«كەستەشى جىگىت»

   
  ۇسىنىس ەتىلگەن ءتىلشى باقىتبەك شايحى ۇلى حابارلايدى. شاعانتوعاي اۋدانى قارابۋرا اۋىلى جالپاقتال مال شارۋاشىلىق قىستاعىنداعى ون ساۋساعىنان ونەر تامعان قۋانىشبەك بازاربەك ۇلى ۇلتتىق قولونەر كاسىبىن ۇلاعاتتاپ، كانۋا، مارجان كەستەلەپ، كەستەشىلىك ونەردىڭ باعىن جاندىرىپ، بازارعا ويىستى.
   
  ول 2008 - جىلى شاعانتوعاي اۋداندىق 1 - ورتا مەكتەپتەن ورتالاۋدى تاۋىسقاننان كەيىن، جوعارىلاپ وقۋعا وتباسىنىڭ ەكونوميكالىق جاعدايى جار بەرمەگەندىكتەن، اكەسىنىڭ بيشىگىن قولىنا الىپ، مال باعۋعا كىرىسەدى.    

  كەستەشىلىك ونەرگە قالاي قىزىعىپ، قالاي  ۇيرەنگەنىن سۇراعانىمدا، ول: «بالا كەزىمنەن سۋرەت سىزۋعا اۋەس بولدىم، قىسى - جازى مال باعىپ جۇرگەندە جەرگە، اسىرەسە جالپاق تاستاردىڭ بەتىنە ءتورت تۇلىك مالدىڭ، قۇستاردىڭ جانە تابيعاتتىڭ كوركەم كورىنىستەرىن سىزىپ ۇيرەندىم. كەيىن كەلە اق قاعاز جانە ءتۇرلى رەڭدەگى بۇلدارعا سىزىپ، بىرتە - بىرتە كەستەشىلىك ونەرىنە قاراي ويىستىم. كەستەشىلىك ونەرى نازىكتىكتى، ەپتىلىكتى جانە شوگەلدىكتى، سونداي-اق ءتۇرلى رەڭدەردى ءوزارا سايكەستىرە ءبىلۋدى  قاجەت ەتەدى، سوندا عانا ويلاعانىڭىزداي كوركەم سۋرەتتى ورنەكتەي الاسىز، قازىر ءتۇرلى اڭ - قۇستاردى، ادەمى كورىنىستەردى جانە گۇلدەردى كانۋالاپ، مارجان كەستەلەردى رامكالاپ، بازارعا سالدىم، قولونەر بۇيىمدارىمنىڭ ساۋداسى ءوتىمدى، الارمانداردىڭ باعاسى دا جاقسى، الداعى كۇندەردە ونەرىمدى ۇشتاي ءتۇسىپ، جوعارى ەكونوميكالىق قۇن جاراتۋعا كۇش سالامىن» دەدى.
   
  «ونەرلىنىڭ قولى التىن، ولەڭشىنىڭ ءسوزى التىن» دەگەندەي، ءتۇرلى ۇلگىدەگى كەستەلەرىن بازارعا سالىپ، ەكونوميكالىق قۇن جاراتىپ، وتباسى كىرىسىن ارتتىرىپ، اۋقاتتانۋ جولىنا تۇسكەن كەستەشى جىگىتكە اق جول تىلەيمىز.
  


  رەداكتورى: گۇلنۇر جۇماش قىزى

  تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

  مىسالى: «تارباعاتاي اقپارات تورابىنان الىندى»