جاڭ ليانشىڭ
تامىلجىعان جاز. تۇستەن كەيىنگى شۋاقتى كۇن سۋرەتحانانىڭ كورگىزبە تەرەزەسىنە قويىلعان مودەلگە شۇلەن شۋاعىن توگىپ تۇر. بۇل سۋرەتحانانىڭ ساۋداسىنىڭ سايابىر كەزى ەدى. كەنەت ءبىر حانىم كەلىپ تۇپ-تۇنىق اينەكتىڭ ار جاعىنا قويىلعان توي كويلەكتەرىنە تامسانا قاراپ ۇزاق تۇردى.
-سۋرەتكە ءتۇسۋشى مە ەدىڭىز؟-دەدى دۇكەنشى شياۋ يۋ وعان ىقىلاستى تۇردە.
-ءيا ،الدىمەن كورەيىن،-دەدى الگى حانىم .
-دۇكەنىمىزدە كوپتەگەن جاڭا ۇلگىدەگى توي كويلەكتەرى بار، كىرىپ كورىڭىز.
حانىم ەش سالقىن بەينە بايقاتپادى، كورەر كوزگە قىرىق نەشە جاستارداعى ادامداي كورىندى. ۇستىنە كيگەنى ادەمى اق گۇلدىڭ ورنەگى تۇسىرىلگەن كوك ءتۇستى، قىناما بەل، ۇزىن كويلەك،باسىنا قوڭىر شىلتەرلى كۇنقاعار كيىپتى. كۇن قاعارىن العان ساتتە ونىڭ ادەمى سۇلۋ ءجۇزىن كورىپ اڭىرىپ قالدىم. تال بويىنان ءبىر ءمىن تاپپايتىن قاس سۇلۋدىڭ ءوزى،اسىرەسە اناۋ اشىلعان جاۋقازىنداي ادەمى ەرىندەرىنىڭ ەرنەۋىن كوز تارتارلىقتاي ەتىپ سىزىپ قويعانى تىپتەن ادامدى باۋراپ اكەتەدى. ءوزىن الدەبىر جەردەن كورگەندەي، ەپتەپ شىرامىتقان سياقتىمىن،تاڭعاجايىپ ءبىر سەزىم بويىمدى بيلەي جونەلدى. تەك قانا قۋاڭ تارتقان ءجۇزى مەن تۇڭعيىق ادەمى قوس جانارى شالاڭ بىتكەن قاستارىنىڭ استىندا كوزىمە وتە نۇرسىز كورىندى. ول شياۋ يۋدىڭ تانىستىرۋىن زەر سالا تىڭداي ءجۇرىپ، توي كويلەكتەرىنىڭ اربىرىنە ەرەسەن قىزىعۋشىلىق تانىتىپ،بارلىعىن دا ىنتى-شىنتىسىمەن كورىپ شىقتى. بۇل شاقتا ونىڭ قوس جانارى شىراق نۇرى استىندا الدەنەنى اڭساعان،شولىركەگەن جاننىڭ كۇيىن تانىتىپ تۇردى. شياۋ يۋ ورايدى قولدان بەرمەي:
-دەنە تۇرقىڭىز وتە ادەمى ەكەن.قانداي كويلەك كيسەڭىز دە جاراسىپ كەتەتىنىندە داۋ جوق. قايسىسىن ۇناتتىڭىز؟-دەپ سۇراپ جاتتى.
-جوق،-دەدى ول اقىرىن بۇرىلىپ،-مەن تەك ءبىر پارشا سۋرەتكە عانا تۇسسەم دەپ ەدىم.
-ءبىر پارشا دەيسىز بە؟-دەدى شياۋ يۋ ۇمىتسىزدەنىپ.
-ءيا ،ءبىر پارشا،وسى كيىممەن تۇسسەم دەپ ەدىم.
-ءبىراق،بۇل نەكە سۋرەتحاناسى عوي؟
-بىلەمىن عوي،ۇستىنە اقشا قوسسام بولاتىن شىعار؟
-جارايدى وندا،- شياۋ يۋ ماعان ءبىر قاراپ قويىپ، ونىڭ تالابىنا ماقۇل بولدى.
حانىم ەش گىرىم ىستەتپەدى. تەك جاسانۋ ايناسىنىڭ الدىندا وتىرىپ ءوزىنە ۇزاق، ءۇنسىز قاراپ وتىردى دا شاشى مەن جاعا-جەڭىن جوندەدى.بەينە كۋالىككە تۇسكەن سۋرەتكە ۇقساس كومەكشى شياۋ ۋاڭ وعان كوك ءتۇستى ارتقى كورىنىس جاسادى،ەشقانداي بوياماسىز تابيعي سۋرەتتى كورگەن حانىم ءلام-ميىم دەگەن جوق،اقشاسىن تولەپ كەتە باردى.
شياۋ ۋاڭ سۋرەتحانانىڭ ءىشىن جيناستىرىپ ءجۇرىپ ءبىر سومكە تاۋىپ الدى، ءاسىلى، الگى حانىم قول سومكەسىن ۇمىت قالدىرعان ەكەن. كوتەرە بەرگەنى سول ەدى،ىشىنەن ءبىر ناۋقاس ارحيۆى قوسا سىرعىپ ءتۇستى، ىلەسە تۇسكەن قان تەكسەرتۋ قاعازى دا بىردەن كوزگە ۇرىلدى. ول جەرگە تۇسكەن نارسەلەرگە تاڭىرقاي قاراپ تۇرىپ:
-و،ءتاڭىرىم،جاڭاعى حانىمنىڭ قانداي ناۋقاس ەكەنىن بىلەسىڭدەر مە،-دەپ قاتتى داۋىستاپ جىبەردى.ءبىزدىڭ جاۋابىمىزدى دا كۇتپەستەن:
-جاتىر راگى ەكەن ،-دەپ اڭىرىپ قالدى.
بارلىعىمىز ءۇن-ءتۇنسىز سىلەيىپ تۇرىپ قالدىق. ءاسىلى، حانىم اقتىق رەت سۋرەتكە تۇسكەلى كەلگەن بولدى عوي، دەگەن ءبىر توسىن وي مەنىڭ ەسىمدى جيعىزعانداي ەدى.
ءبىز ءالى ۇرەيدەن ارىلا الماي تۇرعان ساتتە الگى حانىم:
- قول سومكەمدى وسىندا ۇمىتىپ تاستاپ كەتىپپىن،- دەپ سىرتتان جىتىرمەلەتە باسىپ كىرىپ كەلدى.
-مىناۋ ما ؟-شياۋ ۋاڭ سومكەنى ۇسىندى،قاپىلىستا اۋرۋ ارحيۆىن سالىپ ۇلگىرە الماي قالعان ەدى. حانىمنىڭ مويىلداي قوس جانارى بىزگە قادالىپ:
- ءبارىن ءبىلىپ العان بولارسىڭدار ،-دەدى ءالسىز ۇنمەن.
شياۋ ۋاڭ ءيا دەگەندەي باسىن يزەكتەتىپ،ال شياۋ يۋ ەكەۋىمىز باسىمىزدى شايقاي بەردىك.
حانىم سوزا كۇرسىنىپ:
-ءيا ،ناۋقاسىم الدەقاشان سوڭعى مەزگىلىنە ءوتىپتى،راك كلەتكالارى دەنەمە تارالىپ كەتكەن،-دەپ باسىن كوتەرگەندە جانارىنا لىقسىپ كەلگەن جاستى كوردىم.
-مەن شىنىمەن-اق توي كويلەگىمەن سۋرەتكە تۇسكىم بار ەدى. ءبىراق،قازىر مۇنىڭ تۇك تە قاجەتى قالماعانداي تۇرادى. قىزىم الدىڭعى ايدا وسى ارادا توي سۋرەتىنە تۇسكەن ەدى،وتە ادەمى شىعىپتى...
مەن اناۋ ەرنەۋىن ادەمى ەتىپ سىزعان، اشىلعان جاۋقازىنداي ادەمى گۇل ەرىندى كورىپ الدىڭعى ايدا سۋرەتكە تۇسكەن كۇلكىشى،سۇيكىمدى ارۋ ەرىكسىز ەسىمە ءتۇستى.
-ول ەندىگى ايدا نەكەلەنەتىن ەدى،وسى اراعا بەت جاساتقالى كەلگەندە مەنىڭ جايىمدى وعان ايتا كورمەسەڭدەر ەكەن،-حانىم ءسوزىن ايتىپ بولىسىمەن بىزگە قاراپ وتىنگەندەي اقىرىن باس ءيدى. شياۋ يۋ استىڭعى ەرنىن تىستەپ،كوزجاسىن كولدەتىپ قويا بەردى.
-راقىمەت سەندەرگە،-حانىم بۇرىلىپ جۇرۋگە ىڭعايلاندى. مەن ەسىمە الدەنە تۇسكەندەي:
-قۇرمەتتى حانىم،كەشىرىڭىز،جاڭاعى سۋرەتىڭىزدە ازىراق ماسەلە بار سياقتى،كومپيۋتەرگە دە كىرگىزىلمەپتى،ءسىزدى قايتادان سۋرەتكە تارتسام بولا ما؟-دەدىم ونى توقتاتىپ.
ەندى ارتقى كورىنىس رەتىندە شياۋ ۋاڭعا ءوزىم ەڭ جاقسى كورەتىن باران رەڭدى بۇلدى تاڭداتتىم. ارتقى كورىنىس شىراعىنىڭ سولعىن ساۋلەسى مەن ءۇشبۇرىشتان تۇسكەن جاعىمدى نۇر ايەلدىڭ سۇلۋ ءديدارىن قاز قالپىندا كورسەتىپ تۇر. سول ءسات ونىڭ ماحاببات پەن قيماستىققا تولى جانارىن ەش بوياماسىز كەسكىندەپ، قايسار انا،ابزال جاننىڭ وسىناۋ جۇمىر جەردىڭ بەتىندەگى ەڭ سوڭعى مينۋتتارىنىڭ وشپەس كارتيناسى ەتىپ بەينەلەۋگە بارىمدى سالا ءوزىمدى ۇمىتىپ، مۇلدەم ءتىلسىم دۇنيەنىڭ قۇشاعىنا ەنىپ بارا جاتتىم.
اۋدارعان _
ءدىلنار جامباي قىزى
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.