تۇتاس لەنيانىڭ بەلەت باعاسى ءبىر يۋان،ەڭ ۇزاق لەنيا 120 كيلومەتر
ءتىلشىمىز ۋىن بو،ءسۇبھي ياسىن حابارلايدى. «ءبىر-اق يۋان با سوندا؟»، «ءبىر-اق يۋان!». جاسىل ءتۇستى كوشە اۆتوبۋزى جول شەتىندە توقتاپ تۇر، اۆتوبۋزدىڭ ەسىگىندە تۇرعان ورتا جاستارداعى ءبىر ايەل سەنەر-سەنبەسىن بىلمەي،شوفەردەن داۋىستاپ سۇراپ جاتتى.
بەلەت باعاسى جونىندەگى بۇل اڭگىمە 7-ايدىڭ 1-كۇنى تۇستەن كەيىن قوبىقسارى موڭعۇل اۆتونوميالى اۋدانىنىڭ شازىعايتى اۋىلىندا بولعان ەدى. بەلەت باعاسىن سۇراپ تۇرعان ادام شازىعايتى اۋىلى شازىعايتى قىستاعىنىڭ تۇرعىنى گۇڭ ليحۋا بولاتىن،قالا مەن اۋىل ورتاسىنا قاتىناعان كوشە اۆتوبۋزىنا تۇڭعىش وتىرعان ونىڭ كوڭىلىندە ءالى دە كۇدىك بار ەدى.
«اۆتوبۋزعا قاي جەردەن وتىردىڭىز؟بەلەت باعاسى ءبىر يۋان با ەكەن؟كىرە اۆتوموبيلى قانشا اقشا الۋشى ەدى؟» اقشا ساندىعىنا اقشانى سالىپ،بوس ورىنعا جايعاسقان گۇڭ ليحۋا جانىندا وتىرعان تۋيادان تاقاۋىرلاپ سۇراي جونەلدى.
«بۇل اۆتوبۋز قايدا بارسا دا ءبىر يۋان الادى،كىرە اۆتوموبيلى وتە قىمبات،45 يۋان الادى اۋەلى!». تۋيا گۇڭ ليحۋاعا ءوزىنىڭ اۋدان قالاشىعىندا تۇراتىنىن،شاحتى اۋىلىندا قىزمەت ىستەيتىندىگىن،بىلتىردىڭ وزىندە اپتا سايىن قايتىپ 4000 يۋانعا جۋىق كىرە اقى تولەگەنىن ايتىپ بەردى.
6-ايدىڭ 30-كۇنى قوبىقسارى اۋدانى قالا مەن اۋىل ورتاسىنا قاتىنايتىن 3 الەۋمەتتىك كوشە اۆتوبۋز لەنياسىن اشىپ،قالا مەن اۋىل ورتاسىنا الەۋمەتتىك كوشە اۆتوبۋز قاتىناۋدىڭ تولىق قامتۋىن جۇزەگە اسىردى. اۋدان قالاشىعى مەن قوبىقسارى قالاشىعىن ورتالىق ەتكەن وسى 3 لەنيادا ءارقايسى اۋىل، قالاشىق،فەرماعا اۆتوبۋز قاتىنايدى،تۇتاس لەنيانىڭ بەلەت باعاسى ءبىر يۋان،ءار كۇنى 14 كەزەك قاتىناپ،جالپى 400 كيلومەتردەن استام جول باسادى.
گۇڭ ليحۋا وتىرعان وسى الەۋمەتتىك كوشە اۆتوبۋزدىڭ قاتىناۋ لەنياسى ەڭ ۇزاق بولىپ،ءار كۇنى اۋدان قالاشىعىنان شىعىپ 120 كيلومەتر جول باسىپ،شاحتى اۋىلىنا بارادى ءارى قايتا ورالادى. جول بويىندا 5 اۋىل، قالاشىق،فەرما مەن بيڭتۋاننىڭ ءبىر تۋان الاڭىنا ايالدايدى،شازىعايتى اۋىلى وسىلاردىڭ ىشندەگى ءبىر بەكەت ەسەپتەلەدى ەكەن.
قوبىقسارى اۋدانىنىڭ جەر اۋماعى كەڭ، قاراستىلىعىنداعى جالپى جەر كولەمى 30 مىڭ شارشى كيلومەتر بولىپ،11 اۋىل،قالاشىق، فەرما سولتۇستىك،وڭتۇستىك جانە باتىس وڭىرىنە ورنالاسىپ،40 مىڭنان استام ءار ۇلت بۇقاراسى بىتىراي قونىستانعان. قالا مەن اۋىل ورتاسىنا الەۋمەتتىك كوشە اۆتوبۋز قاتىناۋدان بۇرىن بۇل وڭىردەگى تۇرعىندار جەكە اۆتوموبيلدەرىمەن نەمەسە كىرە اۆتوموبيلىمەن اۋدان قالاشىعىنا،كورشىلەس اۋىل،قالاشىق، فەرمالارعا قاتىناپ تۇراتىن.
«اۋدان قالاشىعىن ورتالىق ەتە وتىرىپ سولتۇستىك،وڭتۇستىك جانە باتىس باعىتتا ءۇش لەنيا اشقاندا،بارلىق اۋىل،قالاشىق،فەرمالاردى اۋدان قالاشىعىمەن تۇتاستىرۋعا بولادى» دەدى اۋداندىق قاتىناس ـ تاسىمال مەكەمەسى پارتيا باسشىلىق گرۋپپاسىنىڭ شۋجيى لي حۇڭلين. ول تاعى دا: « بيىل ءار ۇلت بۇقاراسىنىڭ جولاۋشىلاۋى قيىن بولۋ جانە جول اقىسى قىمبات بولۋ ماسەلەسىن شەشۋ ءۇشىن،اۋداندىق پارتكوم مەن ۇكىمەت 3 ميلليون 260 مىڭ يۋان قارجى جۇمساپ،ورتانى قورعايتىن 4 اۆتوبۋز ساتىپ الىپ، ارناۋلى تاسىمال لەنياسىن اشىپ،شينجياڭ بويىنشا قالا مەن اۋىل ورتاسىنا الەۋمەتتىك كوشە اۆتوبۋز قاتىناۋدىڭ تولىق قامتۋىن الدىمەن جۇزەگە اسىردى» دەدى.
لەنيا ىسكە تۇسكەننەن كەيىن 4 الەۋمەتتىك كوشە اۆتوبۋزى ءار جولى جولاۋشىعا لىق تولعان. الەۋمەتتىك كوشە اۆتوبۋزىنا وتىرىپ جۇمىس ىستەۋگە،وقۋعا،اۋرۋ كوسەتۋگە اتتانعان جولاۋشىلار اۆتوبۋزدى «ءبىر يۋاندىق اۆتوبۋز» دەپ اتاسىپ كەتىپتى.
«ءبىر يۋاندىق اۆتوبۋزدىڭ» قاتىناۋى باياندى بولاما؟بۇعان اۋداندىق الەۋمەتتىك كوشە اۆتوبۋز سەرىكتەستىگىنىڭ جاۋاپتىسى نامكىن ءتوربايىر سەنىمدى جاۋاپ قايتاردى. ول: «اۋداندىق پارتكوم، ۇكىمەت الەۋمەتتىك كوشە اۆتوبۋزدارىنىڭ قاتىناس قاراجاتىن اۋداننىڭ قازىنا مەجە ەسەبىنە ەنگىزىپ،ناقتى قارجىمەن لەنيانىڭ ىسكە قوسىلۋىنا كەپىلدىك ەتىپ،بۇقارانىڭ ءجۇرىس-تۇرىسىنا قولايلىلىق جاراتادى» دەدى.
قوبىقسارى موڭعۇل اۆتونوميالى اۋدانىنداعى قاتىستى تاراۋلاردىڭ قازىرگى كەزەكشى اۆتوبۋز سانى مەن جولاۋشى مولشەرىنە نەگىزدەلە وتىرىپ مەجەلەۋىنشە،قالا مەن اۋىل ورتاسىنا جىلىنا 5000 كەزەكتەن ارتىق كوشە اۆتوبۋز قاتىناپ،ءبىر ميلليون كيلومەتر جول باسىپ،200 مىڭ ادامنان(رەت) استام جولاۋشى تاسىمالدايدى ەكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى