىمەن وي-سانانى قارۋلاندىرىپ،قايشىلىقتاردى زاڭمەن جونگە سالۋ تاسىلىمەن شەشۋىمىزگە كومەكتەستى» دەدى لەكسيانى بار زەيىنىمەن تىڭداپ،مول بىلىمگە يە بولعان ىنتىماق باتىس قىستاعىنىڭ اماندىقتى قورعاۋعا جاۋاپتى مەڭگەرۋشىسى ۋاڭ جىن. ول: «مەن ۇيرەنگەن بىلىمدەرىمدى كۇندەلىكتى ءوندىرىس-تۇرمىس بارىسىندا قولدانىپ،ازاماتتىق زاڭنامادان پايدالانىپ،كورشى-قولاڭدار اراسىنداعى داۋ-شاردى جاراستىرىپ،قىستاق تۇرعىندارىن سانالىلىقپەن زاڭعا بويسۇناتىن،بىرەر ماسەلەگە جولىققاندا زاڭعا جۇگىنەتىن ادەت قالىپتاستىرۋعا باستايمىن» دەدى.
«ازاماتتىق زاڭنامانىڭ قامتيتىن كولەمى وتە كەڭ بولىپ،‹قوعامدىق تۇرمىستاعى ەنسيكلوپەديا› دەگەن اتى بار،قىستاق كادرى رەتىندە مەن ازاماتتىق زاڭنامانى مۇقيات ۇيرەنىپ، اۋىل-قىستاقتاعى ناقتى قىزمەت بارىسىندا پايدالانامىن» دەدى قىستاق كادرى جاۋ فۋچياڭ.
«ازاماتتىق زاڭناما — حالىقتىڭ زاڭناماسى،بۇقارانىڭ تۇرمىسىمەن تىعىز قاتىستى. ىندەتتەن ساقتانۋ-تىزگىندەzۋ بايلانىسىمەن ءبىز قىستاقتارعا بارىپ وتباسىلارىن ارالاۋ،بەتپە-بەت ۇگىتتەۋ سياقتى جەرگىلىكتى جاعدايعا ۇيلەسەتىن ۇگىت فورماسى ارقىلى بۇقارانىڭ ازاماتتىق زاڭنامادان حاباردار بولۋىنا،ازاماتتىق زاڭنامانى تۇسىنۋىنە مۇمكىندىك جاراتتىق. بۇدان كەيىن ءبىز جەلىلەس قيمىلدار وتكىزىپ،دەلو مىسالى ارقىلى زاڭدى ءتۇسىندىرىپ،ازاماتتىق زاڭنامانى اناعۇرلىم وبرازدى،جاندى تۇردە كوپشىلىكتىڭ تۇرمىسىنا جەتكىزبەكشىمىز» دەدى شۇي دىڭجوۋ.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى