ەەڭ جاڭا مازمۇندار
”جاڭا داۋىردە ەكپىندەي ىلگەرىلەۋ“ نەگىزگى تاقىرىپتىق تابىستار كورمەسىنىڭ شينجياڭ كورمە بولىگى تارتىمدىلىعىمەن كوزگە ءتۇستى
«تاعدىرلاس بولىپ، داڭعىل جولمەن ىلگەرىلەۋ − شي جينپيڭنىڭ ديپلوماتيا يدەياسى ادامزات دامۋىنىڭ، العا باسۋىنىڭ اعىمىن ىلگەرىلەتتى»
بۇقارانىڭ ءىسىن قاشاندا كوكەيىندە ساقتادى
ايماعىمىزدا 610 مىڭ مۋ جەرگە دۇمبە ءبيداي سىڭىرىلە باستادى
ءۇمىت اتىزىنان مول ءونىم جىرى شىعاندادى
تىكە تاراتۋ بولمەسىنەن”ءىرى ەلدىڭ استىق قامباسىن“ تاماشالادى
شاعانتوعاي: ماقسارىنى جىنتىكتەي مانەرلەۋگە جاڭا كۇش قوسىلدى
2022-جىلى 9-ايدىڭ 30- كۇنى 218-سان
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرە
پارتيانىڭ بەكىمىن، حالىقتىڭ رايىن ۇيىستىرىپ، گۇلدەنۋ ۇلى ءىسىن ىلگەرىلەتتى
رەفورما شارالارىنىڭ تياناقتانىپ، ونىمدىلىك كورسەتۋىن جەدەل ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى قولداۋ، قامتاماسىز ەتۋ كەرەك
زەيىن - زەردەنى، كۇش - قۋاتتى ۇيىستىرىپ، بورىشتى ارقالاپ، قايراتتانا العا ۇمتىلىپ، جاڭا تاراۋ جازايىق
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرەك
تاريحتى اينا ەتىپ، وتكەندى باعامداپ، بولاشاقتى بولجاپ، گۇلدەنۋ جولىندا تاباندىلىقپەن العا باسۋ كەرەك
ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ ماڭىزدى تالابىن جاپپاي تياناقتاندىرىپ، پارتيا 20 - قۇرىلتايىنىڭ جەڭىسپەن اشىلۋىنا حاۋىپسىز، ورنىقتى ساياسي، قوعامدىق ورتا جاراتۋ كەرەك
اۆتونوميالى رايوننىڭ وقۋ - اعارتۋدى جوعارى ساپامەن دامىتۋ جينالىسى اشىلدى
بارشا جۇڭگولىقتى تۇگەل اناعۇرلىم جاقسى تۇرمىسقا كەنەلتتى
شينجياڭدى سىرتقا ەسىك اشۋدىڭ الدىڭعى شەبى ەتىپ قۇرىپ شىعامىز
جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايىنا قاتىناساتىن ۋاكىلدەر تۇگەل سايلانىپ شىقتى
ۋاكىلدىك بورىشتى ادالدىقپەن اتقارىپ، ۋاكىلدىك رولدى تولىق ساۋلەلەندىرەيىك
مەملەكەتتىك حالىق قۇرىلتايى تۇراقتى كوميتەتىنىڭ زاڭنىڭ اتقارىلۋىن تەكسەرۋ گرۋپپاسى رايونىمىزدا زاڭنىڭ اتقارىلۋىن تەكسەردى
2022-جىلى 9-ايدىڭ 29- كۇنى 217-سان
2022-جىلى 9-ايدىڭ 28- كۇنى 216-سان
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى

كۇمىس تەڭگە

جولدانعان ۋاقىتى : 2017/5/27 16:47:35

موۋاھەد دىلماگوني (يران)‏‏‏
 
  قالا اسپانىن قارا بۇلت باسىپ، تاڭ قۇلانيەكتەپ اتىپ كەلەدى. تۇنىمەن جاۋعان جاڭبىر بۇدان ەكى ساعات ىلگەرى توقتاعان. جاڭبىرعا جۋىلعان ۇيلەردىڭ توبەسى جاپ- جالتىر بولىپ، دودەگەدەن سۋ تامشىلاپ تۇر.

  قالا بىرتە-بىرتە جاندانا باستادى. اسىعىس جولاۋشىلاردىڭ اۋزى-مۇرنىنان اپپاق بۋ بۇرقىلدايدى. اۆتوموبيلدەردىڭ سيگنال ءۇنى دىمقىل اۋادا دىرىلدەپ شىعادى.

  كوشەدە جالبا-جۇلبا جىرتىق شالبار مەن كونەرىپ كەتكەن قوڭىر شاپان كيگەن ءبىر بالا پايدا بولدى. ول سۋىقتان قىپ-قىزىل بولعان قولدارىن شالبارىنىڭ قالتاسىنا سالىپ، مالمانداي سۋ بولعان اياق كيىممەن لاي-باتپاقتى كەشىپ بارادى. الدىنا ءسال ەڭكەيە ءتۇسىپ، ادىمداي باسىپ بارا جاتقان ونىڭ ءبىر تۇتام ماڭداي شاشى تۇسكەن ارىق بەتىندە قۋانىش لەبى مەنمۇندالايدى. ول جۇمىستىڭ كەشەگىگە قاراعاندا جاقسى بولارىنا سەنىمدى ەدى.

  بۇل نە ءبىر ونەرى، نە ءبىر تۇراقتى جۇمىسى بولماعان سەيت اتتى بالا ەدى. توپەلەپ جاۋىپ تۇرعان جاڭبىر اياق استىنان توقتاي قالعان كۇندەرى ونىڭ كوڭىلى كوتەرىلىپ كەتۋشى ەدى. ايتەۋ، قولايلى جەر تابىلسا عانا بولعانى ازعانا اقىعا دا ىستەي بەرۋگە رازى.

  سەيت مۇھبەر-ءاد-داۋۇل مايدانى جاققا قاراي ءجۇردى. شامىراننان كەلەتىن اۆتوكولىكتەر ۇنەمى سول جەرگە توقتايدى. بۇگىن اۆتوكولىكتەر لايعا مالتىققان بولۋى، بالكىم، شامىراندا قار جاۋىپ جاتقان دا بولار... ەگەر سولاي بولعان جاعدايدا، ول اۆتوموبيلدەردىڭ لاي بولعان تەرەزەلەرىن ءسۇرتىپ تازالاپ،  تۇستىك تاماق اقىسىن تابا الادى.

  سەيت جەڭىل ءبىر ءاندى ىڭىلداپ ايتىپ كەلە جاتىر. كەنەت ول ىڭىلداعانىن توقتاتىپ، الگى ءاننىڭ اقاڭىندا ىسقىرا باستادى. سەيت فەرداۋسي مايدانىنىڭ جارىمىن كەسىپ ءوتىپ بولعان، اياق استىنان الدەبىرەۋ جەلكەسىنەن ءتۇرتىپ قالدى. سەيت ارتىنا بۇرىلىپ قارادى.

  -ە، سەن بە ەدىڭ، ساعيرا، سالەمەتسىڭ بە؟

   شايىرىن شايناڭداعان، جىرتىق ەتىك كيگەن قىز وعان قاراپ كۇلىپ قويدى.

   ۇزىن بويلى، دوڭگەلەك بەتتى، قاراتورى كەلگەن بۇل قىز سەيتتەن ەكى جاس كىشى بولاتىن. موينىنا وراپ العان كونە، جاسىل شارپى اراسىنان ۇزىن قوڭىر شاشتارى شىعىپ تۇر. ونىڭ قولىندا ءبىر ۋىس لاتاريا بەلەتى بار ەدى.

   ولار قاتارلاسا ءجۇردى.

  -قايدا كەتىپ باراسىڭ؟- دەپ سۇرادى ساعيرا.

  -مۇھبەر-ءاد-داۋۇل مايدانىنا. ول جەردە قازىر اۆتوكولىكتەر كوبەيىپ كەتكەن بولۋ كەرەك. ەگەر بايلار ساراڭدىق قىلماسا بولدى بۇگىن دارداي اقشا تابامىن.

  -ە، راس، مىناداي اۋا رايىندا جولىڭ بولادى،- دەدى مۇڭايىپ ساعيرا،- ماعان... مىناداي كۇندە كىم لاتاريا بەلەتىن كەرەك قىلسىن دەيسىڭ؟
-بىلمەدىم...- جەلكەسىن قاسىدى سەيت، ارتىنان،- تەك تازا سۇرتكىش تابا المادىم. مەندە بارى ەش نارسەگە جاراماي قالدى... قاراشى، سەندە جاقسىسى جوق پا؟

  - جوق،- دەپ جاۋاپ بەردى ساعيرا،- رەنجىمە، تاۋىپ بەرەمىن.

  -ساتىپ الۋعا اقشام جوق،- دەپ كۇرسىنىپ قويدى سەيت،- بەكەر ولجا قايدا بار...

  - بوس ءسوز،- دەپ ءسوزىن ءبولدى قىز،- مىنە مىنا دۇكەنگە كىرەيك. ەندى عانا اشىپتى... قوجايىنىن سوزگە ايلاندىرىپ تۇرايىن. سەن سۇرتكىشىن ال دا  قاشىپ كەت.

  -مويىنسالمىن، ويلاپ تاپقان ءادىسىڭدى قارا!- قۋانعاننان قولدارىن ۋقالادى سەيت،- سەن ەڭ جاقسى دوسىمسىڭ، ساعيرا، ەگەر ەشكىم بولماعاندا سەنى ءسۇيىپ الار ەدىم...

  ولار راديو ساتاتىن شاعىن دۇكەنگە كەلدى. دۇكەندە ورتا جاستارداعى ءبىر كىسى دۇكەنىن سىپىرىپ قاربالاستاپ جاتىپتى. ول الاشىبار سۇرتكىشپەن راديولاردى ءسۇرتىپ تازارتۋدا.

  -مىرزا، لاتاريا بەلەتىن الاسىز با؟- دەدى ساعيرا كۇلىمسىرەپ،- ەرتەمەن ءبىر قۇشاق اقشاعا يە بولاسىز.

  -تاڭ اتپاي نەعىلىپ ءجۇرسىڭ؟- دەپ اڭ-تاڭ بولىپ سۇرادى دۇكەنشى.

  -ەرتە ىستەگەن ساۋدانىڭ قانداي بولاتىنىن ءوزىڭىز بىلەسىز عوي،- دەدى ساعيرا اۋزى-اۋزىنا تيمەي،- تالەيدەن قۇر قول قالماڭىز، ءبىر دانا لاتاريا بەلەتىن ساتىپ الساڭىز، ەرتەڭ-اق، البەتتە، 25 مىڭ تۇمەنگە (يراننىڭ اقشا بىرلگى) يە بولاسىز.

  ساعيرا پوكايدىڭ قاسىنا كەلىپ دۇكەنشىگە ءبىر  تۇتام  قاعازدى ۇسىندى. سەيت تە تاياي ءتۇستى. 25مىڭ تۇمەن تارتىپ شىعاتىندىعى جونىندەگى ساعيرانىڭ سەنىمدى سوزدەرى دۇكەنشىنى اسەرلەندىرسە كەرەك. ول ءبىر ۋىس لاتاريا بەلەتتەرى ىشىنەن «ەڭ باقىتتى» بەلەتتى الۋ ءۇشىن قولىن سوزا بەردى. ول وسىنداي ماڭىزدى ىسپەن شۇعىلدانىپ كەتكەن كەزدە، سەيتتىڭ پوكاي ۇستىندەگى سۇرتكىشتى قولىنا الىپ قوينىنا سالعانىن ءارى دۇكەننەن شىعىپ كەتكەنىن سەزبەي دە قالدى.

  دۇكەنشى ءبىر بەكىمگە كەلىپ، ءبىر دانا بەلەتتى سۋىرىپ الدى. بەلەتتىڭ ول جەر، بۇل جەرىنە قاراپ، ءنومىرىن داۋىستاپ وقىدى دا ارتىنان ەكى بۇكتەپ شاپانىنىڭ قالتاسىنا سالىپ قويدى. سودان كەيىن ساعيراعا ەكى تۇمەندىك جىرتىق اقشانى ۇستاتا  بەردى.  ساعيرا دا اسىعىس دۇكەننەن شىعىپ، سەيتتىڭ ارتىنان جۇگىردى. ءبىرىنشى بۇرىلمادا وعان جەتىپ الدى. سەيت وعان ايرىقشا رازى ەدى. قوينىنان سۇرتكىشتى الىپ ساعيراعا كورسەتتى:

  - جاقسى ەكەن،- دەدى كوزىن قىسىپ،_ تازا، جاپ- جاڭا ءارى ۇلكەن. كوپكە دەيىن پايدالانۋعا بولادى... ساعيرا، ساعان قول قويدىم. بۇگىن كوبىرەك اقشا تابا السام، ەرتەڭ جۇما كۇنى قالا باقشاسىنا بارىپ ساعان شەكەر قوسقان توقاش الىپ بەرەمىن.

  -راس پا؟- دەدى ءسۇيىنىپ كەتكەن قىز،- انەۋ كۇنگىدەي الدامايسىڭ عوي؟

  - ول كەزدە اقشامنىڭ بارلىعىن مەن  ۇرلاپ العانداي-اق ساقشى تارتىپ الدى ەمەس پە؟..

  ىستامبول ءتورت كوشەسىنە كەلىپ توقتادى.

  -انا جاققا بارامىسىڭ؟- مۇھبەر-ءاد-داۋۇل  مايدانى  جاقتى يشارات قىلىپ سۇرادى سەيت.

  - جوق، باسقا جاققا بارامىن.

  - ونداي بولسا بەسىندە  كەزدەسەرمىز.

  -بولادى، ساۋ تۇر.

  سەيت قادامىن جيىلەتتى. جان دۇنيەسى قۋانىشقا تولعان ەدى. بۇگىنگى كۇن كوڭىلدى باستالدى. بۇگىن البەتتە كوپ اقشا تابا الادى! ساعيرانىڭ ۇشىراپ قالعانى جانە جاڭا سۇرتكىش تاۋىپ العانى جاقسى بولدى عوي! ول ساعيرانى ەرتىپ سىتاراەت باقشاسىنا بارۋدى،  قالاي قوناق قىلۋدى قيالداپ كەتىپ بارا جاتتى.

   ساعيرا مەن سەيت سەگىز جاسىندا تانىسقان ەدى. ولار ءبىر-بىرىنە ايرىقشا ءۇيىر بولىپ قالماستان، تاعدىرلاس تا ەدى.

  سەيتتىڭ  كىشكەنتاي  كۇنىندە اكەسى اشتىقتان قايتىس بولىپ كەتكەن، ال، اناسى باسقا اداممەن ۇيلەنگەندىكتەن، سەيت ۇيدەن شىعىپ كەتكەن
بولاتىن. اناسى دا، بىرگە تۋعاندارى دا ونى ىزدەپ قويعان جوق.

  ساعيرانىڭ اكەسى اراقكەش بولىپ، ساعيرانىڭ اناسىن جاۋىزدىقپەن قورلايتىندىقتان، بەيشارا ايەل ەس-اقىلىنان اداسىپ، جارىمەس بولىپ كەتكەن. ال، اكەسى بولسا ايەلىن شيپاحاناعا ەمدەلۋگە جىبەرەدى دە باسقا بىرەۋمەن باس قۇراپ الادى. وگەي شەشەسى اكەسىنەن بەتەر جاۋىز، قانقۇيلى بولىپ شىعادى. ساعيرا ونىڭ قورلاۋىنا شىداي الماي، سەيت مايلاپ وتىرعان ۇيدە تۇرىپ جاتقان اپايىنىڭ ۇيىنە قاشىپ كەلەدى. بۇل لاتاريا بەلەتىن ساتىپ كۇن كورەدى، اندا-مۇندا تۇرمىستان تارىعىپ كەتكەندە، ۇرلىق تا ىستەيتىن.

  وسى ءبىر كۇردەلى، الىپ جاھاندا ساعيرا مەن سەيتتىڭ بىردە -ءبىر جاقىن ادامى جوق بولعاندىقتان دا ءبىر-بىرىنە باۋىر باسىپ كەتكەن ەدى. اپايىنىڭ ۇيىندەگى جاڭجال، ءمان-ماعىناسىز كەرىستەر ولاردىڭ كوڭىلىندەگى مەيىر-شاپاعاتتى جوعالتا الماعان-دى.

  ...ساعيرادان ءبولىنىپ، سەيت قادامىن جىتىرمەلەتە ءتۇستى، كوپ-وتپەي-اق مايدانعا كەلىپ جەتتى. ۇلكەندى-كىشىلى، ەسكىلى-جاڭالى اۆتوكولىكتەر قاتار-قاتار ءتىزىلىپ، مايدانعا لىق تولعان، اۆتوكولىكتەر اراسىنا ات اربالار دا سىنالاپ كىرىپ العان ەكەن.

  سەيت جەڭىل اۆتوكولىكتىڭ بىرەۋىنە جاقىنداسىپ، قوينىنان سۇرتكىشىن الدى دا اينەگىن سۇرتۋگە بەيىمدەلە بەردى. مۇنداي ىسكە ول ابدەن ىسىلىپ العان، كۇن سايىن بوتەن ادامداردىڭ اۆتوكولىگىنىڭ اياق باسقىشىنا شىعاتىن دا لاي-باتپاق پەن قاتقان مۇزدى ەرىتۋشى ەدى.

  اندا-مۇندا، اۆتوكولىك يەلەرى قارسىلىق بىلدىرمەسە بولدى، اۆتوكولىكتىڭ اينەگىن عانا ەمەس، ءتىپتى، ۇستىندەگى، قاپتالىنداعى، جاپقىشتارىنداعى قاتقان مۇز-قارلاردى ەرىتىپ شىعۋشى ەدى. ءبىراق، كوبىندە  «جوعال، جولىمىزعا توسالعى بولماي!» دەپ قۋىپ جىبەرەدى. اۆتوكولىگىن سۇرتكەندە ءتىس جارىپ، ءتىل قاتپاستان قاراپ تۇرىپ، جۇمىسىن ابدەن بىتىرگەن سوڭ، ءبىر اۋىز راقىمەت تە ايتپاي «سوڭىرا ەسەپتەسە جاتارمىز!» دەپ كەتە باراتىن ءبىر مىرزالار دا كەزىگىپ قالادى. اندا-مۇندا باعى جانىپ جاقسى ادامدار دا كەزىگىپ قالادى، ولار سەيتكە ءتۇرلى جۇمىستاردى تاپسىرىپ، سوڭىنان قولىنا بىرنەشە تەڭگە، كەي-كەيدە جولى بولعاندا بەس رەال ياكي ءبىر تۇمەن ۇستاتىپ كەتەتىن.

  ...مىنە، قازىر دە تاۋەكەلشىلدىك ىستەۋدە. جاڭبىر جاۋا باستادى، ازدان سوڭ سۇيەكتەن وتكەن سۋىققا شىداماي، قالتىراپ قويا  بەردى. اياق كيىمى شىلقا سۋ بولىپ، اياعى قاتىپ قالعان ول جانىنان زىرقىراپ ءوتىپ جاتقان اۆتوكولىكتەردەگى ءوز تۇستاستارىنا قىزىعا قارايدى. ال، ولار سەيتكە الىمسىنباي قاراپ قويادى.

  ول جۇمىسقا كىرىسكەلى ءۇش ساعاتتاي بولدى، تۇسكى استىڭ ۋاقىتى دا تاياپ قالعان ەدى. كەنەت، مايدان ورتاسىنا قىپ-قىزىل ءبىر اۆتوكولىك كەلىپ توقتاي قالدى. سەيت جۇگىرىپ باردى دا اياق باسقىشىنا سەكىرىپ شىعىپ، اينەككە قاتقان مۇزدارىن جىلدامداتىپ ەرىتە باستادى. شوفەر ارتىنا بۇرىلىپ،  ارتقى ورىندىعىندا وتىرعان  سۇلۋ ايەل مەن اسەم كيىنگەن ەركەككە قىزىق بىردەمەلەردى ايتىپ جاتقان  ءتارىزدى، ۇشەۋى ءماز-ءمايرام كۇلىپ وتىر.

  سەيت اۆتوكولىكتىڭ الدىڭعى اينەگىن جانىن سالا ەرىتىپ جاتىپ، اندا-مۇندا كولىك ىشىنە قاراپ قويادى. كەنەت ساقشىنىڭ ىسقىرىعى شالىنىپ، قاتىناسقا قولباسشىلىق ەتۋ ورنىنىڭ جاسىل شىراعى جاندى، قاتار تۇرعان اۆتوكولىكتەر قوزعالا باستادى. سەيت لىپ ەتىپ سەكىرىپ تۇسكەنى سول ەدى، جۇك اۆتوموبيلى ارت جاعىنان كەلىپ ۇردى، سەيت اناداي جەرگە ۇشىپ كەتتى. قىزىل اۆتوكولىك تەز قوزعالعاندىقتان، سەيتتىڭ اياعىن مىجىپ وتە شىقتى. شىرقىراعان  سەيت  ەس-اقىلىنان اداستى. ال، اۆتوكولىكتەر ىركىلىسسىز ءوز جولدارىنا كەتىپ جاتتى.

  سەيتتىڭ ماڭىنا ءبىر مۇنشا ادام جينالدى، بالانىڭ اياعى مىجىلىپ، جارىلعان باسىنان قان ساۋلاپ تۇر.

  مايداندا ساۋدا ىستەپ جۇرگەن ۇساق ساتارماندار جۇگىرىپ جەتىستى، ولاردىڭ اراسىنداعى بىرەۋى سەيتتى جول شەتىنە كوتەرىپ اپارىپ جاتقىزدى.

  بىرنەشە سەكۋندتان سوڭ سەيت كوزىن اشىپ، ماڭىندا توپىرلاعاندارعا اڭىرا قارادى. قورشاپ تۇرعانداردىڭ بارلىعى بوتەن ادامدار، ول باياۋ ىڭىراندى. جارتىلاي اشىلعان اۋزىمەن ەنتىگە دەم الادى، وڭىندە قان-ءسول جوق، اپپاق قۋداي بولىپ كەتكەن، ۇساق ساتارماننىڭ بىرەۋى سۋ اكەلىپ، بالانىڭ ەرنىنە تيگىزدى.

  بالا سۋدان زورلانا بىرەر جۇتىم جۇتتى. اۋرۋ ازابىنا شىداي الماي ءوڭى بىجىرايىپ كەتكەن، ماڭىنا توپتاسقاندار بارعان سايىن كوبەيە بەردى. ساقشى تارقالىڭدار دەپ بۇيىرسا دا ەشكىم ورنىنان قوزعالعان جوق.

  -بەيشارا بالاعا وبال بولدى،- ءجونسال كيىنگەن  قارتاڭ   ادام وقىتۋشىعا ۇقساپ قالاتىن سۇستى جىگىتكە،- شوفەر قايدا كەتتى؟-دەدى.

  -قاشىپ كەتتى ەمەس پە؟!-دەپ باسىنداعى جاۋلىقتى وڭاپ، سوزگە ارالاستى سەمىز ءبىر ايەل،-ءبىراق، ماسەلە وندا ەمەس، ءبارىبىر وعان جاردەم بەرە المايسىڭ،- دەدى سەيتتى يەگىمەن نۇسقاپ.

  باسىنا سالدە وراعان ءبىر ادام توپ اراسىنان شىعىپ، بالاعا قاراپ كۇبىرلەپ، الدەبىر تىلەك تىلەدى دە كوزدەن عايىپ بولدى.

  -مۇنى نەگە شيپاحاناعا اپارمايدى؟- دەپ سۇرادى تاپ-تازا كيىنگەن ءبىر ايەل كوپتەن بەرى شاشىنا تاراق تيمەگەن ۋدار-دۋدار جىگىتتەن.

  - پايداسى جوق، ول ءبارىبىر ولەدى،- دەدى جىگىت نەمكەتتىلەۋ قىلىپ، جەلكەسىن قاسىپ قويىپ.

  -ەرتەڭ ەرتەمەن ەكى تۇمەننىڭ ورنىنا 25 تۇمەن اقشا ۇستايتىن بولاسىز!-الىستان ساعيرانىڭ ءۇنى ەستىلدى.

  سەيتكە سۋ بەرگەن جاس ساتارمان سەيتتىڭ باسىن ابايلاپ ۇستاپ تۇرعان ەدى. بالانىڭ كوزى الايىپ، ەرنى مەن قاباعى كوگەرىپ سالا بەردى. سەيتتىڭ وڭ قولى قالتاسىندا، ول قولىن شىعارماقشى بولىپ ىمداپ ءبىلدىردى. ساتارمان بولىسىپ قولىن قالتاسىنان الىپ شىققان ەدى، جۇدىرىعىن تاس ءتۇيىپ العان ەكەن.

  ساعيرا قورالانىپ تۇرعانداردى انادايدان كورىپ قالعان بولاتىن، قاۋمالاعانداردى يتەرىپ، توپتىڭ ىشىنە كىرىپ، جەردە جاتقان سەيتتى كورىپ، شىرقىراپ جىلاپ قويا بەردى. قىز بالانى كورگەن سەيتتىڭ جانارىندا قۋانىش وتى وينادى، باعانادان بەرى توسىپ جاتقان قادىرلى ادامنىڭ ءوڭىن، ءوزى جاقسى كورگەن، بۇل دۇنيەدە بىردەن-ءبىر دوسىنىڭ ءوڭىن اقتىق رەت كورۋگە ۇلگىرگەن ەدى.

  ساعيرا سەيتتىڭ ءوزىن تانىعانىن ءبىلىپ، جاقىندادى، بەتىنە بەتىن تاقاي ءتۇستى.

  سەيت قولىن سوزىپ، ازەر دەگەندە الاقانىن اشتى، بىرنەشە جالتىراعان تەڭگە بالانىڭ قولىنان ساعيرانىڭ الاقانىنا ءتۇستى.

  -ساعيرا، قادىرلىم،- دەپ زورعا سىبىرلادى بالا،- وزىڭە شەكەر قوسقان توقاش ساتىپ ال.

  ول جانە الدەبىردەمەلەردى ايتپاق بولىپ ەدى، ۇلگىرمەي قالدى، كوزى تاسىرايىپ، تىنىس الۋدان توقتادى، باسى ساعيرانىڭ تىزەسىنە سىلق ەتە ءتۇستى.
 
اۋدارعان - مۇرات قاسەن ۇلى
 
  رەداكتورى: اراي ەركىن قىزى

  تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

  مسالى: «تارباعاتاي اقپارات تورابىنان» الىندى.

 
 
powered by IlgharCMS 3.2 www.ilghar.cn