ادۆوكات: «سۋرەتكە تۇسىرۋگە بولمايدى» دەگەن شەكتەمەنىڭ زاڭدىق نەگىزى جوق
قازىرگى تاڭدا، كوپتەگەن ادامدار قول تەلەفونمەن سۋرەت تۇسىرۋگە، ءۇنحاتقا سۋرەت شىعارۋعا قۇمار. دەي تۇرعانىمەن، كوپتەگەن ساۋدا سارايلارىندا، ەرەن بازارلاردا سۋرەتكە تۇسىرۋگە رۇقسات ەتىلمەيدى، كەرەك دەسەڭىز، «سۋرەتكە تۇسىرۋگە بولمايدى» دەگەن ەسكەرتۋ تاقتاسىن دا ءىلىپ قويعان. بۇل اينالىپ كەلىپ كوپتەگەن داۋ - شارلارعا مۇرىندىق بولۋدا. ەندەشە، ساۋداگەرلەر نەگە «سۋرەتكە تۇسىرۋگە بولمايدى» دەگەن ەسكەرتۋ ىلەدى؟ مۇنداي شەكتەۋدىڭ زاڭدىق نەگىزى بار ما؟
ساۋداگەرلەردىڭ «سۋرەتكە تۇسىرۋگە بولمايدى» دەگەن شەكتەۋى كاسىپتەستەردى شەكتەۋگە قاراتىلعان
جۋىقتا ءتىلشى ءۇرىمجى قالاسى چاڭچۇن جولىنداعى دوستىق ساۋدا ورتالىعىنىڭ جەر استى ەرەن بازارىندا تۇرمىستىق بۇيىمدار ساتاتىن قىزمەتكەرگە سۋرەتكە ءتۇسىرىپ الماقشى ەكەنىن ايتىپ ەدى، ول «سۋرەتكە تۇسىرۋگە بولمايدى» دەپ شورت قايىردى. ءتىلشى وعان تەك ساۋدا بۇيىمدارىن عانا سۋرەتكە تۇسىرەتىنىن ايتسا دا، «ساۋدا بۇيىمدارىن دا سۋرەتكە تۇسىرۋگە بولمايدى» دەپ باس شايقاعان ەرەن بازار قىزمەتكەرى «ەرەن بازارىمىزدا سۋرەتكە تۇسىرۋگە مۇلدە بولمايدى، بۇل ەرەن بازار قوجايىنىنىڭ كاسىپتەستەردىڭ باعا بەلگىلەمەسىن پايدالانىپ كەتۋىنىڭ الدىن الۋ ءۇشىن شىعارعان بەلگىلەمەسى» دەپ ءتۇسىندىردى.
ءۇرىمجى قالاسى تەمىر جول مەكەمەسى ماڭىنداعى تاعى ءبىر ەرەن بازاردىڭ ساتۋشى قىزمەتكەرى دە ءتىلشىنىڭ سۋرەت تۇسىرۋىنە رۇقسات ەتپەي، «ەرەن بازاردىڭ بارلىعىندا سۋرەتكە تۇسىرۋگە بولمايدى»، - دەدى.
تەك ساۋدا سارايلارىنىڭ ەرەن بازارلارى عانا ەمەس، شاعىن دۇكەندەردە دە سۋرەتكە تۇسىرۋگە بولمايدى. شينجياڭ اۋىل شارۋاشىلىق ۋنيۆەرسيتەتىنىڭ ماڭىنداعى كيىم - كەشەك ماگازينىندە قول تەلەفونمەن سۋرەتكە تۇسىرمەك بولعان تىلشىدەن «نەنى سۋرەتكە تۇسىرمەكسىڭ؟ سەن ءوزى نە قىلعان جانسىڭ؟» دەپ دۇكەن قوجايىنى قادالا سۇرادى. ءتىلشى ءوزىنىڭ كاسىپتىك سالاۋاتىن ايتقان سوڭ بارىپ، مۇنىڭ سەبەبىن تۇسىندىرگەن قوجايىن: سۋرەتكە ءتۇسىرۋشىنىڭ كىم ەكەنىن، نە ماقساتى بارلىعىن بىلمەي تۇرىپ، سۋرەتكە تۇسىرۋىنە قالاي جول قوياسىڭ؟ ءمۇبادا، كاسىپتەس بىرەۋ كەلىپ مەنىڭ ماگازينىمدەگى كيىم ۇلگىلەرىن ۇرلاپ ءتۇسىرىپ، كەيىن وسى تۇردەگى زاتتاردى الدىرىپ ساتسا، مەنىڭ ساۋداما سالقىنىن تيگىزبەي مە، - دەدى.
سول كۇنى حۇڭشان، شياۋشيمىن، جۇڭشان جولى ماڭىنداعى 10 شاقتى ساۋدا سارايدىڭ ەرەن بازارلارى مەن ساۋدا دۇكەندەرىن ارالاعان ءتىلشى كوپتەگەن ساۋدا سارايلارىنىڭ الارمانداردىڭ سۋرەتكە تۇسىرۋىنە شەكتەۋ قويماعانىن، تەك ەرەن بازار مەن جەكەلەردىڭ ساۋدا دۇكەندەرىندە عانا سۋرەتكە تۇسىرۋگە بولمايدى دەپ شەكتەۋ قويىلاتىنىن بايقادى.
قالا تۇرعىندارى: شەكتەۋگە ۇشىراعاندارىنا نارازى
ساۋدا سارايلارىنىڭ سۋرەتكە تۇسىرۋىنە بولمايدى دەگەن شەكتەمەسى كوپتەگەن قالا تۇرعىندارىنىڭ نارازىلىعىن قوزعادى.
ءۇرىمجى قالاسىنىڭ تۇرعىنى لو يان تىلشىگە ءوزىنىڭ كوشە ارالاعان كەزدە ۇناتقان كيىم - كەشەك، باس كيىمدەردى كيىپ كورىپ، سۋرەتكە ءتۇسىرىپ، دوس - جاراندارىنا جولداپ، كورسەتۋدى ۇناتاتىنىن؛ الايدا ساتۋشى قىزمەتكەرلەر بۇعان جول بەرمەيتىنىن اۋىزعا الا كەلىپ بىلاي دەدى: سول زاتتاردىڭ بارلىعىن ەلدىڭ كورۋى ءۇشىن ءىلىپ قويعان شىعار، ونىڭ جەكە قۇپيالىعىن شاشىپ جاتپاعان سوڭ، سۋرەتكە تۇسىرتكىزبەيتىن نە ءجونى بار.
ءمالىم ءبىر اقپارات ورنىندا قىزمەت ىستەيتىن چىن مىرزا تىلشىگە بىلاي دەدى: كەيدە قىزمەتتىڭ قاجەتىمەن ساۋدا ورىندارىندا سۋرەتكە تۇسىرۋىمىزگە تۋرا كەلسە دە، ۇنەمى توسقىندىققا ۇشىرايمىز. كاسىپتىك سالاۋاتىمىزدى ايتقان كۇننىڭ وزىندە قوجايىنعا قۇلاق قاعىس ەتۋىمىزدى نەمەسە ۇگىت قىزمەتىنە جاۋاپتى بولىممەن بايلانىس جاساۋىمىزدى تالاپ ەتەدى.
قالا تۇرعىنى فان شياۋلين ساۋداگەرلەردىڭ بۇل بەلگىلەمەسىن «قۇلاعىن باسىپ، قوڭىراۋ ۇرلاعاندىق» دەپ قارايدى. «ويتكەنى مۇنىڭ ءبارى جۇرتقا اشىق ۇستالاتىن ورىندار ەسەپتەلەدى. سۋرەتكە تۇسىرۋگە بولمايدى دەپ شەكتەۋ قويعانىمەن، ۇقساس كاسىپپەن اينالىساتىنداردىڭ ينفورماتسيالاردى يەلەۋى قيىن ەمەس. ساۋدا باسەكەسىندە ساۋداگەرلەر تەك قىزمەت وتەۋ ساپاسىن جاقسارتقاندا عانا بازاردا باعى وزادى»، - دەيدى فان شياۋلين.
ادۆوكات: «سۋرەتكە تۇسىرۋگە بولمايدى» دەگەن شەكتەمەنىڭ زاڭدىق نەگىزى جوق
شينجياڭ زىيە ادۆوكات ىستەرى ورنىنىڭ ادۆوكاتى لي چياڭ كەيبىر الەۋمەتتىك ساۋدا - ساتتىق ورىندارىندا سۋرەتكە تۇسىرۋگە بولمايتىنى جونىندە زاڭدا انىق بەلگىلەمە جوق. ساۋداگەرلەر ءوز ساۋدا ورنىنىڭ اشەكەيىن، ساۋدا بۇيىمدارىن، زات باعاسىن قورعاۋ ءۇشىن وسىنداي بەلگىلەمەلەر شىعارىپ وتىر. بۇل ءجون - جوسىق تۇرعىسىنان دۇرىس سياقتانعانىمەن، زاڭدىق تۇرعىدان الىپ ايتقاندا، ساۋداگەرلەردىڭ «سۋرەتكە تۇسىرۋگە بولمايدى» دەگەن شەكتەمەسىنىڭ ەشقانداي زاڭدىق نەگىزى دە، زاڭدىق رولى دا جوق ەكەنىنە توقتالا كەلىپ، بىلاي دەدى: ساۋدا دۇكەنى، ەرەن بازارلاردىڭ بارلىعى الەۋمەتتىك ساۋدا - ساتتىق ورنى سانالادى. تۇتىنۋشىلار ساۋدا بۇيىمدارىن عانا سۋرەتكە تۇسىرەدى، استە دۇكەن قوجايىنىن نەمەسە ساتۋشى قىزمەتكەرلەردى سۋرەتكە تۇسىرمەيدى. ونىڭ ۇستىنە، ساتۋشىنىڭ جەكە قۇپيالىعىن اشىپ، ونىڭ وبرازىنا نۇقسان جەتكىزىپ جاتپاعان سوڭ، ساۋداگەرلەر تۇتىنۋشىلاردىڭ سۋرەتكە تۇسىرۋىنە جول قويسا بولادى. تۇتىنۋشىلاردىڭ ۇقىق - مۇددەسى تۇرعىسىنان الىپ ايتقاندا دا، ولاردىڭ زاتتىڭ ناقتى جاعدايىن ءبىلۋى، سۋرەتكە ءتۇسىرىپ، سالىستىرىپ كورۋى، باسقالارعا كورسەتىپ، ولاردىڭ اقىل - كەڭەسىن الۋى ۇيلەسىمدى ءارى زاڭدى.
« شينجياڭ گازەتىنەن»
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى