شىناربەك تۇرسىنبەك ۇلى
ماڭعاز دالام
ماڭعاز دالام قۇشاعىنا ءسىمىرىپ،
كوكىرەگىمدە ويانادى سەرىلىك.
ورتەپ باراد وزەگىمدى ءبىر اعىس،
ساحارالىق دارقان سەزىم ءتىرىلىپ.
نۋ ورماندار،جاسىل القاپ - پەرىشتەم،
الىس ءجۇرمىن قويناۋىڭنان كەشىر سەن.
سۇپ-سۋىق سۋ تىتىرەتكەن جانىمدى،
ءمولدىرىم-اۋ،
ايىقتىرعان دەرتىمنەن...
كوك جالبىزدان ءشارپى سالعان تاس بۇلاق،
سەن سول قالپى،
مەن ەگدەمىن ءسال ءبىراق.
كۇندە قايناپ تازارادى كوزدەرىڭ،
اتىراپتى كەزىپ ءجۇرسىڭ شاقپىلاپ.
قوڭىر اڭدار،
قىران قۇستار،
ەلىكتەر،
مەن ورالدىم قانە تۇگەل كەلىپ كور.
تەنتەكتىگىم بۇتاعىڭدا ۇيىقتاعان،
قارا قوسىم - ەسەنسىڭ بە توعايلار...
كەرمە يىق،
قارت جانارلى تاۋلارىم،
قاباعىڭدى ماعان تاعى قاداعىن.
سەزەم-بىلەم سىناي قاراپ تۇرسىڭدار،
قاي تاسىڭدى قوزعاپ كەتتى تابانىم.
تۇيمەشەگىن توگىپ بەرىپ قاراعاي،
يىسىڭمەن تۇرۋشى ەڭ ايمالاي.
قاپ اتتەگەن،
مەنىڭ ەكى قوي كوزىم،
قاسيەتىڭدى ءجۇرىپتى عوي تانىماي.
ولار ءۇشىن كەرمەك بالكىم شايىرىڭ،
كورگەن ەمەس تابيعاتتىڭ شاشۋىن.
قىمىز ءشوبىم قاندىرايىن ءشولىمدى،
بارلىعىڭدى پاي-پاي،شىركىن،ساعىندىم.
ماڭعاز دالام قىدىرايىن دەپ كەلدىم،
ول دا قۇمار وسەر ۇرپاق - كوكتەمىم.
اۋناپ-قۋناپ ءتور كىلەمگە جاتىرمىن،
ەشبىر پەندە سۇراماڭدار سەبەبىن.
ماڭعاز دالام كيەلىم...
ىزگىلىكتى قۇشامىن
قيىلادى قيال مەنى جەتەلەپ،
جۇرەگىمدى ساعات ءتىلى تۇيرەلەپ.
كولەڭكەنىڭ كورىنبەيدى يرەگى،
تۇيسىگىمدى كىم بارادى سۇيرەلەپ.
اقىل-ەستى عاجاپ سەزىم كيمەلەپ،
بولمە ءىشىن قۇت تىنىشتىق يەلەپ...
باقىت بارىن ءبىر كەرەمەت دالەلدەپ،
بۇرقىراتقان تىرلىك ءيىسىن جۇپار لەپ.
ساعىنىشپەن كوكەيىمدى تۇيمەلەپ،
اسىل ارمان نۇرلى ىرعاق سەبەلەپ.
ناعىز شاتتىق،
ىزگىلىكتى قۇشامىن،
عۇمىرىمدى ولەڭ نۇرعا بولەپ ەد...
ءومىر -شىراق
گۇل دۇنيە كەۋدەسىندە شالقىدىم،
كوزىمدەگى باقىت تەڭىز تەربەتىپ.
سۇلۋلىقتىڭ ۋىسىندا بالقىدىم،
ماحابباتتىڭ قۇشاعىندا ەرجەتىپ.
كۇن كىرپىگىن جەر شارىنا توڭكەرىپ،
اي ساۋلەسى تىنىشتىقتىڭ بەسىگى.
ارمان ماڭگى جۇرەگىڭە بايلانىپ،
جۇلدىز عۇمىر ادامزاتتىڭ تاعدىرى.
ءمار-ءمار اسپان پەرىشتەلەر مەكەنى،
شەكسىزدىكتىڭ قيالىنا باتىرعان...
ساعىنىشتىڭ سارقىلمايدى مەيىرى،
عاسىر قويما تاريحتى جاسىرعان.
ءومىر-شىراق،
تىرلىگىڭدە جاعىلعان،
زەرلى شاپان كيسەڭداعى ۋاقىتتىق.
ءتۇرت ماۋسىمىڭ - مەزگىل جاسىڭ باعىنعان،
كوكىرەكتە جارقىراسىن جارقىندىق.
داڭعىل ءۇمىت جىگەرىڭدى جانىعان،
مۇرات جولى ۇلى سەرتتە سەنىمدىك.
پەندەشىلىك باعىتىڭنان ايىرعان،
ادامدىعىڭ اسقاق نامىس تەرەڭدىك.
جانىڭ ءۇشىن ماڭىزدى ەمەس جوقشىلىق،
ويلارىڭنىڭ تولعامىنا بويلاعىن.
تىرشىلىكتىڭ قاسيەتى جاقسىلىق،
اق پەيىلمەن ءار كۇنىڭدى تويلاعىن.
رەداكتورى: الماگۇل اقاتبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.