ۇسىنىس ەتىلگەن ءتىلشى لي ميڭشىڭ،ەرىكتى ءتىلشى ۋاڭ زىشۋاڭ حابارلايدى. 7-ايدىڭ 4-كۇنى تارباعاتاي شەكارا باسقارۋ تارماق اترەتى شاعانتوعاي اۋداندىق قاراكەمەر شەكارا ساقشى بولىمشەسى «بەيمالىم جابايى حايۋاناتتىڭ» ءۇي قۇستارىنا شابۋىلداۋ وقيعاسىن ءبىر جايلى ەتتى ءارى وقيعا تۋدىرعان «باسبۇزار» — مەملەكەتتىك ەكىنشى دارەجەلى قورعالاتىن حايۋانات بورسىقتى شاعانتوعاي اۋداندىق قوعام حاۋىپسىزدىگى مەكەمەسى ورمان ساقشى بولىمشەسىنە تاپسىرىپ بەردى.
جاقىننان بەرى شەكارا ساقشى بولىمشەسىنە شاعانتوعاي اۋدانى جانكىسى اۋىلى جىلاندى قىستاعىنىڭ بۇقارالارى ءبىر جابايى حايۋاناتتىڭ ءالسىن-ءالى ءۇي قۇستارىنا شابۋىلداپ،جىلاندى قىستاعىنداعى 3 قىستاق تۇرعىنىنىڭ 30 دان استام تاۋىعىن جەگەنىن قايتا-قايتا اڭىس ەتەدى.
7-ايدىڭ 4-كۇنى شەكارا ساقشى بولىمشەسى جىلاندى قىستاعىنىڭ تۇرعىنى جاڭ جىفاڭنىڭ مالىمدەۋ تەلەفونىن تاعى دا قابىلدايدى. شەكارا ساقشى بولىمشەسىنىڭ حالىق ساقشىسى دەرەۋ جاڭ جىفاڭنىڭ ۇيىنە بارىپ جاعداي يەلەپ،ءبىر «بەيمالىم جابايى حايۋانات» قوراعا ءتۇسىپ تاۋىق جەپ جاتقاندا يتكە تالانىپ،ودان ارى قاشىپ بارىپ قۇبىر قۇدىعىنا ءتۇسىپ كەتكەنىن بىلەدى. حالىق ساقشىسى دەرەۋ قۇبىر قۇدىعىنىڭ اينالاسىن تورمەن قورشاپ،امالىن تاۋىپ جابايى حايۋاناتتى قۋىپ شىعارىپ،«تىرىدەي قولعا تۇسىرەدى».
حالىق ساقشىسى جابايى حايۋاناتتى شەكارا ساقشى بولىمشەسىنە اپارىپ تەكسەرىپ،مامانداردان كەڭەس سۇراپ،انىقتاعاننان كەيىن عانا بۇل بەيمالىم جابايى حايۋاناتتىڭ مەملەكەتتىك ەكىنشى دارەجەلى قورعالاتىن حايۋانات بورسىق ەكەنىن بىلەدى. شەكارا ساقشى بولىمشەسىنىڭ حالىق ساقشىسى بورسىقتىڭ جاراقاتىن تاڭعاننان سوڭ،ونى ورمان ساقشى بولىمشەسىنە تاپسىرىپ بەرەدى.
«مۇقيات تەكسەرىپ كورسەك بۇل بورسىقتىڭ الدىڭعى سيراعى جارالانعان ەكەن،جاراقاتى جازىلعاننان كەيىن تابيعات قۇشاعىنا قويا بەرمەكشىمىز» دەدى ورمان ساقشى بولىمشەسىنىڭ جەتەكشىسى جاڭ يۇڭ.
ۇعىسۋعا قاراعاندا،بورسىق سۋسار تۇقىمداسىنىڭ بورسىق تۋىسىنا جاتاتىن،شابۋىلداۋ قاسيەتىنە يە جىرتقىش حايۋانات ەكەن،وعان ۇشىراسىپ قالعاندا توتە ۇستاي سالامىن دەپ تاۋەكەلگە باسۋعا بولمايدى،ايتپەگەندە قاۋىپ الىپ،جارالاپ كەتۋى ابدەن مۇمكىن،الدا-جالدا جارالاپ كەتسە،ءسوزسىز،دەرەۋ ەمدەلۋ كەرەك.
جاقىنعى جىلداردان بەرى شاعانتوعاي اۋدانى ەكولوگيالىق ورتانى قورعاۋ مەن وڭاۋدى ۇزدىكسىز كۇشەيتىپ،ەكولوگيالىق ورتاسى كۇننەن-كۇنگە جاقسارىپ،بۇقارانىڭ جابايى حايۋاناتتاردى ايالاۋ،قورعاۋ تانىمى كورنەكتى جوعارىلاپ،جابايى حايۋاناتتاردىڭ سانى دا كورنەكتى ارتقان ەكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى