ەەڭ جاڭا مازمۇندار
”جاڭا داۋىردە ەكپىندەي ىلگەرىلەۋ“ نەگىزگى تاقىرىپتىق تابىستار كورمەسىنىڭ شينجياڭ كورمە بولىگى تارتىمدىلىعىمەن كوزگە ءتۇستى
«تاعدىرلاس بولىپ، داڭعىل جولمەن ىلگەرىلەۋ − شي جينپيڭنىڭ ديپلوماتيا يدەياسى ادامزات دامۋىنىڭ، العا باسۋىنىڭ اعىمىن ىلگەرىلەتتى»
بۇقارانىڭ ءىسىن قاشاندا كوكەيىندە ساقتادى
ايماعىمىزدا 610 مىڭ مۋ جەرگە دۇمبە ءبيداي سىڭىرىلە باستادى
ءۇمىت اتىزىنان مول ءونىم جىرى شىعاندادى
تىكە تاراتۋ بولمەسىنەن”ءىرى ەلدىڭ استىق قامباسىن“ تاماشالادى
شاعانتوعاي: ماقسارىنى جىنتىكتەي مانەرلەۋگە جاڭا كۇش قوسىلدى
2022-جىلى 9-ايدىڭ 30- كۇنى 218-سان
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرە
پارتيانىڭ بەكىمىن، حالىقتىڭ رايىن ۇيىستىرىپ، گۇلدەنۋ ۇلى ءىسىن ىلگەرىلەتتى
رەفورما شارالارىنىڭ تياناقتانىپ، ونىمدىلىك كورسەتۋىن جەدەل ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى قولداۋ، قامتاماسىز ەتۋ كەرەك
زەيىن - زەردەنى، كۇش - قۋاتتى ۇيىستىرىپ، بورىشتى ارقالاپ، قايراتتانا العا ۇمتىلىپ، جاڭا تاراۋ جازايىق
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرەك
تاريحتى اينا ەتىپ، وتكەندى باعامداپ، بولاشاقتى بولجاپ، گۇلدەنۋ جولىندا تاباندىلىقپەن العا باسۋ كەرەك
ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ ماڭىزدى تالابىن جاپپاي تياناقتاندىرىپ، پارتيا 20 - قۇرىلتايىنىڭ جەڭىسپەن اشىلۋىنا حاۋىپسىز، ورنىقتى ساياسي، قوعامدىق ورتا جاراتۋ كەرەك
اۆتونوميالى رايوننىڭ وقۋ - اعارتۋدى جوعارى ساپامەن دامىتۋ جينالىسى اشىلدى
بارشا جۇڭگولىقتى تۇگەل اناعۇرلىم جاقسى تۇرمىسقا كەنەلتتى
شينجياڭدى سىرتقا ەسىك اشۋدىڭ الدىڭعى شەبى ەتىپ قۇرىپ شىعامىز
جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايىنا قاتىناساتىن ۋاكىلدەر تۇگەل سايلانىپ شىقتى
ۋاكىلدىك بورىشتى ادالدىقپەن اتقارىپ، ۋاكىلدىك رولدى تولىق ساۋلەلەندىرەيىك
مەملەكەتتىك حالىق قۇرىلتايى تۇراقتى كوميتەتىنىڭ زاڭنىڭ اتقارىلۋىن تەكسەرۋ گرۋپپاسى رايونىمىزدا زاڭنىڭ اتقارىلۋىن تەكسەردى
2022-جىلى 9-ايدىڭ 29- كۇنى 217-سان
2022-جىلى 9-ايدىڭ 28- كۇنى 216-سان
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى

انا شاراپاتى

جولدانعان ۋاقىتى : 2017/5/15 13:47:22

داۋكەن ابزالقان ۇلى (شالقىما)
 
  1976-جىلى اقپان ايى اكەم قايتىس   بولىپ،الىس-جۋىقتان جيىلعان اعايىن-تۋىستاردىڭ ىشىندەگى جاسى ەڭ ۇلكەنى،اكەمنىڭ كىشى اكەسى بولىپ كەلەتىن سىدىق دەگەن  كىسى تاڭەرتەڭگى شاي ۇستىندە شەشەمە بۇرىلىپ ءسوز باستادى.

  -ءجا،قاراعىم،نۇرباعي كەلىن. «ءولىنىڭ بەتى ارى،ءتىرىنىڭ بەتى بەرى» دەگەن،«ولگەننىڭ ارتىنان ولمەك جوق»،ەندى ءتىرى ادام تىرشىلىگىن ىستەۋ كەرەك. ءبىز بولساق، ايدان ارتىق جاتتىق،بۇل جەردە ەندى جاتا بەرۋدىڭ ءجونى دە جوق. ءبارىمىزدىڭ دە ءوز وتباسى،ىستەيتىن جۇمىسىمىز،كورەتىن تىرشىلىگىمىز بار دەگەندەي... كەشە ەل قاتارلى وتباسى ەدىڭدەر،بۇگىن مىنە،اللانىڭ امىرىمەن جولداسىڭ ومىردەن ءوتتى. جاسىڭ بولسا ءالى وتىزعا دا جەتپەدى،ءتورت بالامەن    ارتىندا قالدىڭ. شيتتەي ءتورت بالانىڭ الدى وننان ەندى استى،ارتى بەسىكتە،ءبىز قانشا قينالعانمەن ءبارى جاراتۋشىعا ءجون بولدى. ءبىزدىڭ بەرگەن بەس-ون تيىن نە بولار دەيسىڭ؟وزىڭنەن سۋىرىلىپ شىعاتىن ەڭبەككۇش بولماعان سوڭ دەپ اينالاسىندا قورالاي داستارقاندا وتىرعان جالپى تۋىستاردى سۇراۋلى كوزبەن ءبىر شولىپ شىقتى دا،الدىنداعى سۋىپ قالعان شايىنان بىرنەشە ۇرتتاپ الىپ ءسوزىن قايتا جالعادى.

  -ە،«ورىندا بار وڭالار» دەيدى،ءتورت ۇرپاق امان بولسا ءالى-اق جەتىپ كەتەدى. ءتاڭىردىڭ بۇلارعا دا جازعان رىزدىعى بار. سەندەردى كەشكە دەيىن جىلاتىپ قويمايدى. سابىرلىقپەن ارتىن كۇت قاراعىم. «ەل اقىلىمەن باي بولعانشا،ءوز اقىلىڭمەن جارلى بول»  دەگەن. بەرگەنىن السا دا،بەرەرىن الماسىن. ءالى-اق ەل قاتارلى وتباسىلاردىڭ ءبىرى بولىپ كەتەسىڭدەر دەپ الدىڭعى ءسوزىن جايماشۋاقتاي كەلىپ توقتادى...

  ەر-ايەلىمەن جيىرماعا تارتا ءبىرشاما جاقىن دەگەن تۋىستار ەدى بۇل وتىرعاندار. ءبىراق، وسى ۇلكەن كىسىنىڭ پىكىرىنە ەشكىم دە قارسى ءسوز قوسپادى. سىڭايى ءبارىمىزدىڭ دە ءوز وتباسىمىز،ارتىمىزدا مال-جانىمىز قاراۋسىز قالىپ بارادى دەگەندەي سىڭايلى...

  تاڭەرتەڭگى شاي ءىشىلىپ بولىپ،داستارقان جيىلا باستاعاندا شەشەم تۋىستارعا قاراپ مىنانى ايتتى:
 
  -راقىمەت،بارلىقتارىڭىز قوعاداي قوپارىلىپ كەلىپ قىرقىنا دەيىن جاتىپ،ءوز قولدارىڭىزبەن وتكىزىپ جاتىرسىزدار. بۇل تۋىسقاندىقتارىڭىزدىڭ بەلگىسى. سىزدەرگە ايتارىم ەندى تۋىسىمىز كەتتى دەپ الىستاپ كەتپەڭىزدەر! تۋىستارىڭىز بولماسا دا ارتىندا ءتورت بىردەي ۇرپاعى قالدى. وسىلار ءۇشىن بولسادا ات ءىزىن سۋىتپاي كەلىپ تۇرىڭىزدار دەپ  ءسوزىن قىسقا قايىردى. شەشەمنىڭ سوزىنەن سوڭ ولار اسىعىس اتتانا باستادى.

  شەشەمنىڭ تاعى ءبىر ءوتىنىشى قابىلدانباي قالدى. ونداعى ايتقانى مىناۋ ەدى. اكەمىز اۋىرا باستاعاندا قولىمىزدا جەتى-سەگىز سيىر تۇلىگى بار بولاتىن. شەتىنەن ساتىپ،بار قالعانى ەكى بۇزاۋلى سيىر،ءبىر ات،ءبىر بيە. سول جىلى ۇكىمەت تاعى دا جەكە مەنشىك مالدى قالدىرماي جيۋ ناۋقانىن باستاعان ەدى. وسى جيۋدا وسى ءىرى قارالاردى باستىقتار ۋاقىتشا الماي توقتاتىپ قويعان بولاتىن. ويتكەنى وتباسى باسى ۇلكەن اۋرۋ،ەگەر ولاي-بۇلاي بولىپ كەتسە وسى قالعان مالمەن ءوز جاندارىن باعادى،ۇكىمەتتىڭ باسقا بەرەرى جوق دەگەن ۇيىمنىڭ ۇلكەن قامقورلىعى ەكەن بۇل. سول ەكى سيىردىڭ بۇزاۋلارى قىس وتە تايىنشاعا اينالىپ قاتارعا قوسىلا باستاعان بولسادا،اكەمىز قايتىس بولعان جىلعى قىس قاتتى بولدى دا  اكەمىزدىڭ جاعدايىمەن سول ەكى تايىنشالى سيىر قاراۋسىز قالىپ،ءشوپ قۋالاپ جايىلىپ كەتكەن ەكەن. ونى اكەمىزدىڭ قىرقىنا تاياعاندا ءبىر-اق جوقتادىق. وسى جوعالعان ەكى   تايىنشالى سيىردى ىزدەپ بەرەسىزدەرمە دەپ اسىعىس اتتانعالى جاتقان تۋىستارعا ايتىپ ەدى اكەمنىڭ تاعى ءبىر نەمەرە اعاسى:

  -ايتقانىڭ ءجون عوي،ءبىراق ول سيىرلاردىڭ ءتۇسىن جىعا تانىمايمىز،قانشا قاراعانىمىزبەن بەيقايرات ءجۇرىس بولار،ەڭ جاقسىسى،ءوزىڭ ىزدەپ كور. اسىقپاي قونا تۇنەپ ىزدەسەڭ،ەل ەمەس پە،بىرەۋ بولماسا بىرەۋ كورەدى. بۇعان بولا جاسىپ ۇيالما!  ءبارى دە جازىمىش،ءتىرى ادامعا تىرشىلىك كەرەك. ساعان ءتورت  ءىرى قارانى كىم   بەرەدى دەيسىڭ. ودان دا بەلىڭدى بۋ دا   ءىزىن سۋىتپاي تاۋىپ ال دەپ شەشەمنىڭ  وزىنە ءجون ايتتى. شەشەم دە بۇل كىسىگە قايىرىلىپ ءسوز ايتقان جوق. اكەمىز قاتتى  قىسىلىپ جاتقاننان قايتىس بولىپ،وسى جابدىقتار وتكەنشە تۋىستار ءبىر-اق قوتارىلىپ قايتقاندا اباجاداي تاس ءۇيدىڭ ءتورى اڭىرادى دا قالدى. تۋىستاردىڭ جاتۋىمەن ەشتەڭە  بىلمەگەن ەكەنبىز. ۇركەردەي بولىپ ۇدىرەيدىك تە  قالدىق...

  وسى ۇدىرەيىسپەن ون كۇندى وتكىزدىك. اسىرەسە كۇن باتقان سوڭ قورقىنىش اۋىرلايدى. ويتكەنى ەڭ كىشى باۋىرىم ەس بىلمەيتىندىكتەن وعان بىلىنبەسە كەرەك. قالعان ءبىر ءىنىم،ءبىر قارىنداسىم قاراڭعى تۇسسە بولدى شەشەمىزدىڭ الدى-ارتىنا تىعىلامىز. سوندا شەشەم بىزگە: «قورىقپاڭدار،مەن بارمىن. بىردەمە كەلسە مىنامەن باسىنا ءبىر-اق ۇرامىن!» دەپ نان جاياتىن وقتاۋدى كورسەتەتىن جانە سول وقتاۋدى ءاردايىم باسىنا جاستاپ جاتاتۇعىن.

  دەگەنمەن ون شاقتى كۇننەن كەيىن بىزدە ءبىرشاما ۇيىرەنىسىپ قالدىق.
 
  ءبىر كۇنى كۇن جۇما بولاتىن. ءبىزدىڭ  اۋىلدىڭ باتىس اياق جاعىندا قىستايتىن ءبىر ۇلكەن موللانىڭ اۋىلى بار ەدى. اكەمنىڭ  ورنىنا قۇران وقيمىن دەپ سول قالياسقار موللانىڭ ءوزى كەلىپتى. شاي ۇستىندە شاريعات ايتىپ ۇزاق وتىردى. سول كوپ ءسوزىنىڭ ىشىندە ەرەكشە ويىمدا قالعانى: قيامەت-قايىمدا ولگەن ادام ارعى دۇنيەدە تۇگەل ءتىرىلىپ شىعىپ،ءولى مەن ءتىرى قايتادان باس قوسادى ەكەن. ول باس قوسۋعا ەندى ەكى مىڭ جىل قالعانىن ايتتى. سول اڭگىمەدەن مەن اكەمنىڭ تۇبىندە ءبىر ءتىرىلىپ قايتىپ كەلەتىنىنە دارداي سەنىپ،ۇمىتتەنىپ ءجۇردىم...  اۋەلى «اكەم تىرىلەتىن بولسا ەكى مىڭ جىل قانشا ۇزاق دەيسىڭ!» دەيمىن بالا قيالمەن ىشتەي مارسيىپ...

  شەشەم مەنى ءبىر كۇنى كورشى جىگىتتىڭ قاسىنا قوسىپ،اكەمنىڭ نەمەرە اعاسىنىڭ ۇيىنە جىبەردى. ونداعىسى سول ۇيدە ۇلكەن ءبىر اپامىز بار ەدى. اتى كۇلساعيرا. سول كەزدە سەكسەنگە تاياپ قالعان بولسادا وتە تىڭ، سەرگەك،دەنساۋلىعى دا سونداي جاقسى   بولاتىن. وسى كىسى ۇيگە كەلىپ بالالاردى قاراپ بەرسىن،مەن جوعالعان سيىرلاردى   تاۋىپ الايىن دەگەن بولاتىن.

  ايتۋى بويىنشا،سول اپامىز كەلىپ بىزگە قارادى دا شەشەمىز قالىڭ كيىنىپ،قورجىنىنا ازىن-اۋلاق اتىنا بەرەتىن جەمىن بوكتەرىپ، كادۋەلگى جوقشىداي جولعا شىقتى.

  سول جىلى قىس ەرەسەن قاتتى،جۇت  بولاتىن. شەشەم وسى كەتكەننەن ءبىر جەتىدەي ۇيگە ورالمادى. وزىمنەن كەيىنگى ءىنىم ەس ءبىلىپ قالعان. ال ودان كەيىنگى قارىنداسىم شەشەمدى ىزدەپ جىلايدى. بار بولعان كيىمدەرىمىزدى كيىپ،كەشكە دەيىن توبەگە شىعىپ الىپ شەشەمىز كەتكەن جاققا تەلمىرەمىز دە تۇرامىز. ءبىر جاعىنان،قارىنداسىمىزدى ۋاتقان بولامىز،ەندى ءبىر جاعىنان،شەشەمىز جوق ۇيگە تۇرعىمىز كەلمەيدى. قارىنداسىمنىڭ   ويىندا اياق استىنان اكەمىز جوق بولدى،ەندى شەشەمىز تاعى جوق بولاما دەگەن ۇلكەن   ۇرەي بار. باقىرىپ جىلاي باستاعاندا سونادايدان كورىنگەن اتتى بىرەۋدى «انە،شەشەمىز كەلە جاتىر» دەسەك جىلاۋىن توقتاتا قالادى دا،جىعىلا-مىعىلا سولاي جۇگىرەدى. وسى قارىنداسىم اكەمىز قايتىس بولعان ءتۇنى ۇيىقتاپ قالعان. ءتۇن ورتاسىندا وتكەن اكەمدى دالاعا قوسقا شىعاردى. ەرتەسى تاڭەرتەڭ  تۇندەگى جاتقان ورنىندا جوق اكەمدى ىزدەپ  «اتام قايدا كەتتى؟ اتاما بارامىن!» دەپ باقىرىپ ىزدەپ جىلاعان بولاتىن. ءبىز اعايىندى ۇشەۋىمىزدە اكەمىزدى «اتا» دەپ شاقىراتىن   ەدىك.

  سول زاتتە بولعان ءسابي جۇرەگى تاعى دا الاڭداپ تۇرعانى بولار...
 
  ءبىز ءسويتىپ توبەدەن تۇسپەي جۇرگەن كۇننىڭ بىرىندە قارا بوران قاتتى سوعىپ تۇرعان. شەشەم ءوزىمىزدىڭ ەكى سيىردى ەكى تايىنشاسىمەن قوسىپ ايداپ اۋىلدىڭ اياق جاعىنداعى سايدان شىعا كەلگەنىن كورگەندە قۋانعانىمىز سونشا،قارىنداسىمىزعا قاراماستان ءىنىمىز ەكەۋىمىز الدىنان تۇرا جۇگىردىك.  ءاسىلى سيىرلاردىڭ تابىلعانىنا ەمەس،شەشەمىزدىڭ امان-ەسەن كەلگەنىنە قۋانعانىمىز بەلگىلى. ويتكەنى وسى جەتى كۇن ىشىندە شەشەمىزدىڭ ورنى ءبىز ءۇشىن ەرەكشە بولەك ەكەندىگى اڭعارىلعان. شەشەمىز ەندىگى سۇيەنىشىمىز،ۇلكەن باس قالقامىز،مىقتى تياناعىمىز،ەندىگى اكەمىز دە، شەشەمىز دە وسى ءبىر-اق ادام.

  وسىدان جارىم اي وتكەندە ەل ويعا كوشەتىن بولىپ،ابىر-سابىر قاربالاستىققا ءتۇستى. جانىمىزدا زاكاريا دەيتىن بويداق قوي  باعاتىن كورشىمىز بار ەدى. بۇلاردا ەل قاتارلى ويعا كوشكەلى جاتتى. شەشەم تاڭەرتەڭ سول كورشىمىزدىڭ ۇيىنە بارىپ «سەندەر كوشسەڭدەر مىنا قىستاۋدا قايتىپ جالعىز ءۇي وتىرا الامىز،سەندەر باردا سەندەردىڭ كولىكتەرىڭمەن اڭكە پۋنكتىنە كوشىپ بارىپ الساق،وزىڭدە كوشىرىسىپ سالساڭ» دەگەن ەدى، ءتىل   بۇرماس ەلپەك كورشىمىز الدىمەن ءبىزدى سول پۋنكتكە كوشىرىپ جەتكىزىپ قويدى.

  بۇل جەرگە كوشىپ كەلۋدەگى سەبەبىمىز ءبىزدىڭ وتباسىمىز جەتىم-جەسىر،قيىنشىلىعى اۋىر،ەڭبەككۇشى جوق،كوشىپ-قونۋعا جاعدايى كەلمەيدى. سوندىقتان جايىر تاۋىندا ون نەشە ءتۇتىننىڭ ءبىرى بولىپ قالاتىنىمىزدى دۇي باسشىلارى جيىندا بىرنەشە كۇننىڭ الدىندا ۇقتىرعان. بۇعاندا كوپ-كورىم قۋانىپ قالدىق. سەبەبى،بىزدەي شابان-شالاڭ،بوقتى وشاقتىڭ ويعا كوشىپ-قونۋى مۇمكىن بە؟ ءبىزدى كىم سۇيرەپ،كىم تاسيدى دەيسىڭ؟  ءاسىلى بۇل سول باسشىلارعا الدىن الا جاعداي ايتىپ،ءوتىنىشىن جازىپ بەرىپ قويعان  شەشەمنىڭ جۇمىسى ەكەن.

  ءبىز پۋنكتتىڭ ءبىر ۇيىنە كىرىپ وتىردىق. كورشىلەردەن ازداپ وتىن-سۋ الىپ دەگەندەي،كۇندەلىكتى تىرلىگىمىزدى كورىپ جاتتىق. جادىراپ جاز شىعىپ،جەر كوكتەي باستاعاندا ون شاقتى ءتۇتىننىڭ ۇستىنەن قارايتىن جاۋاپتىسى زەينەقابىل دەگەن كىسى ءبىزدىڭ ۇيگە كەلىپ،ەندى از كۇندە بۇلىق كوتەرىپ جەر ايدايمىز،مىنا بالاڭ قوسىمشا ىستەي السا ىستەسىن،ەڭ جەڭىل ءبىر جۇمىسقا ورنالاستىرايىن،بىردەمەسىن ىستەپ،ەڭبەكاقىسىن  السىن دەدى. بۇعان ماقۇل بولىپ قۋانىپ قالدىق.

  ءساۋىر ايىنىڭ جيىرماسىنا قارسى جايىر  تاۋىنىڭ قۇجىرتاي وزەنى بويىنداعى ءوندىرىس ناۋقانى باستالىپ كەتتى.

   مەن گرۋپپا جەتەكشىسىنىڭ ورنالاستىرۋى بويىنشا،ەڭ جەڭىل دەگەن جۇمىس بۇلىقپەن اۋدارىلعان جەرگە قولىمەن ارپا تۇقىمىن شاشامىن،ونىڭ ۇستىنەن تۇقىمدى جاسىرۋعا مانا باسامىز،سول مانانى ماعان ايداتتى. مانا ايداعاندا جاياۋ ايدامادىم،ماناعا شەگىلگەن اتقا  ءمىنىپ الام دا،كەشكە دەيىن شابان كۇرەڭمەن تەپەڭدەيمىن دە وتىرامىن. ءوزى شابان،  ءوزى ارىق جانۋار اۋدارىلعان قارا توپىراقتان تەمىر مانانى ارەڭ قوزعاپ،ۇزاق كۇندە ميمىرتتاپ ءجۇرىپ وتىرادى. كەيدە استىمداعى اتىمدى از-كەم دەمالدىرىپ توقتاي قالامىن. كوپ تۇرۋعا جانە بولمايدى. كوپ تۇرىپ قالسام،تاقتانىڭ بەتىندەگى سەبىلگەن تۇقىم ۋاعىندا جاسىرىلماي قالسا مەنىڭ مىندەتىم ورىندالماي قالعانى. سونىمەن وزىمدە شارشاعاندىقتان،قالعىپ-شۇلعىپ جۇرە بەرەمىن.
  
  راسىندا،كەيدە جۇكتەلگەن مىندەتىم ورىندالماي قالىپ،تۇسكى شايعا بارا الماي قالعان كەزدەرىم بولعان. وسىنداي كۇندەردىڭ بىرىندە اتىم دا تيتىقتاپ،ءوزىم دە قاتتى شارشاپ قاڭعىرىعىم تۇتەپ،اتتىڭ ۇستىندە كەلە جاتىپ قالعىپ كەتىپپىن دە جەرگە دومالاپ  ءتۇسىپپىن. ءبىر ءتاۋىرى ايدالعان جۇمساق توپىراق،ەش جەرىم اۋىرمادى. جۋاس كومپىس جانۋارمەن جىعىلعان جەردە توقتاي قالدى. بۇل مەنىڭ بالا بولىپ قابىرعام قاتپاي تۇرىپ ەڭبەك دەيتىن قارا جۇمىسقا شەگىلگەن العاشقى باستامامنىڭ باسى وسى بولاتىن.

   وسىدان ءبىر جارىم اي وتكەندە مەنىڭ  العاشقى ايلىق ەڭبەكاقىم شىعىپ وتىز يۋان كەلىپتى. سول كەزدە شەشەمنىڭ اياق كيىمى توزىپ،شۇپەرەك شاقايمەن جۇرگەندىكتەن، جيىرما بەس يۋانىنا ءبىر ەتىك الدى. ءدال سول كەزدە شاي تاۋسىلىپ،اق سۋ ءىشىپ  وتىرعان ەدىك،ءتورت جارىم يۋانىنا ءبىر شاي الدىق. شەشەمنىڭ قۋانىشى قوينىنا سيماي كورشىلەرگە جۇگىرىپ،مەنىڭ ۇلىم ازامات بولىپ ەڭبەككە جارادى دەپ قۋانعانى بار. مەندە وسىلاي ءبىر ەڭبەكشى بولعانىما ماقتاندىم. ءبىراق ءبىزدىڭ وتباسىمىزدىڭ قيىنشىلىقتارى ايلار وتكەن سايىن اۋىرلاي ءتۇستى. مەنىڭ ءبىر قابات كيىمىم توزىپ ءتۇستى دە، كيىم الاتىن اقشا بولماي شەشەم اكەمنەن قالعان ءبىرتالاي ەسكىلى-جاڭالى كيىمدەرى بار بولاتىن،سول كيىمدەردى كىشىرەيتىپ قايتا جاماپ-جاسقاپ ماعان كيگىزىپ قويدى. مەن وسى     اكەمنەن قالعان كيىمدەردى ەكى جىلداي كيدىم.

  ءبىز سول كەزدە ءبىر وتباسىندا بەس جان ەدىك تە،وسى بەس جانعا ايىنا 12 كيلو ۇن، 10 كيلو بىتەۋ بورمي بەرىلەتىن. بۇل ءبىر ايلىق نورمامىز. شەشەم از ۇننان ولشەپ قانا تابا نان پىسىرىپ قويىپ،قالعان ۇندى كەسپەلىك دەپ الىپ قالاتىن. سودان بورميدى ادەمىلەپ قۋىرىپ تۇلىپقا سالىپ قويادى. تاڭەرتەڭ، ءتۇس ءبىر-ءبىر ءتىلىم اق نان، ەكى ۋىستان بورمي جەيمىز. ال،كەشتە كەسپە كوجە ىستەپ،ودان دا ولشەپ ەكى شىنىدان ىشەمىز. كەيدە الگى ازىن-اۋلاق ولشەمدى نانىمىزدان تۇيمەدەي بولسا دا اسىرىپ،قارىنداسىمىز بەن كەنجەمىزگە بەرەمىز.

  ءبىزدى وسىلاي وتباسىلىق تۇزىمگە،   ۇنەمشىلدىككە تۇسىرگەن شەشەمىز بولاتىن. ول كىسى ءار كەز بىزگە ايتىپ وتىراتىن: ءبىز باسقا ەلگە ۇقسامايمىز،قىسىلىپ-قينالىپ  قالساق كومەكتەسەتىن،ارقا سۇيەر ادامىمىز جوق،سوندىقتان بارىنە كونۋلەرىڭ كەرەك» دەپ. سول كەزدەگى بۇل قيىنشىلىق جالپى ەلدىڭ باسىندا بار ەدى. وسىنداي قيىن كۇندەر بولسا دا ءبىزدىڭ جانىمىزعا سونداي ءبىر   باتىپ،اش وزەگىمىز تالىپ كورگەنى جوق. ويتكەنى وسى جىلى جازعىتۇرىم پۇراق قوي باعىپ،ەلدىڭ ارتىنان كوشەتىن بولىپ قىدىرقاجى دەيتىن اق كوڭىل،جوق-جىتىككە كومەكشىل ءبىر جىگىت ءبىزدىڭ قاسىمىزعا ءبىر اي مالىن سەرگىتىپ وتىرعان بولاتىن. كوشەردە سول جىگىتكە شەشەم جاعدايىن ايتقان ەكەن، ەشكىمگە كورسەتپەي ءبىر جۋان ىسەك قوي توشالا ۇيىمىزگە قاماپ بەرىپ كەتتى. وسى قويدى جاقىن ماڭداعى بىرەۋگە قوسىپ قويىپ،شىلدە ايىنىڭ سوڭىندا سويىپ الىپ ەدىك،اق ماي اقتارىلىپ ءتۇستى. بۇنىڭ سىرتىندا باياعىداعى جوعالىپ-تابىلعان ەكى سيىرىمىز  بۇزاۋلاپ العان. سونىمەن بۇل جىلى جاز اۋزىمىزدان ايران-شالاپ كەتپەي قارىق بولىپ قالدىق. ءبىراق ەل كەلە كۇزگە جاقىن الگى 30 يۋان ەڭبەكاقىم توقتاپ قالدى. ويتكەنى جايىردىڭ ون شاقتى تۇتىنىنە جۇكتەلگەن ءوندىرىس جۇمىسى اياقتاپ بولعاندىقتان،بۇل 30 يۋان ىستەۋگە قاراي بەرىلەتىن نارسە ەكەن. ال،باسقا ازاماتتار تاس كوتەرىپ،قورا-ءۇي سالۋعا ارالاسىپ كەتتى. مەنىڭ  وعان شامام كەلمەي قالدى دا قارا جۇمىستان ەرىكسىز شەگەرىلدىم.

  سونىمەن وسى جىلى ەل قىستاۋعا كەلىپ بولعان سوڭ شەشەم ءۇزىلىپ قالعان وقۋىمدى ويلاستىرىپ،مەنى اڭكە پۋنكتىنىڭ جانىندا   اشىلعان كوشپەلى مەكتەپكە بەردى. بۇل ءبىر قىس 3-كلاستى تولىق وقىپ،كەلەسى جىلى جاسىم تولماسا دا وقۋدان ءبىرجولاتا قولىمدى ءۇزىپ،رەسمي ءبىر قارا ەڭبەكشى بولىپ شىعا بەردىم...

  بۇل جىلى جايىردىڭ تاڭبالى دەيتىن جايلاۋىنا جايىردا قالعان ەلدىڭ جيىرماعا تارتا ساۋىن سيىرىن باعۋ مىندەتىن ورنالاستىردى. بۇل قارا جۇمىسقا قاراعاندا جان قينامايتىن، ۇستەلدە وتىرعان كادرمەن بارابار،بۇعان ءۇي ىشىمىزبەن قۋاندىق. تاڭبالىداعى كۇندەرىمىز كوڭىلدى بولدى. ەل قاتارلى جايلاۋعا شىعىپ، ساناتقا قوسىلىپ قالعاندايمىز. وسى كۇندەردىڭ بىرىندە سيىرلارىمدى ەرتەرەك ورىستەن قايتارىپ كەلسەم ءبىزدىڭ ءۇيدىڭ بەلدەۋىنە بوتەن ءبىر ات بايلانىپ قالىپتى. ۇيگە كىرسەم بەيتانىس ءبىر ەر ادام  ءتوردىڭ قاق ورتاسىندا وتىر ەكەن. داۋىسىمدى سوزا سالەم بەردىم. ول سالەمىمدى الىپ،مەنىڭ ءجونىمدى تاپتەشتەي سۇرادى. مەن وسى ءۇيدىڭ بالاسى جانە ەڭ ۇلكەنى ەكەنىمدى ونىڭ سۇراۋى بويىنشا ايتىپ بەردىم. ەل ورىنعا وتىرا شەشەمنىڭ ماي ساپىرىپ باپتاپ ىستەگەن ءسۇت كوجەسىن الگى ادام تەرلەپ-تەپشىپ وتىرىپ ۇزاق ءىشتى.

  ول ءبىر كەزدە ءوزىنىڭ ءجونىن ءتۇسىندىرىپ، تولى اۋدانىنىڭ ادامى ەكەندىگىن، ءوزىنىڭ سالت،جەكە قورا-جايى بار،قورا-جايدا جەتى تۇيە جۇك تىرەلىپ تۇرعان اۋقاتتى، تەك عانا ءومىربويى باس قۇراماعان  جىگىت   ەكەندىگىن ۇزاق باياندادى. وسى  سەبەپتى    ءبىزدىڭ ءۇيدىڭ جاعدايىن سىرتتاي ەستىپ،   ارناۋلى ات باسىن بۇرىپ كەلگەن بەتى ەكەن.

  مەنىڭ شەشەمە سويلەسىپ كەلگەن بۇيىمتايىندا ءبىزدىڭ كوزىمىزشە اشىق ايتىپ جاتىر. مەن الدىمداعى ءسۇت كوجەمنىڭ ءسۇتىن ەكپەتتەگەن كۇيى ۇرتتاي بەردىم. ونە بويىم مۇزداپ كەتكەندەي قالتىراپ بارامىن. باسىمدى كوتەرمەي كوزىمنىڭ استىمەن شەشەمە قاراسام ول كىسى بەزەرگەن كۇيى تومەن قاراپ تۇقىرىپ قالىپتى. قارىنداسىم مەن ءىنىم كوپ ەشتەڭەنىڭ بايىبىنا بارا الماي بارىمىزگە كوزدەرى جاپاقتاي قارايدى. ءبىراق،شەشەمنەن ەشقانداي جاۋاپ جوق ءبىر تىزەرلەپ وتىرعان قالپى.

  ءبىر كەزدە تاماق ءىشىلىپ بولىپ داستارقانداعى شىنىلار جيىلا باستاعاندا الگى قوناق اتىن قويۋعا دالاعا بەتتەدى. ماعان «انا كىسىنى ءيت قاۋىپ الماسىن دالاعا شىق!» دەدى بۇيىرا سويلەگەن شەشەم. ول كەزدە قوناق بەلدەۋدەگى   اتىنىڭ ەرىن الىپ ۇيدەن الىستاپ بارا جاتقان  ەدى. مەن تۇرعان ورنىمنان وقىس قوزعالىپ:

  -انانىڭ اتىن تۇندە ارقاننان شەشىپ قويا بەرەمىن،-دەدىم باسىمدى تومەن سالبىراتقان بەتى. شەشەمە وكپەلەپ تۇرعانىم بەسەنەدەن بەلگىلى ەدى...

  شەشەم ماعان الايا قاراپ:
 
  -الباتى ادامدا نەڭ بار؟ونىڭ قانداي ادام ەكەنىن قايدان بىلەمىز؟ ءبىر بالەسى ءتيىپ جۇرمەسىن!-دەپ مەنى زەكىپ تاستادى. شەشەمنىڭ بۇل بەينەسى انانى جاقسى كورىپ تۇرعانداي سەزىلە بەردى ماعان...

  مەن قايتىپ ءسوز قاتپادىم،الگى كىسىگە ءبىر شەتكە توسەك سالىپ،ونىڭ جانىنا ماعان توسەك توسەدى دە،پانار شامعا كارەسندى تولتىرا قۇيىپ كيىز ءۇيدىڭ ءدال ورتاسىنا جارقىراتىپ ءىلىپ قويدى. مەن كوپكە دەيىن ۇيىقتاماي كوزىمنەن جاس سورعالادى دا  جاتتى. جاستىعىم جاسقا شىلانىپ شىلقا بولدى.

  تاڭنىڭ ءبىر ۋاعىندا ويانىپ كەتكەن ەكەنمىن،شەشەم تىم ەرتە تۇرىپ الىپتى. مەنى   وياتىپ كۇندەگى ادەتى بويىنشا ون شاقتى  ءتۇتىننىڭ جيىرمانىڭ ۇستىندەگى سيىرىن جيىپ مەنىڭ الدىما سالىپ بەردى. سيىرلاردى ورىسكە قاراي قولىمداعى بيشىكپەن سابالاپ ايداپ بارا جاتىرمىن. تاعى دا سول،كوزىمنەن جاس مونشاقتاپ توقتامايدى. ويلايتىنىم شەشەمىز بۇل اداممەن تۇرمىسقا شىقسا ءبىز الباتى بىرەۋدى اكە دەيمىز-اۋ،سوندا بىزگە الباتى ادام قايتىپ اكە بولادى؟ ول بىزگە اكە بولىپ قانداي كۇي كورسەتەدى. ءبىز ونىڭ بالاسى بولماعان سوڭ ءبىزدى ۇرىپ-سوعاتىن شىعار؟ بولماسا مەن بارماي تۋىستارعا كەتسەم بولاما؟ ءبىراق،قارىنداسىم،باۋىرلارىم قانداي كۇيدە بولار ەكەن دەشى؟ جانە بۇلاردان تىرىدەي قايتىپ بولىنەمىن؟ دەگەن سىقىلدى قىم-قۋىت قيالدار باسىمدى كوتەرتپەي ودان ارى وكسىپ-وكسىپ الامىن. سيىر ءتۇس  تاياعاندا بارىپ كوز جاسىم سارقىلعانداي بولىپ سيىرلاردى ايداپ اۋىلعا قايتتىم.

  مەن كەلگەندە الگى قوناق الدەقاشان كەتىپ قالعان ەكەن. مەنىڭ داستارقانىمدى جايىپ،شايىڭدى ىشە بەر دەدى دە شەشەم سيىر ساۋۋعا شەلەگىن الىپ دالاعا شىقتى. مەنىڭ  تاماعىمنان اس وتەتىن ەمەس،شالقامنان ءتۇسىپ جاتا كەتتىم. ەكى كوزىم شاڭىراقتا. وسى شاڭىراقتى ساۋ كەزىندە اكەم ۋاق ەلىندەگى ناعاشى جۇرتىمنان الدىم دەپ اتىنا وڭگەرىپ كەلگەن بولاتىن. بۇل شاڭىراق اكەمنىڭ كوزى عوي،قازىر اكەم باقيلىق بولسا دا باسقالار   اكەمىزدىڭ اتىن ايتىپ ابزالقاننىڭ شاڭىراعى دەپ كەلەدى. ەگەر شەشەم بىرەۋمەن تۇرمىسقا شىقسا،بۇل شاڭىراق سول ادامنىڭ اتىمەن   اتالاما دەشى؟ جانە ءبىز كىمنىڭ بالاسىمىز دەيمىز؟ ەگەر ءوز اكەمىزدىڭ اتىن ايتساق،ول بىزگە اكە بولعان ادامنىڭ كوڭىلى اۋىرادى عوي؟ەگەر سول وگەي اكەنىڭ اتىن ايتاتىن بولساق،وندا ءوز اكەمىزدىڭ اتىنىڭ وشكەنى عوي،قايران دا، قايران اكەم-اي دەسەڭشى! دەگەن قيالعا كەلگەندە كوزىمنەن جاس بۇرق ەتە ءتۇستى...

  وسى كەزدە شەشەم دە سيىر ساۋىپ بولىپ قولىن جۋىپ داستارقان شەتىنە كەلىپ وتىردى. الدىمەن مەنىڭ بوس قالعان شىنىما شاي  قۇيدى. ودان وزىنە ءبىر شىنى شاي قۇيىپ قويىپ ماعان قاراپ:

  -باسىڭدى كوتەر، شاي ءىش!-دەپ ءوزى شىنىسىنداعى شايىنان ءبىر-ەكى ۇرتتاپ الىپ ءسوزىن باستادى.
 
  -ە،بالام،سەنىڭ تۇننەن بەرگى كوڭىل كۇيىڭدى ءتۇسىنىپ مەن دە ءتۇن بويى كوز ىلمەدىم. ەگەر اكەڭ بولسا كورىنگەنگە بوزەك بولىپ الباتى ەلدىڭ ءسوزىن ەستىرمە ەدىك؟ امال جوق،قۇداي باسقا سالعان سوڭ كورەسىڭ دە كونەسىڭ! مەن سەنەن الاڭدادىم. انا قونعان قوناقتىڭ اتىن سەن شەشىپ جىبەرىپ بىزگە بالەسى ءتيىپ جۇرمەسىن دەدىم. ەل ايتا بەرەدى،امالىمىز جوق،بىرەۋدىڭ اۋىزىن جابۋ قايدا؟وسىنداي سوزدەردى ەستىسىن دەگەن سوڭ ەستىپ وتىرمىز،-دەپ الىپ از-كەم توقتاپ ءسوزىن قايتا جالعادى.

  -اكەڭ حال ۇستىندە جاتىپ ارىزداسقاندا ول كىسى ماعان «مەنىڭ ءتورت بالامدى جەتكىزە الاسىڭ با؟» دەگەندە مەن ايتقان  ەدىم،«قارا تۇياعىمنان حال كەتكەنشە ءتورت بالا ءۇشىن جانىمدى سالىپ ولاردى تۇمسىقتىعا شوقىتپايمىن،قاناتتىعا قاقتىرمايمىن!» دەپ ەكى دۇنيەنىڭ ورتاسىندا جاتقان اكەڭەدە اۋىزىمنان انت بەرگەن ەدىم. سول ءسوزىم ءسوز بالام، ماعان الاڭداما،مەن سەندەردى تاستاپ ەشقايدا بارمايمىن،ءبارىمىز وسى شاڭىراقتىڭ يەسىمىز. اكەلەرىڭ قايتىس بولعالى دا ەكى جىل بولىپ قالدى،كۇنىمىزدى كورىپ ەل قاتارلى ءجۇرىپ كەلەمىز. ءتىپتى كۇندەر وتكەن سايىن تۇرمىسىمىز دا جاقساردى، سەندەر دە ەرجەتەسىڭدەر سودان وسى ەلدىڭ قاتارىنا جەتەمىز، سول ءۇشىن سەن دە قىزمەتتى جاقسى ىستەپ مىقتى ازامات بولىپ شىعۋىڭ كەرەك... دەگەندەي ءبىرتالاي ءسوز سويلەدى. مەن بۇل سوزدەردى ەستىپ كوڭىلىم ورنىعىپ تۇنىمەن تۇنجىراعان ءجۇزىمدى قۋانىش لەبى يەلەپ، بويىمدى وزگەشە ءبىر كۇش كەرنەگەندەي بولىپ تۇردى جانە وسىدان باستاپ شەشەمە شىنايى سەنەتىن ءبىر سەنىم ماعان دا مىقتاپ ورناي باستاعان بولاتىن.

  شەشەم ەرەسەن ۇقىپتى،ۇنەمشىل ادام   ەدى. سول كەزدەگى ەكى سيىردان ءبىر جازدا ءبىر ۇلكەن قارىن سارى ماي،ءبىر قاپ قۇرت الاتىن دا قىستاي وسىنى تالشىق ەتەتىنبىز جانە اقشاعا دا سونداي قاتاڭ ەدى. مەنىڭ 30 يۋانىما ءوزىنىڭ ارەدىكتە شوپشىلەرگە تاماق ىستەپ تاپقان اقشاسىنان ىركىپ ءجۇرىپ،تاعى ءبىر قۇنان وگىز شىعارىمىزدى ساتىپ،ماعان 120 يۋانعا ءبىر قول ساعات الىپ بەردى. ول كەزدە ساعاتتى قولى جەتكەن جىگىتتىڭ جىگىتى تاعاتىن. مەنىڭ ساعات تاعۋىم توڭىرەگىمىزدەگى اۋىل ادامدارىنا دارداي اڭگىمە بولدى. ساعاتتى بالاسىنا قايتىپ الىپ بەردى؟اقشانى قايدان تاپتى ەكەن؟ ءوزى جەسىر وتىرىپ دەسە،تاعى بىرەۋلەرى كىپ-كىشكەنە بالاعا ساعات تاعىپ نە قىلماقشى ەكەن جاندارىن باعا الماي ءجۇرىپ؟!  دەگەن سوزدەردىڭ لەبى بىزگە دە ەستىلىپ قالىپ ءجۇردى...

  وسى جىلدىڭ كۇزىندە ءبىر كۇنى شەشەم ويعا بارىپ كەلەيىن،كوپ جىل بولدى توركىنىمە دە بارمادىم جانە «جەلدى قارا» دەگەن جەردە ەل كۇزگى كۇزەم قىرقىپ جاتىر دەيدى. سوعان بارىپ ءجۇرىپ باستىقتاردان ءجۇن سۇرايىن،كيىز ءۇيدىڭ تۋىرلىعى ءسۇزىلىپ توزىپ بارادى. سەندەردى پۋنكتتىڭ ءبىر بوس ۇيىنە وتىرعىزىپ قويايىن،كيىز ۇيدە مەن جوقتا جەل الىپ كەتىپ جۇرەر. پۋنكتتىڭ   سدورجىسى بار،قورىقپايسىڭدار، سوعان تاپسىرىپ قويامىن دەدى جانە بۇل تۇستارى ءوزىمىز دە ەسەيىپ قالعان ەدىك.

  شەشەمىز ايتقان كۇنى ءبىر-ەكى ويعا باراتىن ادامدارمەن بىرگە ويعا اتپەن جولاۋشى كەتتى دە، وسى كەتكەننەن ون بەس كۇنگە تاياعاندا سوناۋ ورقاشاردىڭ بوكتەرىنەن اتىنا ەكى داعار جەرلىك قويدىڭ كۇزگى كۇزەم   ءجۇنىن تەڭدەپ ورالدى.

  قانجىعاسىنداعى سارالا قورجىننىڭ ەكى باسى سونداي توق. ىشىندە توركىنى سالعان سالەم-ساۋقىتتان تارى-تالقان،جەنت،مامپازي  سەكىلدى ءبىز اۋىزىمىزعا سالىپ كورمەگەن ءدامدى قۇجىرالارمەن سىقالعان. قورجىننىڭ تاعى ءبىر باسىندا سۋلياۋ دورباعا قاتتالىپ سالىنعان ءبىر سىم، ءبىر قالەت ماعان ارناپ   اكەلىپتى. سىم كوك پوبىرىك ەكەن دە قالەت ديكا دەگەن بۇلدان. ەكەۋى دە زاۆودتا  تىگىلگەن ەكەن. زاۆودتا تىگىلگەن دەيتىنىمىز ول كەزدە ەل تىگۋلى كيىمدى بىلمەيدى،تۇگەلدەي وزدەرى قولمەن تىگىپ كيەدى. سوندىقتان بىرەر جارتى تىگۋلى كيىمدى كورسە «زاۆودتا تىگىلگەن» دەيتىن ەدى.

  ماعان اكەلگەن بۇل ديكا قالەت پەن پوبىرىك سىمدى ول تۇستارى كيگەندى قويىپ، ءبىز سەكىلدى شەتكەرى جۇرگەندەر اتىن دا ەستىپ كورمەگەن. مەن وسى ساپالى كيىمدى ءبىرىنشى رەت كيىپ،جيىن-توپتارعا بارعاندا ۇستىمدەگى كيىمدى تالاي مىقتى  دەگەن    ادامدار قولدارىمەن ۇستاپ كورىپ، اۋىزدارىنىڭ سۋى قۇرىعان بولاتىن...

   وسىدان ەكى-ءۇش جىل وتكەندە،ەل    ەمەس پە، ءبىزدى مالى كوپ،قىستاۋلىقتى تاپالاپ تاستادى،مالىن ەمىن-ەركىن قويا بەرەدى دەگەن سەلكىلدى سوزدەر دۇي باسشىلارىنىڭ  قۇلاعىنا جەتىپ جاتقاندىعى بەلگىلى بولدى.

  مۇنىڭ ءجونى بار ەدى. اكەمىز قايتىس بولعان بەس-التى جىل ىشىندە سيىر تۇياعىمىز وننىڭ ۇستىندە،جىلقى باسى بەسكە،ەشكى-لاعىمىز وتىزعا تارتىپ قالعان بولاتىن دا، شەشەمىزدى ەل «باي قاتىن» دەپ لاقاپ اتپەن اتاپ جۇرەتىن. ال ەلدە ول كەزدە جەكە مال بولمايتىن،تايقازانعا قاراعان تۇستارى ەدى.

  سونىمەن 1981-جىلدىڭ جازعى كوشى-قون ايىندا ەلمەن بىرگە كوشىپ ويعا باردىق، ءبىراق العاشقى جىلدارى سالت كوشىپ جۇردىك. مۇنداعىمىز شەشەمنىڭ كوشىپ-قونىپ ۇيرەنەمىز دەگەن بولاتىن. وسىدان تاعى ءبىر جىل وتكەن سوڭ دۇيدىڭ ءبىر قورا بويداق قويىن باعىپ،كادەلى مالشىنىڭ بىرىنە اينالدىق تا شىعا كەلدىك. بۇعان وتباسىمىزبەن قۋاندىق. قۋانىشىمىزدىڭ سەبەبى،ەل قاتارلى ءومىر  كەشىپ،ەل قاتارلى ۇلەسكە يە بولىپ،ساناتقا قوسىلعاندىعىمىز ەدى.

  وسىدان كەيىن ەكى-ءۇش جىلدىڭ ىشىندە تايقازان تاراپ مالدىڭ ءبارى جەكەلەرگە تارادى دا،الدىمىزعا شولاق ءجۇز قوي سالىپ شىعا كەلدىك. اينالاسى بىرنەشە جىلدىڭ ىشىندە مالىمىز دۇرىلدەي ءوسىپ، باي وتباسىلاردىڭ قاتارىنان ورىن الدىق.
اۋىر كۇندەردى باستان كەشىرە ءجۇرىپ ەسەيىپ-ەرجەتىپ،ۇلكەنىمىزدەن تارتىپ باس قۇراپ،تورتەۋىمىز ءتورت ءتۇتىن بولىپ ءبىر اۋىلعا اينالدىق. وسىنداي داۋرەندەگەن باي-باقىتتى تۇرمىسقا جەتەمىز دەپ كەزىندە ويلاماعان ەدىك. بۇل قاجىرلىلىعى،قايسارلىعى   انامىز نۇرباعي مۇحامەتجان قىزىنىڭ ۇلكەن ەڭبەگى،بالالارىنا وتەگەن انالىق بورىشىنىڭ بوداۋى. انامىزدىڭ وسى ەڭبەگىن ءبىز مۇلدە وتەي العامىز جوق. اق ءسۇتىن قوسپاعاندا  وسى قوسقان ۇلەسى ءالى ءبىزدىڭ مويىنىمىزدا تۇر. انامىز ءبىزدىڭ اكەمىزدىڭ ۇرپاعىنا وتەي الماي كەتكەن بورىشىمەن قوسا ءوز انالىق بورىشىن سوڭىنا دەيىن جەتكىزىپ ورىندادى. ويتكەنى بىزگە بوتەن بىرەۋدى اكە دەگىزبەدى. 39 جىل ءوزى انا دا بولىپ،اكە دە بولىپ ءوز بيلىگىن ءساتتى جۇرگىزىپ اياقتاتتى. انامىز  اكەمىزدەن كەيىن 39 جىل عۇمىر كەشىپ دۇنيەدەن ءوتتى. وسى 39 جىلدى انامىز ءبىز ءۇشىن جاسادى دەسەك ارتىق ەمەس. ءبىزدىڭ تاعى دا جاقسىلىقتارعا جەتىپ،كۇننەن-كۇنگە ورلەپ كەلە جاتقانىمىز ءالى دە سول اياۋلى  انامىزدىڭ باسقان تابانىنىڭ ىزىنەن كوكتەپ جاتقان تىرشىلىك تامىرىنىڭ بارعان سايىن تەرەڭگە تارتقان قاسيەتتى شاراپاتى!

  رەداكتورى: اراي ەركىن قىزى

   تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

   مسالى: «تارباعاتاي اقپارات تورابىنان» الىندى.

 
 
powered by IlgharCMS 3.2 www.ilghar.cn