توكەش سابىرحان ۇلى
قۇس اسپاندا ءبىر اۋەن باستاپ الىپ،
ۇزاق ساپار شەكتىم دەپ ماقتانارلىق.
امانداستى تاۋلارعا اسقار الىپ،
امانداستى سۋلارعا جاتقان اعىپ.
امانداستى قيىرسىز كەڭ دالاعا،
ساعىنىشپەن كوزىڭنەن جاس تامارلىق.
ال،سونان سوڭ جەلپىنە تىنىستاپ اپ،
ماۋقىن باستى ايدىن كول،باققا بارىپ.
ءدال سول شاقتا تولدەتكەن مالىن ايداپ،
كوڭىلى توق،ءوزى ءماز،جانى جايناپ.
«قارا قازان،سار بالا» قامىن ويلاپ،
مول رىزدىق بەردى،-دەپ ابىرويلاپ.
قوڭىر ءجۇزى جىلىنا جىمىڭ قاعىپ،
شوپان تۇردى بويىندا قانى ويناپ.
تىرشىلىكتى وزىنشە تويلاپ جاتتى،
جار جاعالاي جاس تولدەر سالىپ ويناق.
ەركىن دالا كوسىلە -كوسىلە كەپ،
جازىق بەتىن جاندارعا باسىرەلەپ.
جەر قۇنارى ۇيقىڭدى اش،ەسىنە،-دەپ،
ديقان سۋرەت سالدى ونىڭ توسىنە كەپ.
كۇز ەسەبى كوكتەمدە بىزدەر ءۇشىن،
ءدال قازىرگى ءبىر مينۋت نەسىبە،-دەپ.
بۇل ەڭبەكتىڭ بۇلىقسىپ بوداۋىنا،
كەربەز دالا قالار-اۋ كەكىرەلەپ.
مۇنىڭ ءبارى مۋزيكا ىرعاقتاعى،
جەلىلەسكەن ريتىم سىر قاتپارى.
ءبىر كوڭىلدىڭ تابىسىن جىرلاتقانى،
جانىمىزدى سەرگىتىپ قۋانتادى،
جۇرەك ءۇنىن قارتتاردىڭ تىڭداتقانى.
رەداكتورى : جىگەر ومىربەك ۇلى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى