ءتىلشىمىز احات سانياز، جاڭ پەيچي، داي جياۋمەي حابارلايدى. ءدوربىلجىن اۋدانى مارالسۋ قالاشىعى ۇلانبۇقا قىستاعىندا تۇراتىن لي يۇڭجۇن 4 جىلدىڭ الدىندا ۇستىنە كاستوم-برولكا كيىپ، بۇكتەمەلى كومپيۋتەرىن كوتەرىپ، IT سالاسىمەن شۇعىلداناتىن كاسىپتىك شەبەردىڭ ءبىرى ەدى. ال، بۇل كۇندە باعىمشىلىق تەحنيكاسى مەن جەم-ءشوپ مانەرلەۋ سياقتىلاردى اۋىزعا العاندا الدىنا جان سالمايتىن تاجىريبەسى مول ناعىز «اۋىل شارۋاشىلىق شەبەرىنە» اينالدى.
بىرنەشە كۇننەن بەرى، ءدوربىلجىن اۋدانىنىڭ تەمپەراتۋراسى ۇزدىكسىز جوعارىلاپ، شينجياڭ مايىر ازىق-تۇلىك شەكتى سەرىكتەستىگىنىڭ ورگانيكالى مال شارۋاشىلىق ونىمدەرىن ميكروپسىزداندىرۋ زاۆودىنىڭ ءىشى ءتىپتى دە قىزا ءتۇستى، القا باستىعى بولعان لي يۇڭجۇن ءار كۇنى قىزمەتكەرلەردى باستاپ وسىندا شارلاپ تەكسەرۋ جۇرگىزەدى. لي يۇڭجۇن ماڭداي تەرىن ءسۇرتىپ قويىپ: «مال باعۋدان باستاپ ەت ونىمدەرىن جىنتىكتەپ مانەرلەۋگە دەيىنگى ءارقايسى بۋىندى قايتا-قايتا تەكسەرىپ، ونىمدەردىڭ زاۆودتان جوعارى ساپامەن شىعۋىنا كەپىلدىك ەتەمىز» دەدى.
جىلدىق ەڭبەكاقىسى 800 مىڭ يۋاندىق قىزمەتتەن باس تارتىپ،اۋىلعا قايتىپ ورگانيكالى ەت ونىمدەرىن مانەرلەۋ-ساتۋ كاسىبىمەن شۇعىلدانۋ لي يۇڭجۇن جونىنەن ءبىر مەزەتتىك قىزبالىق ەمەس. «ءدوربىلجىن اۋدانى ‹جۇڭگوداعى اتى ايگىلى جاسىل اۋدان› جانە ‹مەملەكەت دارەجەلى ەكولوگياسى يقۋاتتى رايون›، جاسىل ءتۇستى ورگانيكالى ونىمدەردى جەگىڭ كەلسە اۋىلعا قايت!» دەگەن دوسىنىڭ ءبىر اۋىز ءسوزى لي يۇڭجۇننىڭ اۋىلعا قايتىپ شارۋاشىلىق قۇرۋعا بولعان بەكىمىن بەكەمدەي ءتۇستى.
2015-جىلى لي يۇڭجۇن قىزمەتىنەن باس تارتىپ، ۇلانبۇقا قىستاعىنا قايتىپ كەلدى. ءومىر بويى شارۋا بولىپ وتكەن اكە-شەشەسى ونىڭ تالعامىنىڭ بايىبىنا بارا المايدى. «اۋىل-قىستاقتان ارەڭ قۇتىلعاندا قايتىپ كەلىپ نە ىستەمەكشىسىڭ؟» دەگەن سياقتى وتباسىنداعىلاردىڭ تۇسىنبەستىگىنە لي يۇڭجۇن تەك ءبىر جاعىنان ىستەي ءجۇرىپ، ءبىر جاعىنان ۇيىندەگىلەرىنە يدەيالىق قىزمەت جاسايدى. ول: «قازىر جەم-ءشوپ، باعىمشىلىق سياقتىلارعا باپاندايمىن، مۇنىڭ ءبارىن اكەم مەن اۋىلداستاردان ۇيرەنگەنمىن» دەدى.
ورگانيكالى ونىمدەردى سىرتقا شىعارۋ ءۇشىن،ءسوزسىز،ساپاسىنا جوعارى تالاپ قويۋ كەرەك. لي يۇڭجۇن: «ۇقساس ورگانيكالى ءونىم بولا تۇرا، ىشكى موڭعۇلدىڭ ونىمدەرىنىڭ باعاسى بىزدىكىنەن قىمبات تۇرادى» دەدى. بىلتىر ىشكى ولكەگە تەكسەرۋگە بارعانىندا، ونىمدەرىنىڭ ساپاسىنىڭ جوعارى ەكەندىگىن، الايدا، قوي-سيىر ەتىن قۇنتتاپ بۇزباعانىن، قوراپتالۋىندا دا ەشقانداي ەرەكشەلىك بولماعاندىقتان، باعاسى ارزان بولعاندىعىن بايقادى. العاشقى جىلى سەرىكتەستىكتىڭ كىرىسى شىعىنىنا جەتپەدى.
مۇنداي جاعدايدى وزگەرتۋ ءۇشىن، لي يۇڭجۇن تەحنيكتەردى باستاپ ەلىمىزدىڭ جەر-جەرىندەگى ەت ونىمدەرىن مانەرلەۋ سەرىكتەستىگىنە بارىپ ۇيرەندى. لي يۇڭجۇن: «تەحنيكتەر ەڭ العاشىنداعى ءبىر قويدى بۇزىپ ون نەشە ءتۇرلى ءونىم مانەرلەپ شىعۋدان، قازىر 55 ءتۇرلى ونىمگە جەتكىزدى. ساپالى ءونىم مەن وزىق تەحنيكا بولادى ەكەن ساۋدامىزدىڭ، ءسوزسىز، كۇسەت بولاتىنىنا سەنەمىن» دەدى.
«تالاپتى ەرگە نۇر جاۋار» دەگەندەي، لي يۇڭجۇننىڭ تىنباي قۇلشىنۋىندا ونىمدەرىنىڭ ساپاسى، ءتۇرى جانە قوراپتالۋىنان ساتىلۋىنا دەيىن تىڭ ءوسۋ بولدى. جۋىقتاعى ەكى جىلدان بەرى، سەرىكتەستىك ناقتى تۇلعا + ينتەرنەتتىك ساۋدا ۇلگىسىنە قادام تاستاعاننان كەيىن، ساۋدا بازارىن بەيجيڭ، ۋحان، شاندۇڭ سياقتى جەرلەرگە دەيىن كەڭەيتتى، مەجەمەن بيىلعى وڭىرلىك وداقتاس ساۋداگەرلەردىڭ سانىن 40 قا جەتكىزىپ، ساتۋ سوماسىن 50 ميلليون يۋانعا جەتكىزبەك ەكەن.
سەرىكتەستىكتىڭ كورمە زالىنا بارساڭىز، سورەگە قويىلعان قوراپتالۋى ادەمى ورگانيكالى قوي-سيىر ەتىنىڭ تارتۋ-تارالعى قورابىن، قىزمەت ۇستەلىندە ەلىمىزدىڭ جەر-جەرىنە جولداماقشى بولعان زات جونەلتۋ تالونىن كورەسىز. بۇل كۇندە لي يۇڭجۇن ەسىك الدىنان سەرىكتەستىك قۇرىپ قانا قالماستان، تۇرمىسىندا قيىنشىلىعى بار 180 ادامدى جۇمىستاندىرىپ، ءار جىلى كىسى باسىندىق ورتاشا ارتقان كىرىسى 16 مىڭ يۋان بولدى.
لي يۇڭجۇن: «قازىر مەملەكەت جاستاردى اۋىلىنا قايتىپ شارۋاشىلىق قۇرۋعا ىنتالاندىرۋدا، جاڭاشا كاسىپتىك شارۋا رەتىندە مەنىڭ نىسانام اتا مەكەنىمنىڭ ساپالى ونىمدەرىن بۇكىل مەملەكەتكە تانىتىپ، اۋىلداستاردى باستاپ، كىرىستى ارتتىرىپ، اۋقاتتانۋ جولىنا ءتۇسۋ» دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى