حالىقتىڭ قۇرمەتىنە بولەنگەن ادال قورعاۋشى رىن چاڭشيا

  رىن چاڭشيانىڭ سۋرەتى
  □ شينحۋا اگەنتتىگى تاراتقان
  دىڭفىڭ قالاسىنداعى رىن چاڭشيانىڭ ىزگى ىستەر كورمە سارايىندا ەكسكۋرسيالاعان ادامداردىڭ اياعى  ۇزىلمەدى. كورمە سارايىنداعى سۋرەت،ناقتى زات جانە بەينەجازبا ماتەريالى سياقتىلار رىن چاڭشيانىڭ   «الەۋمەت ءۇشىن ساقشىلىق مىندەت وتەپ، حالىق ءۇشىن زاڭ اتقارعان» ءومىرىن بەينەلەپ تۇر.

رىن چاڭشيا 1964-جىلى دۇنيەگە كەلگەن،حىنان ولكەسىنىڭ سۇيشيان اۋدانىنان. 1983-جىلى ساقشى مەكتەبىنەن وقۋ تاۋىسىپ، جىڭجوۋ قالالىق قوعام حاۋىپسىزدىگى مەكەمەسى جۇڭيۋان بولىمشە مەكەمەسىنە ءبولىنىپ، ازىرلىك تەرگەۋ قىزمەتىمەن اينالىسادى. 1992-جىلى 12-ايدا جۇڭگو كوممۋنيستىك پارتياسىنا مۇشە بولادى. كوزى تىرىسىندە دىڭفىڭ قالالىق قوعام حاۋىپسىزدىگى مەكەمەسىنىڭ باستىعى بولاتىن.

ساقشىلىق قىزمەتپەن اينالىسقان 21 جىلدا ول حالىق بۇقاراسىنىڭ مۇڭ-مۇقتاجىن جانە حال-جايىن باستان-اياق كوكەيىندە ساقتاپ،ادالدىقپەن مىندەت وتەپ،جاۋاپكەرشىلىگىن ادا ەتىپ،سول جەردىڭ تىنىشتىعىن قورعاپ، بۇقارانىڭ جاپپاي القاۋىنا بولەندى. رىن چاڭشيا كەزىندە كوپ رەت ەڭبەك كورسەتىپ ماراپاتتالدى، مەملەكەتتىك 1-مامىر ەڭبەك مەدالىنىڭ يەگەرى، مەملەكەتتىك قىزمەت ورنىنداعى جاس مايتالمان، مەملەكەتتىك 8-مارت قىزىلتۋشىسى، مەملەكەتتىك ۇزدىك حالىق ساقشىسى سياقتى 40 رەتتەن استام ءتۇرلى داڭقتى اتاقتارعا يە بولعان.

توسەلگەن كاسىپتىك ساپا،كۇشتى جاۋاپكەرشىلىك سەزىم بولعاندىقتان، ەشقانداي قىلمىس كۇماندىسى رىن چاڭشيانىڭ قولىنان سىتىلىپ شىققان ەمەس. ساناققا نەگىزدەلگەندە،رىن چاڭشيا جۇڭيۋان بولىمشە مەكەمەسىنىڭ ازىرلىك تەرگەۋ بولىمىندە قىزمەت ىستەگەن ارالىقتا 1072 رەت قالدىق قىلمىستى اشىپ، ىركۋلى دەلونى  شەشىپ،950 نەشە قىلمىس كۇماندىسىن ۇستاپ اكەلىپ، حىناننىڭ قوعام حاۋىپسىزدىگى ازىرلىك تەرگەۋ  تاريحىندا تەڭدەسسىز ناتيجە جاراتتى.

2001-جىلى 4-ايدا رىن چاڭشيا دىڭفىڭ قالالىق قوعام حاۋىپسىزدىگى مەكەمەسىنىڭ باستىقتىعىنا تاعايىندالىپ، حىنان ولكەسى قوعام حاۋىپسىزدىگى جۇيەسى بويىنشا تاريحتان بەرگى قوعام حاۋىپسىزدىگى مەكەمەسىنىڭ تۇڭعىش رەتكى ايەل باستىعى بولادى. جەرگىلىكتى ورىندا ءتۇرلى ىركۋلى دەلو توتەنشە كوپ توپتالعاندىقتان،رىن چاڭشيا «100 كۇندە دەلو شەشۋ شايقاسىن» ۇيىمداستىرادى. اسىرەسە، دىڭفىڭ بايشا كولى بويىنداعى زاڭسىز قاماعان،قۇقايمەن تارتىپ العان، بەيۋازداردى ۇرعان، ولتىرگەن، حالىقتىڭ نارازىلىعى ەرەكشە كۇشتى بولعان ۋاڭ سۇڭ قارا قوعام سيپاتىنداعى  قىلمىستىق توبى الدىندا رىن چاڭشيا ىجداعاتتىلىقپەن بارلاۋ جۇرگىزىپ،شەبەرلىكپەن ءادىس-امال قولدانىپ، كادر-ساقشىلاردى ۇيىمداستىرىپ، ۋاڭ سۇڭدى جانە ونىڭ توبىنداعى 65 مۇشەنى تۇگەلدەي زاڭ تورىمەن  قۇرىقتايدى. ءىرى دەلو،ماڭىزدى دەلو جانە كۇماندى-قيىن دەلولاردى ارت-ارتىنان شەشكەندىكتەن، جەرگىلىكتى بۇقارا الاقايلاپ، دىڭفىڭعا «ايەل قىران ساقشى» كەلدى دەسەدى.

2004-جىلى 4-ايدىڭ 14-كۇنى كەشتە،رىن چاڭشيا جىڭجوۋ قالالىق قوعام حاۋىپسىزدىگى مەكەمەسىنە قىزمەتتەن مالىمەت بەرىپ،  ەلەۋلى دەلونى شەشۋ قىزمەتىنە ورنالاستىرۋ جاساماقشى بولىپ دىڭفىڭعا تۇندەلەتىپ قايتقان جولىندا باقىتقا قارسى كولىك اپاتىنا ۇشىراپ نەبارى 40 جاسىندا قايتىس بولادى. 2004-جىلى 5-ايدىڭ 1-كۇنى مەملەكەت بويىنشا قوعام حاۋىپسىزدىگى جۇيەسىندەگى 1-دارەجەلى قاھارمان ۇلگى اتاعى تولىقتاپ بەرىلدى،2019-جىلى 9-ايدا ول تاعى «ەڭ ارداقتى  كۇرەسكەر» اتاعىنا يە بولدى.

رىن چاڭشيا دىڭفىڭ قالاسىنىڭ  ليانتيان الەۋمەتتىك قابىرىنا جەرلەنەدى،دىڭفىڭ قالالىق قوعام حاۋىپسىزدىگى مەكەمەسى ءار جىلى حالىق ساقشىلارىن ازا تۇتۋ قيمىلىن ورىستەتۋگە ۇيىمداستىرىپ،رىن چاڭشيانىڭ داڭقتى ىزگى ىستەرىن ەسكە الىپ، رىن چاڭشيانىڭ رۋحىن اسقاقتاتادى.

   «شەشەم قايتىس بولعالى 16 جىلدىڭ ءجۇزى بولايىن دەدى، مەنىڭ ساقشىلىق كاسىبىمەن اينالىسقانىما دا 11 جىل بولدى. ساقشى بولعاننان كەيىن ساقشىنىڭ وكىنىشسىز ارقالاعان  جاۋاپكەرشىلىگىن ءتىپتى دە ءتۇسىندىم، مەن شەشەمنىڭ سالعان ىزىمەن قۇلشىنا العا باسىپ، بۇقارانىڭ     اماندىعىن بار زەيىنىممەن، سۇيىسپەنشىلىگىممەن، ماحابباتىممەن    قورعايمىن». رىن چاڭشيا قۇربان بولعاندا ۇلى ۋي چىنياۋ 17 جاسقا تولماعان ەدى، بۇگىنگى كۇنى 32 جاسقا كەلىپ، جىڭجوۋ قالالىق قوعام حاۋىپسىزدىگى مەكەمەسىندە حالىق ساقشىسى مىندەتىن وتەيدى،«مەن شەشەمنىڭ ورىندالماعان ارمانىنا   مۇراگەرلىك ەتىپ، ادالدىق قاسيەتتى ماڭگى ساقتاپ، حالىقتى سۇيەتىن جاقسى ساقشى بولامىن».



رەداكتورى : ارداق كامالقان قىزى
 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى