ءابىلقايىر اقباي ۇلى
بەرگەن سوڭ جاڭا ءداۋىر جاڭا تىنىس،
جاندانىپ سالا بەردى جاراتىلىس.
ءبىر مەزەت كوز جازدىرىپ كەتىپ ەدى،
جاپىرلاپ سۋدىڭ بەتىن جاباتىن قۇس.
جانىما قايرات بەرىپ قارت كۇندەگى،
تابيعات قۇشاعىڭا تارتتىڭ مەنى.
الاقاي،ءبىزدىڭ ەگىزكولىمىزگە،
تالاي جىل ورالماعان اققۋ كەلدى.
شىعاتىن ەتەگىنەن جيەكتەپ اي،
جان-جاعى ەگىزكولدىڭ جىبەك -توعاي.
كەنەتتەن كوك ايدىنعا قونعان اققۋ،
كەتتى عوي جۇگىندىرىپ جۇرەكتى وڭاي.
اققۋلار كول تامشىسىن شاشۋ عىپ ءجۇر،
بۇل ءوزى جازساڭ بىتپەس عاسىرلىق جىر.
تۇرعانداي تاريحتىڭ سىرىن شەرتىپ،
سىرعالى شەڭگەل -بۇتا، جاسىل جىڭعىل.
جۇرەكتىڭ سىرتقا تەۋىپ ءدۇر قاعىسى،
شىرلادى شار شابىتتىڭ شىڭعا قۇسى.
كول بويىن قايتا قىمتاپ العان ەكەن،
ەجەلگى قاراقۇمنىڭ ءشي-قامىسى.
اققۋ قۇس ساعىنبايىق نەگە سەنى،
ۇندەسىپ سۇلۋلىقپەن ەل وسەدى.
قاعىلعان باياۋ،بەيعام قاناتىڭنان،
تەڭىز بەن شالعاي مۇحيت لەبى ەسەدى.
تابيعات تال بويىڭا تاماشامىن،
اپاتتان امان بولعاي الا شارىم.
اققۋدىڭ ورالۋىن قۇتقا بالاپ،
قارق بوپ وتىر مۇندا قارا شالىڭ.
جۇمىستار جوبالانىپ تىم-تىم ءىرى،
قىرىنا قۇلىستايدىڭ تۋ تىگىلدى.
ويىڭدى ويقاستاتىپ وسىندا كەل،
ال،اقىن، جازباق بولساڭ تىڭ تۋىندى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى