ءتىلشىمىز ۋاڭ شۋشيا حابارلايدى. 13-قىركۇيەك كۇنى جاڭا ءۇيىن جيناستىرىپ قاربالاستىققا تۇسكەن تولى اۋدانى دولاتى اۋىلى جيەك قىستاعىنىڭ تۇرعىنى ءنۇسىپ: « كوپتەن كۇتكەن كەڭ دە جارىق جاڭا ۇيگە اقىرى كوشىپ كىردىك، اۋلادا جىلى مال قورا،كىلەت ءۇيى بار، ماڭىمىزدا مەكتەپ،شيپاحانا بار، تۇرمىسىمىزعا وتە قولايلى بولدى » دەدى.
جيەك قىستاعى دولاتى اۋىلىنداعى ءتۇيىندى كەدەي قىستاقتىڭ ءبىرى. 2016-جىلى قۇلىستاي جايىلىمىن قالپىنا كەلتىرۋ ينجەنەرياسىنىڭ تالابىنا ساي، جيەك قىستاعىنىڭ قۇلىستاي جايىلىمىندا تۇراتىن 95 مالشى وتباسىن ەكولوگيانى قورعاۋ قاجەتىنە قاراي تاكىلگەن جاڭا قىستاعىنا كوشىردى. جاڭا قىستاق دولاتى اۋىلدىق ۇكىمەتتىڭ باتىس وڭتۇستىگىندەگى شامامەن 2 كيلومەتر قاشىقتىققا ورنالاسقان.
جيەك قىستاعى پارتيا ياچەيكاسىنىڭ شۋجيى مۇراتجان: « جاڭا قىستاقتاعى تۇرعىن ءۇيدىڭ كولەمى 80 شارشى مەتر، جىلى قورا 60 شارشى مەتر، كىلەت ءۇيى 20 شارشى مەتر، توك پەن سۋ تۇگەلدەي جەتكىزىلگەن بولىپ، قىستاق تۇرعىندارىنىڭ ەمدەلۋىنە قولايلى، بالالاردىڭ مەكتەبى جاقىن بولعاندىقتان، جۇرتشىلىق پارتيانىڭ ابزال ساياساتىنا العىس جاۋدىرۋدا » دەدى.
باسقا ورىنعا كوشىرۋ ارقىلى ەگىنشى-مالشىلاردىڭ ءوندىرىس-تۇرمىس شارت-جاعدايىن جاقسارتۋ تولى اۋدانىنىڭ حالىق تۇرمىسى قۇرىلىسىنىڭ ءبىر شاعىن كورىنىسى عانا. جۋىقتاعى 5 جىلدان بەرى تولى اۋدانى حالىق تۇرمىسىنا 5 ميلليارد 292 ميلليون يۋان قارجى قوسىپ، ادەتتەگى الەۋمەتتىك مەجە ەسەپ شىعىنىنىڭ %80.2 ىن يەلەدى. ءبىر قىدىرۋ حالىق تۇرمىسى ينجەنەرياسىنىڭ اتقارىلۋى ءار ۇلت جۇرتشىلىعىنىڭ باقىت كورسەتكىشىن بارىنشا جوعارىلاتتى.
76 جاسقا كەلگەن لي گوتيان شاعانتوعاي اۋدانى قوعامدىق يگىلىك ورنىنان 20 شارشى مەترلىك شاعىن ۇيگە يە بولدى، وندا توڭازىتقىش، تەلەۆيزور سياقتى تۇرمىسقا قاجەتتى بۇيىمداردىڭ بارلىعى بار، ونىڭ ۇستىنە، اۋلاسىندا دەنە شىنىقتىرۋ مايدانى، قارتا، دويبى ويناۋ ورنى سياقتىلار دا بار. لي گوتيان: « مۇندا تۇرمىسىما قارايلاساتىن، اڭگىمە دۇكەنىن قۇراتىن سەرىكتەرىم بار، كۇندەرىم كوڭىلدى وتۋدە، ەندى ەشقايدا بارمايمىن » دەدى.
باسپانادان، كۇتىمدەلۋدەن، ەڭبەكاقىدان جانە ەمدەلۋدەن يگىلىكتەندىرىپ، جۇرتشىلىقتىڭ كوكسەگەنىن ۇكىمەتتىڭ كۇرەس نىساناسىنا اينالدىرۋدا تاباندى بولىپ، جۋىقتاعى جىلداردان بەرى ايماقتىق پارتكوم مەن اكىمشىلىك مەكەمەسى كاسىپتەندىرۋ، قوعامدىق قامتاماسىزداندىرۋ، وقۋ-اعارتۋ،ەمدەۋ، مادەنيەت، ءجۇرىس-تۇرىس، ورتانى قورعاۋ سياقتى حالىق تۇرمىسىن جاقسارتۋعا قاتىستى ناقتىلى ىستەردەن باستاپ مىقتى ۇستاپ، « ماي بوياۋلى سۋرەتتەي تارباعاتاي، جىبەك جولىنداعى كورىكتى جەر، تىنىعۋ، كۇتىنۋگە جايلى مەكەن » قۇرۋ اياق الىسىن جەدەلدەتىپ، جاراسىمدى، ەكولوگياسى كوركەم، قونىستانۋعا جايلى تارباعاتايدىڭ كەرەمەتىن ايگىلەدى.
حالىق تىلەگىن شىعار ءتۇيىن، حالىق تۇرمىسىن تابان تىرەر تياناق ەتتى. بيىل وتكەن 8 ايدا ايماعىمىز حالىق تۇرمىسىنا 8 ميلليارد 990 ميلليون يۋان قارجى قوسىپ، ادەتتەگى الەۋمەتتىك مەجە ەسەپتىڭ %77.42 ىن يەلەپ، وتكەن جىلعى ۇقساس مەزگىلدەگىدەن %30.33 ارتتى. جۋىقتاعى 5 جىلدان بەرى ايماعىمىز حالىق تۇرمىسىنا 50 ميلليارد 115 ميلليون يۋان قارجى قوسىپ، الەۋمەتتىك مەجە ەسەپتىڭ %77.34 ىن يەلەدى.
كەدەيلىكتەن قۇتىلدىرۋدان قامال الۋ شايقاسىنىڭ جەڭىسىنە قول جەتكىزۋ، 2017-جىلى كەدەي قىستاقتاردىڭ « كەدەيلىك قالپاعىن » الىپ تاستاۋ جانە كەدەي وتباسىنىڭ كەدەيلىكتەن ارىلۋىنا كەپىلدىك ەتۋ؛ ءتىپتى دە بەلسەندى كاسىپ كوزىن اشۋ، كاسىپتەندىرۋ ساياساتىن اتقارىپ، كاسىپ كوزىن اشۋ مەن كاسىپتەندىرۋگە سايكەسۋ؛ 15 جىلدىق وقۋ-اعارتۋدى جالپىلاستىرىپ، تولىق ورتا ساتىسىندا اقىسىز وقىتۋدى بىرتىندەپ جالپىلاستىرۋ ... حالىقتىڭ ارمان-تىلەگى، ۇكىمەتتىڭ كۇرەس نىساناسى بولماق. تارباعاتايلىقتاردىڭ باقىت كورسەتكىشى بارعان سايىن جوعارىلاپ، بۇدان دا جاقسى كۇندەرگە قۇلاش جايۋدا.
رەداكتورى: گۇلنۇر جۇماش قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.